Cheng Nuai 79 senga sak Chawlhhmun Urban Primary Health Centre chu vawiin khan Health Minister Pu Lalthanzara’n a hawng.
Khuallian chuan thu sawiin, ‘ram a cheng te an hrisel loh chuan ram chu hma a sawn tak tak theiloa’ Urban Primary Health Centre chu Chawlhmun leh a chhehvela mipuiten a tangkai thei ang bera hmang se a duh thu a sawi. Health Centre hmang tangkai tu mipuite chu health Centre tana kawng hrang hranga tangkaina nei let ve turin a sawm a, tin a thawktu Doctor,Nurse leh Health Worker te pawh Pathian Rawngbawlna ah ngai a thahnem ngai taka thawk turin a chah bawk a ni.
“Mizoram a Doctor indaih lohna hi Sawrkar thil ngaih pawimawh ber zing a mi a ni a. He harsatna hi Sawrkar leh Department in chinfel tumin ngaituahna a seng mek a. Dawhthei taka sawrkar hmalakna te ngaichang tur leh harsatna te siam lo turin kan in ngen a ni”, Health Minister Pu Lal Thanzara chuan a ti a. Doctor indaihlohna te sutkian a nih theih nan Doctor zirchhuak thingtlanga a awm hreh lo te pawh Sawrkar in Contractual Employment a pek theih thu a sawiin kawngdang tam tak pawh Doctor indaihlohna chinfel a nih theih nan dap mek a ni a ti. Mizoram Sawrkar chuan Mipuite hriselna ngai pawimawh in hmalakna tamtak a neih thu a tarlang bawk a, Falkawn referral Hospital ah Medical college din a nih theihnan thil tul hmasa te tih mek a nih thu sawiin Cancer Hospital changtlung tak nei tur pawhin chak taka hmalak mek a ni a ti. Heng bakah hian kum lama upa te tan ‘Health Care for the Elderly’ hmalakna hnuaiah khum 10 awmna pawh peih fel a ni tep tawh tih a sawi a. Lunglei Sazaikawn-a Urban Primary Health Centre sak a nih tur thu pawh tarlangin Union Health Ministry in a phalna a pek angin naupang te tan ‘Children’s Hospital’ din turin sawkarin a ranglam in hma a la dawn a ni a ti.
Inkhawm hi Pu Lalrinliana Fanai, Commissioner & Secretary, H&FW Department in a kaihruai a, Dr. K. Ropari, Principal Director H&FW pawh in thu sawiin, Dr.K Lalbiakzuala, Mission Director, National Health Mission in lawmthu sawina in a khar a ni.
Chawlhhmun Veng-a Urban Primary Health Centre sakna hmunhma hi Pu David Zama leh Prof Margaret Ch. Zama ten an fapa Joshua Lalremruata(L) hriatreng nan an ram 150X60 feet an pek a ni a. A sakna senso hi National Health Mission Plan budget 2014-2015 atanga ruahman a ni.PHC hian Khum 10 , OPD 2, Pharmacy Room, Dispensary, male ward, Female ward, Labour Room, Laboratory, Office leh Nursing station te a nei a ni.
