No.16/2021-2022

Zoram mipui duhtakte chibai ka buk a che u,

 

Kan hriat theuh angin COVID-19 hripui chuan khawvel runin, nikum kum tir atanga vawiin ni thleng mai hian harsatna tam tak ram hrang hrangah a thlen a, khawvel kiltin mai hi a chawk buai a, keini Mizoram pawh kan bang bik lo a ni. Kum 2020 chu kum hriatreng chakawm loh takah a chantir a, Mizoramin Covid-19  positive case kan neih hmasak ber atang pawhin kum khat a lo liam ta reng mai a, keini pawhin kan beisei loh leh thleng lo se kan tih, Covid-19 vanga nunna hlu tak chan mi 11 lai mai kan nei ta hial a. He hripui avanga nunna chan ta chhungkua-te leh harsatna tawk zawng zawngte, thinlung leh tihtakzetin ka tawrhpui che u a, Zoram mipuiten kan tawngtaisak reng thin che u a ni.

 

A hmasa in tuna India ram kan dinhmun i thlirho leh ila,

INDIA: 

COVID-19  kai tawh zat                :           123,03,083

Thizat                                                 :           1,63,443

Dam tawhzat                                   :           115,23,196  

            

NORTHEAST INDIA  (Thi zat - 2313)

Assam            :           2,18,470  (1107)    Tripura                                  : 33,514   (389)

Manipur        :           29,397      (374)                  Nagaland                  : 12,345   (91)

Arunachal     :           16,845      (56)                    Meghalaya               : 14,067   (150)

Sikkim            :           6,241        (135)      

 

MIZORAM DINHMUN:

Vei hmuhchhuah tawh zat          : 4484

Dam tawh zat                                   : 4436           (98.92 %)

Vei mek                                              : 37                (0.82%)

Nunna chan                                     : 11     

 

 

India ram pawh nikum kumtawp lam atang khan kan dinhmun a ziawm viau e kan ti a, amaherawhchu March thla tir lam atang khan rin phak bakin hri kai thar kan pung ta a, tunhnaiah phei chuan kan dinhmun a chhe sawt hle a ni, nimin kha thla 6 chhunga nikhat thil thua hri kai thar tam ber tum niin mi 81,466 lai hri kai thar an awm a, mitthi pawh nitin mi 450 chuang an ni chho leh ta reng mai a ni. He second wave rawn thlentirtu  COVID-19 variant thar E484Q leh L452R te hi mithiamte chuan a hmaa COVID-19 hrileng ai khan 70% in inkaichhawn a awlsam zawk niin an  hria a;  chu mai bakah he hri hi thalaiten an kai nasa zawk hle niin hriat a  ni bawk. India ram State tam zawk chu he hri vang hian an buai leh hle tawh mai a, Madhya Pradesh-a district 4 ah lockdown an puang mek a, Maharashtra-a khawpui thenkhatah pawh zan curfew te an puang leh tawh a, Pune-ah phei chuan ni 7 chhung sakhaw biakna hmunte an khar leh ta hial a ni.

 

Pathian khawngaihna azarah he hri thar hian Mizoram a la rawn thleng rih lo niin lang mahsela  tun hnaiah  positive kan hmuhchhuahsample 200 lai phai lam laboratory lianah endik tura thawn leh mek a nih avangin kan dinhmun diktak a la hriat loh a, chutih rualin nitin deuhthaw phai lam atanga lo haw COVID-19 positive hmuhchhuah thar kan nei leh tawh a, eng chiah hi nge kan dinhmun a hriat theih tak tak rih loh a, kan mithiamte thla a muang thei rih lo a ni.

 

He hri thar ziarang diktak hi mithiamte pawhin an la hriat kim theih loh avangin Mizoram chhunga chengte pawh a hma aia kan fimkhur lehzual a ngai hle mai a. Lo thleng lo tura theihtawp chhuah a tul rualin he second wave hi hmachhawn tura kan theih ang chinah kan lo inbuatsaih a ngai tih hi kan mithiamte ngaihdan a ni a. State dangte pawhin an lo inthlahdul tawhna te sutin a hma angin khauh lehzual zawka an kal mek lai hian keini pawhin awmhmuna kan tih ve theih COVID appropriate behaviour - Mask vuah that, kut silfai uluk leh social distancing bakah sawrkarin inkaihhruaina a siam Standard Operating Procedure (SOP) te a hma aia uluk lehzuala kan zawm thar leh a tul a ni tih hre theuh ila. Kan hun tawng azirin SOP te pawh a tul chuan siamthat leh te pawh a la ngai hial maithei a ni.

 

COVID-19 vanga inkharkhip leh inkhuahkhirh khauh taka kan kalpui chhunga kan tawrhna leh hrehawmnate hre reng ila, mitin mai kan chep a, ei leh bar thlengin harsatna kan tawk a nih kha. Khatiang hun kan tawn nawn lohnan mi zawng zawngin mahni theihna zawn zawnah nasa lehzuala tan la thar theuh turin ka ngen che u a, lockdown boruak rit leh rapthlak tak tawng lo tur chuan tuna kan boruak aia chhe lehzual thleng lo tura mi zawng zawng kan tan tlan a pawimawh a ni.

 

A tul tawpah lo chuan Mizoram pawna zinchhuak rih lo turin ka han chah duh che u a, loh theih lohva zinchhuakte pawh fimkhur taka khawsa turin leh in lo kir dawna COVID-19 negative test result in nei a nih pawhin, sample test hnuah hri kai leh theih a  nih avangin   rawn fimkhur hle turin kan in chah  a ni. Chhiatni thatniah pawh SOP ngai pawimawhin a theih hram chuan loh theihloh thilah chauh kal ila, pawnlama intihhlimna leh mipui punkhawmna ang thil pawh huaihawt lo tur leh ngaihven rih lo turin kan in chah thar leh duh a.

 

Pawl 10 zirlai Board exam hmachhawn mekte tha taka exam turin  duhsakna ka hlan che u a, kum dang angin zirna hun tha pawh in nei hleithei lo hi pawi ka tihpui takzet che u a, exam tura in inbuatsaihna leh exam centre in kalna ah te fimkhur takin Education department SOP siam kha uluk takin zawm ula, zirlai sikul kal tan leh mekte pawh fimkhur turin ka chah che u a, in an chhuahsan dawn atanga an lo haw leh thlengin uluk taka lo vil turin nu leh pate ka chah che u a, hostel leh sikula zirtirtute leh hotute pawh tha thlah lova theihtawp chhuaha fimkhur chhunzawm zel turin ka ngen che u a ni.

 

Covid-19 hri danna pawh January thla tawp atang khan Mizoramah pekchhuah a ni a, hri danna lak hi mimal duhthlanna ni mahse, mi zawng zawngin kan him leh kan damtlan nan kan lak vek hi a pawimawh em em a. Mithiamten uluk taka an zirchian hnuah a him tawk tih an pawm a, keini pawhin hei hi kan pawm ve a tul a ni. Vaccine lak hian khawsik, luhai leh symptom engemaw mithenkhatah a awm thei a, hei hi chu a tur ve reng a ni tih hria ila, ngaihthat loh phah nan i hmang lovang u.

 

Mizoram hian MoHFW atangin Covishield hi State sawrkar hman turin 123730 dose kan dawng tawh a, Covid-19 vaccine kan dawn hnuhnun ber chu ni March ni 3 kha ni in dose 18440 dawn a ni. 2nd dose tur hi dahthat tur tih a nih avangin March thla chhunga 1st dose kan pek theih tur te chhutin district zawng zawngah sem darh a ni a, he mi hmang hian kum 60 chunglam te leh kum 45-59 inkar comorbidities-te chu dose 19297 pek tawh a ni. 

 

Vaccine mamawhna hi MoHFW lamah pawh vawi engnge maw zat thlen tawh a nih laiin, min pek belh hma in, March ni 23 a Review of Covid-19 vaccination Drive, Union Health Minister kaihhruaina-a meeting chuan vaccine 2nd dose tur hi dahtha lovin eligible beneficiary-te vaccine pek char char tura tih a rawn ni ta a, chu mi thu ang chuan April ni 1 atang hian 2nd dose tur a dahthat te hmang in kum 45 chunglam te chu vaccine hi pek tan an ni. Vaccine kan dawn kim vek theihnan theihtawp kan chhuah a ni tih Zoram mipuite hriatah ka han sawi lang duh a ni.

 

Vaccine a awm tak avanga kan inthlahdah erawh a thiang hauh lo a ni tih ka sawi duh a;  mipui nawlpuiin vaccine kan dawn kim hun tur a la hriat loh a, chutih rualin khawvel leh India ram bakah Mizoram ngeiah pawh hri kai kan pung leh tan a, zankhat thilthu ah boruak danglam thut thei a la ni reng a ni tih hria in, kan insawithaih a lam ni lo se, mipuite thlabar leh chi-ai si lovin, a hmaa ka sawi tawh ang khan khawvelin COVID-19 laka kan invenna atana a pawm, kan hman mek, Kut silte, Mask vuah/hman leh midang nena inhlat a awm (Social distancing)  hi uluk taka kan kalpui reng a la pawimawh a; kut  thinga in chibai phei chu bansan rih zel a tul a  ni. Mimal tinin mawhphurhna kan la nei theuh tih hria ila, keimahni chuan kan hlau lo a nih pawhin, kan chheh vela cheng kum upate, natna benvawn neite leh naupangte hre reng chungin leh midangte himna tur ngaihtuahin fimkhur takin i awm chhunzawm zel ang u.

 

Ramchhung mipui zawng zawngte, mahni hriselna ngai pawimawh a, Sawrkar hmalakna thlawp theuh turin ka sawm nawn leh che u a, kan hmalakna ah ngaihtuah kim a har thin hle mai a, thahnemngaih luatah rilru inhliam palh te pawh thil awmthei a ni. Chutiang kan lo awm a nih chuan kan tihfuh tawklohna ah in mi ngaihdamna leh hriatthiamna ka dil a, theihtawp chhuaha tanho puiah ka sawm bawk che u a ni.

 

COVID-19 dona kawmnga a tir atanga tha thlah hauh lova sawrkar min finchhuaha min tawiawmtute -kohhranho, tlawmngai pawl hrang hrang leh Local Task Force te chungah thinlun g taka lawmthu sawi chungin kan puan ven sawichhin leh a ngai a nih tih hria a, tlawmngaihna nen kan hnam leh kan ram kan him nan tan lo la leh tang tang turin ka ngen bawk che u a ni.

 

Abik takin COVID-19 dona a kan tha tichaktu, ral hmatawnga chhunzan zawm duty thin Task Force te lawmthu ka hrilh nawn leh che u a, kan hmalam hun a hriat loh avang hian eng boruak pawh hmachhawn thei tura inbuatsaih a, tan la thar leh turin ka ngen tak meuh che u a, in kutah kan him damna hi thui takin a innghat a ni.

 

A tawp berah chuan COVID-19 dona kawnga sulsutu zawng zawngte a te ber atanga a lian ber thlengin i tawngtaisak nawn fo ila, kan tawngtaina chhang thintu Pathian chungah lawmthu i sawi mawlh mawlh bawk ang u. Hei leh chen A kut chaka min hruai a, ami te tawngtaina ngaithlatu leh min hualhimtu kan Pathian Engkimtitheia hnenah hian a khawngaihna leh kaihhruaina i dil chhunzawm zel ang u.