Vawiin chawhma ah khan Health Minister Pu Lal Thanzara chuan Kulikawn, Kolasib leh Mamit a Anti-Retroviral Therapy(A.R.T.) Centre siam thar te a hawng a. Facility Integrated A.R.T. Centres hawnna inkhawm hi Health Workers’s Training School Conference Hall ah neih a ni.
He huna thusawitu Health Minister Pu Lal Thanzara chuan AIDS/HIV+ chu khawvela natna khirh tak tihdam theihloh ni mahse natna veitu nunkhua pawhsei nan leh a natna te a zualzel loh nan damdawi hmanga chelhdin leh thunun theih a ni a ti a. He natna veitu tam tak te hi miharsa tak tak te an nih avangin an banphak ah an in enkawlna tur hmun, A.R.T. Centre hi dah vek sawrkar in a tum a. Serchhip, Lawngtlai leh Saiha ah pawh A.R.T. Centre hi dah tum a hmalak mek zel a ni a ti. AIDS/HIV+ vei mi harsa tak tak ten damdawiin an thlen theih nana SUMO Driver ten a man chanve laia a an Sumo Fare tihhniam sak an phal chu a lawmawm tak zet a ni a ti.
Health Department hi mizawng zawng nghen chhan leh ngaihven anih bakah an thil tih apiang ah mipui mit a fu thup reng a ni tiin Health Department hnathawk te chu tan la sauh sauh turin a fuih a. Thahnem ngai taka hma an lak mek laiin vanduaina te a lo awm ve leh thin a, hengah te hian thu chiangkuang hre silo ten mipui vuivaina tur siam thin a. Chuvang chuan Department pawh in dem rawn a tawk thin a ni tih thu a sawi a. Sum harsatna avanga doctor leh nurse indaihlohna te tih ziaawm tumin Sawrkarin theih tawp a chhuah mek a. National Health Mission kaltlangin hnathawktu tam tham zawk lakbelh tuma hmalak a ni a, Doctor awm loh na Health Centres te pawh an khaw thenawm hnai Doctor te’n an vil lailawk dawn a ni a ti. Doctor ten thingtlang awm an hreh loh nan posting felfai tak duan mek a ni a ti a. Hetianga nasa taka Health Department in hna a thawh mek lai hian thudiklo leh mawi lo tak taka chanchinbu leh Social Media ah te Health Department tih hmingchhiat tumna a awm thin chu a vanduaithlak tak zet a ni a ti. Health Minister Pu Lal Thanzara chuan, “Ramhruaitu nih tum mi chhuanawm tak tak te tan thisen sawngbawl na senso Rs 550/-lak anih chhan hriatthiam loh luih tlat leh mawihnai lo taka ‘thisen man’ tih phuaha sawrkar hmalakna beih chiam chiam hi puitlinglo thawmhnaw a ni” a ti a.
Thusawitu dang, Pu Arun Goyal, Principal Secretary, Health Department chuan kum liamta chhung leh tunhnaiah Mizoram chhunga AIDS/HIV+ veizat tlahniam hret hret tura an beisei laia pun lam a pan ta zawk chu a pawi tak zet a ni a ti a. AIDS/HIV+ tih tlemna kawnga hmalakna hi MSACS kutah ringawt nghah a ngamawm tawh lova, Medical Officer, Staff zawng zawng leh mi tlawmngai ten an ngaihven a hun tawh tak zet a ni a ti.
A.R.T. Centre 3 hawnna inkhawm hi Dr. Lalmalsawmi Sailo, PD, MSACS in a kaihruai a. Dr. K.Ropari, Principal Director, H&FW, Dr.K.Lalbiakkima, Director of Hospital & Medical Education, Dr.Rohmingthanga Ralte, Director of Health Services leh Health Department hotulu te pawh he hunah hian an tel a ni.
Technical Report a tarlan anih dan in October,1990 khan Mizoram ah AIDS vei hmuhchhuah a ni tawh a. Tun dinhmunah AIDS/HIV+ testing centre hi hmun 35 awm mek in vawiin a hawn tak ten en hian A.R.T. Centre hmun 6 ah a awm ta ani. Thisen sawngbawl nana senso pek ngai chungchang chu chanchinbu ah leh kohhran chanchinbu ah te pawh ziah anih tawh thin thu tarlan a ni a. Thisen sawngbawl nana Rs.550/- lak a nih chhan chu National Blood Transfusion Council in la ngei ngei tawh tura an tih vang leh NACO atanga hemi phuhrukna sum an dawn tawh bawk si loh vang a nih thu Health Department chuan tarlang a. Kum 2006 atang khan National Blood Transfusion Council chuan state dang zawng zawngah thisen sawngbawlna hi an laktir tawh a, khatih hunlai khan Mizoram chuan NACO sum ala dawn avangin thisen sawngbawlna hi lak rih loh nizawk se a tih vanga la lo a ni an ti.
