Nimin chawhnu dar 2:00 khan Lawngtlai-ah cheng nuai 102 chuang senga sak Tourist Lodge chu Pu S. Hiato, Tourism Minister chuan a hawng.

He Tourist Lodge mikhual tum khata mi 28 thlen theihna tur hawnna inkhawm hi Pu Zothangliana, Parliamentary Secretary, Tourism chuan a kaihruai a, khuallian Pu S. Hiato, Tourism Minister chuan thu sawiin Tourism Department in Saiha leh Lawngtlai District chhunga an hma lakna chi hrang hrang te tarlang in Pathianin ram kilkhawr tak hi hmun laili takah min dah dawn a ni, a ti a. World Bank kawngpui laih anih tur chungchang sawiin he kawngpui hi siam zawh anih hunah chuan ram kilkhawr ber hi hmun laili-ah a chang dawn a ni, a ti bawk. Kaladan Multi Hydel Project siam chungchang ah he project hi tih hlawhtlin anih hun chuan Electric eng in daih lohna hi sutkian anih tur thu sawiin Tourism Department hi kan hman tangkai thiam chuan mipuite tan sum hailuhna hnar tha tak anih tur thu a sawi bawk. Tourist ten an tlawh tam ram apiang hi ram changkang leh hmasawn an nih thin thu sawiin ram hmasawn zelah Tourist te kan lo dawnsawn thiam a ngai a ni, a ti bawk. P.H.E. Department bikah Lawngtlai District tana hmalakna hrang hrangte tarlangin tun atanga reilote ah tui lama harsatna te pawh sutkian beisei anih thu a sawi a, leilung hausakna haichhuak turin Oil Company hrang hrang ten Mizoram chhung ah leilung hausakna hrang hrang te zawn hna pawh an neih tawh thu leh kan leilung hausakna te hi haichhuah anih hun chuan gas leh tuialhthei lama kan harsatna hrang hrang te hi sutkian anih tur thu a sawi bawk. Industry Department bikah NLUP kaltlanga hmalakna hrang hrang sawi langin NLUP hi a hlawhtlinna bulber chu tanpuina dawngtu te an ni a ti a, tih takzeta hna thawktute chu an dinchhuah ngei tur thu a sawi bawk. Mizoram in hma kan sawnna bul ber chu Kohhran hrang hrang ten chhum lo chat lova ramhruaitu-te leh ram tan an tawngtai vang a ni, tiin ramhruaitu kan thlan fuh hian ram hmasawnna engkim a keng tel a ni, a ti bawk.

Nimina Tourist Lodge hawnna ah hian Pu Maiba E.E. PWD Building Division, Lunglei chuan Technical Report pe in, Pu C.Ngunlianchunga, CEM, LADC; Pu RT Zachono, CEM, MADC leh Pu Thara CEM, CADC te bakah sawmbik te hnen atangin thusawi ngaihthlak niin Programme karlakah zaithiamte hnen atanga zai ngaihthlak a ni a, Pu Vabeiha Hlychho, Director of Tourism chuan lawmthu sawina neiin he programme hi tih tawp a ni a, tlailamah chawhlui kilhona neih zui nghal a ni. He Tourist Lodge hawnna programme ah hian MADC, LADC leh CADC tangin E.M. pawh thahnem tak an tel a ni.