Nimin 4th April, 2016 khan Health Minister Pu Lal Thanzara chuan Mizoram PWD hmalakna pahnih - Hnahthial-Haulawng (via Zotuitlang) kawng laih lai leh Tuipui D (Darzokai) lei dawh mek te chu a hmunah kalin a enfiah a. Health Minister hian Hnahthial Sub-District Hospital leh Tuipui D Sub-Centre te pawh tlawh nghalin an hmalaknate a enpui a, Hospital leh Sub-Centre-a thawkten Minister hnenah mamawh an thlente chu theihtawp a chhuahpui tur a hrilh.

Hnahthial-Haulawng via Zotuitlang Road hi ni 29.1.2016 khan hna thawh tan niin, NLCPR Phase-I (12 kms) hnuaia bultum he kawng siamna tura senso tur zat (sanctioned amount) chu Cheng nuai 1515.75 a ni a. Ni 29.1.2019-a thawhzawh beisei a ni a, chumi hnuah NLCPR Phase-II (34 kms) hnuaia sanction cheng 630,238,000 sengin hnathawh chhunzawm tura ruahman a ni.

Tuipui D Darzokai lei hi ni 19.11.2012 atang khan hna thawh tan niin ni 30.4.2016-ah zawhfel beisei a ni a. He lei dawh thar hi a sei zawng 200ft leh a vang zawng 3.90m a ni dawn a, a rih ber (loading capacity)-ah Sumo/Pick-up Full Load dawl zo tura duan a nih avangin phal aia rit buangrua phur motor tlan phal a ni dawn lova, duty tur pawh dah an ni dawn tih SE PWD Lunglei Pu C.Lalchhuana chuan a sawi.

Health Minister Pu Lal Thanzara hi Lunglei atangin SE PWD Pu C. Lalchhuana, EE PWD (Roads) Pu Lalchhuana, DIPRO Pi Mina Zoliani bakah PWD leh Health Department officials ten an tawiawm a ni.