Ni 7.11.2012 (Nilaini) khan Health Minister Pu Lalrinliana Sailo chuan ‘E’ Lungdar a Primary Health Centre Building, Rs.52,87,334 .00 seng a sak a hawng.

He building hi NRHM sum hmanga October 2009 atanga sak tan niin, 23 March, 2011 khan luah tan a ni. He PHC ah hian tun dinhmunah Doctor 1, Staff Nurse 4, Pharmasist 1, Laboratory Technician 1, X-Ray Technician 1, Accountant Clerk 1, OA 1, Driver leh Group D 7 an awm mek a ni. He building thar hawnna inkhawm hi Dr. Laldawngliana, Chief Medical Officer, Serchhip in a kaihruai a.

Health Minister hi Dr. Ramfangzauva, Director of Health Services leh Dr. Gordon Zohmingthanga, Mission Director,NRHM ten an tawiawm a ni. Health Minister hian ‘E’ Lungdar a MZP General Assembly, Thangburha Hall a neihah khuallian niin a hmanpui nghal a. Zirlaite hma ah thusawiin, zirlaite chu Zoram nghahfak an nih ang ngeia an zirna kawnga rinawm leh taima taka bei turin a fuih bakah hriselna tichhe thei thil, zuk leh hmuam leh ruihtheih thil laka fihlim tura a chah rualin tunlai natna hluar tak AIDS laka inveng fimkhur turin a chah bawk a ni. Zirlaite hian Minister hnenah hian chawimawina Citation an hlan a ni.

Health Minister hian a haw kawnga N. Vanlaiphai PHC leh Khawlailung te tlawh nghalin,N.Vanlaiphai a PHC building thar tur a dung 105 ft, a vang 31.2 ft lungphum a phum nghal a. Heng PHC hmuna thawktute an harsatna an lo thlen te sutkian dan a sawipui bawk a ni.