Vawiin chawhma dar 11 khan Pu P. Lalchhuanga, School Education Director chuan a office chamber ah School Education Department hnuaia data chi hrang hrang tarlanna Statistical Cell buatsaih Annual Publication 2011-2012 bu a tlangzarh.

Lehkhabu tlangzarhtu Pu P. Lalchhuanga chuan thu sawiin , hetianga lehkhabu tangkai tak tur tlangzarh thei an ni chu lawmawm a tih thu leh a buaipui tu te an inpekna fakawm a tih thu a sawi a, kan hna kan thawh reng reng ah hmasawnna nei tur chuan kan dinhmun kan hriat chian hmasak phawt a ngai a, kan dinhmun dik tak kan hriat chian hmasak phawt chuan kan tan hnathawh a awlsam phah dawn a nih thu a sawi bakah, he Annual Publication bu hi kan hna theuvah kan rawn ber tur pakhat a ni a. Kan hman tangkai thiam phawt chuan kan hna ah nasa takin min pui dawn a, chutiang atan chuan hmang tangkai theuh turin a chah bawk a ni.

He hun kaihruaitu Pu B. Lalchhuanliana, Jt.Director, School Education Department chuan Statistical Cell te an hmalakna ah fakawm a tih thu leh kum 2004 atang khan Annual Publication bu hi tih chhuah chhoh char char a nih thu te, Department tan a lehkhabu rotling a nih ngei a beisei thu a sawi bawk.

Pi Ruth Lalrinsangi, Inspector of Statistics in lehkhabu buatsaih a nih chhoh dan sawi zauna hun a hmang a, he lehkhabu ah hian Mizoram chhunga recognized school zawng zawng Primary atanga Higher Secondary School thleng tarlanna a ni a. Government of India duh dan in State Government school chauh ni lovin Central Government SSA/RMSA, Local Body, Deficit, Council Deficit, Adhoc Aided, Lumpsum Aided leh Private Unaided (recognized school zawng zawng) data te khawn vek a ni. Tun dinhmunah State Government school chauh ni lovin Central Government SSA/RMSA, Local Body, Deficit, Council Deficit, Adhoc Aided, Lumpsum Aided leh Private Unaided(recognized school zawng zawng) nen Mizoram ah School 3894 a awm a, zirlai naupang 318231 chuang an awm a, zirtirtu 23705 an awm tih he lehkhabu ah hian tarlan a ni bawk.