Aizawl khawpui chhunga traffic enkawl chungchanga thil pawimawh te ngaihtuahin vawiin khan Co-ordination Committee on Traffic Managment chu Home Minister Pu R.Lalzirliana hovin Secretariat conference hall-ah an thu khawm a. Nitin lirthei lo pung zel avanga Aizawl khawpui chhung kawngpui chep chho zelin mihring leh lirtheia tlante tan harsatna a thlen mek sutkian na tura ruahmanna siam dan tur te an sawi ho a. Transport Minister Pu John Rotluangliana leh Chief Secretary Pu Lalmalsawma IAS te bakah department pawimawh hotu te an tel a ni.

Kumin Krismas leh Kumthar vuakveta kawngpui tih thawl nan December ni 23, 24 leh ni 31 ah te Bazar kawngpui lun laiah lirthei tlan phal lohna No Vehicle Zone siam leh ni se, tiin committee chuan a rel a. Kawngpui dunga parking area siam danah mumal zawka thil kalpui a nih theih nan chiang leh zawka mawhphurtu insiam fel ni se, tih a nih rualin Aizawl khawpui veng hrang hranga AMC thuneihna hnuaia Parking area siam leh a fee khawn chungchangah AMC designated area chin bak chu parking fee khawn tawh loh ni se, tih a ni a. Heng designated area huam chhunga lirthei dah phal zat pawh fel taka bituk ni se, tih a ni bawk. Lirthei neitu zawng zawng te chu garrage nei vek tura hriattir tawh angin kum 2017 ral hma ngeia siam turin committee chuan a ti a. A mawh phurtu department chu mipui hnena hriattirna thla tin vawi 2 ti chhuak thin tura tih a ni.

Taxi inthla chhawk titawp tura Aizawl Taxi Workers Union ngenna chu Committee in ngun taka an ngaihtuah hnuin tun dinhmunah chuan a ngai anga la kalpui rih ni se, an ti a. Bus service tana special permit pek chungchangah State Transport Authority in Bus len dan leh a tlan theihna tura specification te a lo ennawn dawn a ni.