No.7341/2020-2021
Thian duhtakte u,
Republic Day vawi sawmsarih pahnihna a lo thlen hian state chhung leh pawna cheng Mizoram mipui zawng zawng duhsakna chibai ka buk a che u. COVID-19 hripui laka kan him theihna tura duan inkaihhruaina zawm a ngai chungin India ram dung leh vanga hnam hrang hrang leh tawng hrang hrang hmangtuten he ni ropui takah hian India hnam puanzar hnuaiah kan inpumkhatna a lo parchhuak leh ta.
Keini India ram leh India mipuite hmalam pana kan pen mek lai hian keini leh kan fate chauh ni lo mitin tana hmalam hun muanawm leh duhawm a lo thlen theih nan ram hrang hranga chengte nena pheikhai rual taka kal hi kan duhdan a ni. Ram chhung kil tin hmasawnna turin sawrkar chuan hna a thawk a. COVID-19 hripui leng kan hma chhawn meka India ram tanrualna hi khawvel hmung dangte tan pawha zir tham, keini tan mahni intodelh tulzia min zirtirtu a ni.
Chutiang bawkin Mizoram State Sawrkar hmalakna leh tha thlah lova thlawp tlattu kohhran leh tlawmngai pawl te, mipui mimir leh ral hmatawnga bei tura penchhuakte inpekna avangin kan state chhungah hripui leng a ziaawm hle a. Ram chhung hmun dangte nena khaikhinin coronavirus avanga damlo an tlem a, he natna avanga thi tlem berna state kan ni. Hripui vanga hun harsa leh khirh kan hmachhawn dan hi a chhuanawm a. Mizoram sawrkar leh mipui te hnenah lawmthu ka sawi a ni.
1. Ram hmasawn zelna turin venhimna tha taka kan kalpui a tul a. Chu chu hriain State Sawrkar pawhin state chhunga venhimna tichak leh zual turin hak a zauh zel a. Dan leh thupek kenkawhna kawngah harsatna awm lovin ram a ralmuang hle a ni. COVID-19 hripui len avanga inkharkhip kenkawh a nih atang khan Mizoram Police mi leh sa 3000 vel zet duty turin tirhchhuah an ni a. Ram dang leh state dangte nena kan inrina luhka khar tur te, COVID-19 vei mekten midang an kai chhawn theih awm (contact) chhui tur te, inkhunghranna quarantine facility a venhimna hna thawk tur te, COVID-19 kaihhnawiha sawrkar dan leh thupek kengkawh tur tein a tul dan ang zela tirhchhuah an ni. Mamit District Thinghlun khua leh Kolasib District Vairengte leh Saihapui ‘V’-a Assam State nen kan inrina hmunah innghirnghona a awm avangin October 2020 chhung khan tum engemawzat Mizoram Police te hi tirhchhuah an ni a. Rang taka an chetchhuah nghal avangin buaina punlun tur hmeh mih a ni. Heng ramriah te hian buaina a awm lohna turin thlithlai reng a la ni bawk.
November ni 27, 2020 khan Cyber Crime Police Station chu hawn a ni a, Cyber Forensic Lab-cum-Training Centre chu Cyber Crime Prevention against Women and Children Project, Digital Data Communication kaltlangin District pariatah din a ni a, wireless hmanga inbiakpawhna tichangtlung turin Radio-over-Internet Protocol System chu District 5 ah dah thar a ni. Kum kalta chhung khan silai 37, silai mu 7894 leh silai magazine 29 man a ni a, dan phalloh ralthuam kawltu mi 9 an man bawk. Ram pawn atanga bungraw tawlhruk ven nan Tuisenphai, Khawzawlah Police Checkgate thar siam a ni a, November ni 11, 2020 atang khan hman tan a ni. Drugs leh ruihtheihthil cheng vaibelchhe 14.79 hu zet leh zu cheng nuai 18.55 man hu man a ni bawk.
Mizorama a vawikhatna ni turin police constable 161 te chu a rualin honorary Head Constable-ah an kai sang a. Police Commemoration Day, 2020 khan Mizoram Police unit tin ten a thlawna thisen pek runpui an buatsaih a ni.
2. Fire & Emergency Services Department chuan High Pressure Pump Fire Tender 3 leina tur sum cheng nuai 140 chu State Disaster Management Authority atangin an dawng a. Kangthelhtu pawlte indaihlohna phuhru tura lak Fire Volunteer 15 te chu March 31, 2021 thlenga chhawr chhunzawm phalsak an ni. Covid Care Centre panga (5), quarantine centre 23 leh hospital 26-ah kangmei a chhuah loh nan Fire Inspection neih a ni a. Nikum chhung khan inkang avangin Domestic Fire Call vawi 13, ram kang avanga Forest fire Call vawi 50 leh emergency call dang vawi 13 an dawn te rang takin an bawhzui a. Hmun hrang hranga in leh ram kang an thelh avang hian cheng vaibelchhe 64.9 man hu bungrua an humhim a ni.
3. Mizoram Home Guards chuan Home Guard 135 leh Transport Department hnuaia Enforcement Staff mi 16 te tan CTI, Sesawngah training an buatsaih a. COVID-19 hripui leng do turin Home Guard Volunteer mi 20 an penchhuak a. November 2020 thleng khan kum 2020-2021 sawrkar kum atana an Revenue Receipt dawn zat chu Rs. 183,05,735 a ni.
4. Sainik Welfare & Resettlement Department bultumin December ni 7, 2020 khan Armed Forces Flag Day hman a ni a. COVID-19 hripui leng avangin mipui mimir tibuai lovin sawrkar official te leh department hrang hrangah he ni puala sum thawhchhuah hna hi an thawk a ni. Heng an sum hmuh tlingkhawm atang hian Ex-servicemen/sipai nupui hmeithai mi 8 hnenah Rs.24,000 theuh an sem. Veteran mi 40 leh hmeithai 408 hnenah sumfai Rs. 82,08,000 sem ni a. Khuarel chhiatna avanga harsatna tawk Ex-Servicemen/hmeithai 2 hnenah tanpuina sum Rs.30,000 pek an ni a, 2nd Assam disband personnel mi 8 hnenah Rs.1,72,800 sem niin ex-serviceman damlo mi 1 hnenah Rs.5000 pek a ni. ‘Vijay Diwas’ chu War Memorial, Treasury Square, Aizawlah December ni 16, 2020 khan Ex-Servicemen ten an hmang.
5. Lai Autonomous District Council inthlanpui vawi 11-na chu December 4, 2020 khan hlawhtling taka neih a ni a, Chief Executive Member leh Executive Member tharte ruatna notification tichhuah a ni bawk. Ministry of Minority Affairs chuan District Council & Minority Affairs Department hnuaia thawh tur Lunglei leh Lawngtlaia Astro Football Turf; Lunglei District chhungah Volleyball Court 3, Lawngtlai District-ah 6 leh Mamit District ah 19; Lunglei District-ah Basketball Court 4, Lawngtlai District-ah 5 leh Mamit District-ah 19 bakah Lunglei District-a Fustal Ground 2 sakna tur leh Hockey Ground-a phullem phahna tur project kalpui nan cheng nuai 7368.55 a pawmpui a. Lai Autonomous District Council tan grant-in-aid cheng nuai 277.42, Mara Autonomous District Council tan cheng nuai 248.85 leh Chakma Autonomous District tan cheng nuai 131.62 pek chhuah a ni. Village Council hrang hrang tan LADC chhungah grant-in-aid cheng nuai 60.56 pek chhuah a ni a, MADC chhungah cheng nuai 59.18, CADC chhungah cheng nuai 37.03 pek chhuah a ni bawk. LADC huam chhunga school building sak nan a thawhthumna atan cheng nuai 185.17 pek chhuah a ni.
6. COVID-19 hripuiin tourism-a sumdawnna a tithuanawp nasa hle a. Tourism Department in April-November, 2020 chhunga revenue an hailuh zat chu cheng nuai 23.96 a ni a, khualzin mi 5407 in Mizoram an tlawh a ni. Hun harsa leh khuahkhirhna khauh tak kalpui a ni chung hian COVID-19 inkaihhruaina zawm chungin an department hian project engemawzat an thawk thei a ni.
Sawrkar Laipui Swadesh Darshan Scheme hnuaia sak Thenzawl Golf Resort chu August ni 4, 2020 khan Union Minister of State i/c Tourism, Pu Prahlad Singh Patel chuan a hawng a. Mizoramah online kaltlanga kutpui buatsaih hmasa ber ni turin Anthurium Festival 2020 chu November ni 9 leh ni 10, 2020 khan hlawhtling taka neih a ni a, December ni 21 &22 khan online vekin Winter Festival 2020 neih a ni.
Tourism Department hmalakna chhinchhiah tlak te zinga chhiar tel turin kum 2019-2020 chhung khan ‘Mizoram (Registration of Tourist Trade) Act 2020’ siam a ni a, March 24 khan notification tihchhuah a ni. Kum 2020-2021 chhung vek hian ‘Mizoram Responsible Tourism Policy, 2020’ leh ‘Guidelines for Recognition of Tourism Providers Association, Tour Operators, Dormitories and Hostels, Tour Guides, Caravan Tourism, Homestays and Ticketing Sales/Travel Agents’ hman theih tura tihchhuah a ni bawk. December ni 29, 2020 khan Cabinet Meeting chuan Mizorama a vawikhatna ni turin ‘The Mizoram (Aero Sports) Rules, 2020’ leh ‘The Mizoram (River Rafting) Rules, 2020’ chu a pawm a, hei hi Mizorama adventure sports tan chuan hmasawnna rahbi pawimawh tak a ni. DoNER Ministry chuan cheng nuai 560 chu NESIDS Scheme hnuaiah Reieka tourism hmasawnna hna thawh nan a pe a, hnathawh bul tanna lungphum chu 7.2.2020 khan phum a ni.
7. Ram hmasawn nan inkalpawhna kawng tha neih a pawimawh em avangin State Sawrkar chuan kawng siam leh enkawl hna chu a ngaih pawimawh ber te zinga mi a ni a. Public Works Department chuan hna thawh theih hun chhungin formation cutting 305.84kms, black top 218.18 kms leh kawngpui cheithat hna 98.02 kms a thawk zo hman a. COVID-19 hripui lengin nasa takin hna tikhailak mahse State PWD chuan Mizoram chhunga kawngpui pawimawh te a enkawl tha hle a, kan state kawngpui te a tha thawkhat hle a ni.
Central sawrkar, World Bank, Asian Development Bank, NABARD leh SEDP atanga sum hmuh hmangin thingtlang khaw tlawhpawhtu district kawngpui 82 thawm that a ni a. Serchhip-Thenzawl-Buarpui, Multi Modal Transport Transit Project, Tlabung-Kawrpuichhuah, Chhumkhum-Chawngte, Champhai-Zokhawthar leh Lengte-Mamit-Langkaih kawngpui sial hna thawh mek chu thawh zawh thuai beisei a ni. Chhimtuipui leh Tiau lui kaltlanga Myanmar luhna tur kawngpui sial nan sum sanction nghah mek a ni a. Heng kawngpui sial tur te hi Lungbun-Chhimtuipui, Hnahlan-Tiaului, Pangkhua-Saisihchhuah leh Zote-Tiau kawngpui te an ni.
Aizawla kawngpui tawt lutuk tihziaawm nan Bawngkawn leh Vaivakawn inkara kawng chhawng siam theih a ni dawn em tih zirchianna kalpui tan a ni tawh. Lei (bridge) 4 - Serluia Bilkhawthlir-Saiphaikawng ah Pre-stressed concrete T-Beam Girder Bridge, Tlawng luia Thenzawl-Buarpui kawng D-Bow Steel Truss Girder Bridge, Chawmkaiah Mat luia Galvanised Bailey Bridge leh Bairabi-Kawnpui TDR EW 70R Bailey Bridge te siam zawh a ni. Sawrkar quarters thar leh public building engemaw zat sak a ni a, chung zingah chuan Judicial Quarters District 8 a sak te, Civil SDO Quarters leh Office 4, District Treasury Office leh Quarters 2, khum 50 awm theihna Lawngtlai Civil Hospital, khum 100 awm theihna Siaha Civil Hospital leh Serchhip ARCS Office Building te a tel a ni. Mizoram Assembly House-ah Digital Congress Network System bun thar a ni a, Lengpui Airport cheithat hna thawh mek a ni bawk.
8. Kum kalta chhung khan Transport Department chuan chhiah cheng nuai 4952 a lakhawm a. Lirthei 31,755 register niin driving license thar 13,813 pek chhuah a ni. Tun dinhmunah bus 36 an service tir thei a, District 6- Siaha, Champhai, Kolasib, Serchhip, Mamit leh Lawngtlaiah Pollution Testing Centre thar dah a ni. Tlawng lui chu zin veivahna atana hman tangkai dan tur ngaihtuahin state chhunga lui panga zirchian a ni a, Ministry of Shipping ah rawtna thehluh a ni. Khawthlangtuipui (Karnaphuli) chu zin veivahna atana siam turin cheng nuai 2292.94 senna tur DPR pawh pawm a ni tawh. He department hmalak mekna langsar zual dang te chu Hlimena Automated Inspection & Certification Centre siam te, Govt. Mizo High School Aizawla Multi-level Parking & Multipurpose Hall sak bakah Tlabung, Vairengte leh Serchhipa Commercial Vehicle Terminal sak te a ni.
9. Kum tina an tih thin dan angin Art & Culture Department chuan March ni 5 & 6, 2020 khan Aizawl AR Ground ah Chapchar Kut hlawhtling takin a buatsaih a. Ministry of Culture, Regional Virtual Cultural programe chu NEZCC nen tangkawpin online-a buatsaih a ni bawk. Technical Committee on Geographical Indication tichhuah (publish) turin Mizo hnam incheina puan chi 5- puanchei, ngotekherh, pawndum, tawlhlohpuan leh hmaram te chu a tah leh hman dan tur kaihhruaina siam fel a ni a. Mizoram State Archives digital-a dahthat hna pawh chawl lova thawh mek a ni. Lunglei ah Regional Museum, Lawngtlaiah Lai Cultural Centre-cum-Auditoriuam leh Falkawna Mizo Typical Village-a VIP lounge sak hna pawh chak taka kalpui mek a ni.
10. Women & Child Development Department chuan Poshan Abhiyan hnuaiah hmalakna thar, heng - 1) Nutri Garden Innovation Plan - Anganwadi Centre zawng zawnga thei leh thlai chin te; 2) Bye Bye Anaemia - Anganwadi Centre tina hmeichhia leh naupangte thisen (HB level) endikna hmanraw sem; 3) Operation SAM - naupang eitur tha hmu phalo (malnourish) te zawn chhuah leh tanpui te chu tluang takin an kalpui. Tun dinhmunah Mizoram pumah Anganwadi Centre 2244 bakah RD Block 26 leh Aizawl Urban pakhatah ICDS Project 27 an kalpui mek a. ICDS hnuaiah hian naupang 1,08,751 leh nu naupawm te leh raipuar 22,010 leh tleirawl 1300 in an chhawr tangkai mek a ni. Pradhan Mantri Matru Vandana Yojana (PMMVY) chu beneficiary 22,161 in an chhawr tangkai mek a, he hmalakna hnuaiah hian Rs.9,67,48,000 sen ral tawh a ni. Mizoram chu rampumah PMMVY kalpui tha ber palina a ni a, hmarchhak state te zingah pakhatna dinhmun a hauh mek a ni. Integrated Child Protection Services hnuaiah he department hian Childrens’ Home 35, observation home 8, special home 2 leh adoption centre 7 a enkawl mek a ni.
State Commission for Women chuan hmeichhe laka hleilenna tih rem te, hmeichhiate humhim kawngah leh mipa leh hmeichhe dinhmun intluktlanna lamhawiin hma a la mek a, hmeichhe police volunteer 299 a ruai a ni. Hmeichhia te hmasawnna tur scheme State Resource Centre for Women, Mahila Shakti Kendra, One-Stop Centre, Swadhar Greh, Ujjawala leh 24x7 Universal Women Helpline te chu district hrang hrangah a kalpui mek a ni.
11. NABARD RIDF Scheme hnuaiah Land Resources, Soil & Water Conservation Department chuan Rengdil khaw ram 200Ha a zauah leh Kanghmun rama 20 Ha a zauah thelret hmun a siam a. Heng hmalakna pahnih atana sum senso chu cheng nuai 108.39 a ni. District hrang hranga thelret huan siama eizawng te hnenah Rubber Roller Machine za (100) sem a ni a. West Serzawl atanga Saiphai inkar kawng (link road) 8 km a thui chu cheng nuai 95.185 senga siam a ni.
12. Public Health Engineering Department chuan Jal Jeevan Mission hnuaiah thingtlanga in (rural household) 1,26,827 awm zat atanga 40479 chu tui connection Functional House Tap Connection (FHTC) an pe fel tawh a. December 2020 thleng khan thingtlanga chhungkaw 15,400 hnenah FHTC an pe a, thingtlang khaw 114 zet an tuam chhuak tawh a ni. Swachh Bharat Mission (Gramin) hnuaiah Aibawk Rural RD Block ah Plastic Waste Management Unit pakhat bun a ni a, district dang 4 ah unit 4 dang bun leh mek a ni. Solar Pumping Scheme huam telin Water Supply Scheme 8 siam zawh a ni a, NABARD hnuaiah Water Supply Scheme 14 an kalpui mek a ni.
NLCPR hnuaiah project 2 - Sainik School, Chhingchhipa tui connection pek leh Keilungliaha Dam Reservoir & Development of Recreation Centre siam chu thawh mek a ni a. Aizawl khawpui tan Gravity Water Supply Scheme pawh thawh mek a ni. Biate Water Supply Scheme bakah AMRUT hnuaiah project 3 kalpui mek a ni bawk.
December 30, 2020 thleng khan Mizoram chhunga khawpui hrang hrangah PHE hian tui connection 1,04,050 an pe chhuak tawh a, thingtlang khuaa in 24,775 ah connection an pe tawh bawk. October, 2020 thleng khan PHE Department chuan revenue cheng nuai 3050.7 an hmu a ni.
13. Information & Communication Technology Department chuan internet leh mobile connection tha leh chak a awm theih nan hma a la a. Aizawl khawpui chhunga mobile tower thar siam belh a nih theih nan Aizawl Municipal Corporation Building Regulation siamthat a ni a. Telecom Operators te dawrin tower awm sa bak hmun 759 bun belh tura ngen an ni. Mizoram Telecom Infrastructure Policy, 2020 chu December, 2020 khan notify a ni ta bawk. Gigabit Passive Optical Network Technology hmangin Mizoram Secretariat, MINECO-ah internet service pek an ni a. Thingtlang khaw kilkhawr zawk te chhawr tangkai theih turin District tinah 100mbps internet bandwith pekchhuah theuh an ni. Very Small Aperture Terminal (VSAT) 501 zet thingtlang khua kilkhawr zawk khaw engemawzatah bun a ni tawh bawk.
ICT Department chuan Govt of Mizoram Content Management System chu sawrkar office leh pawl 256 hman theih turin an siam a. awlsam zawka Inner Line Permit (ILP) pekchhuahna tur online ILP Software leh Mizoram Public Service Commission (MPSC)-ah application thehluha, admit card awlsam taka lakchhuah theihna tur Online Application System an duang a. mCOVID-19 application chu Mizoram State e-Governance Society in a siam a, hemi kaltlang hian state pawn atanga Mizorama lo lut tur ten mPASS an dil thei a ni. He app hmang vek hian Traffic, Home Quarantine, Quarantine Fee Exemption leh a dangte a dil theih bawk. Mizorama IT Education hmasawnna turin school 71 ah computer set 7 zel ICT Department hian sawrkar kum kalta chhung khan a sem a ni.
14. Rural Development Department chuan thingtlang khaw tih hmasawnna turin hmasawnna ruhrel din kawngah leh eizawnna kawng kawhhmuh turin hna tluang takin a thawk zel a. MGNREGA hnuaiah chhungkaw 212,893 tan sawrkar kum kal mek chhung khan job card pek chhuah a ni a, ni 96 inhlawhna siamsak an ni. Hna thawh tur bituk 21,739 atangin 18,873 thawh zawh tawh a ni a. Natural Resource Management hnuaiah hna 13,784, Individual Land ah hna 14,858 leh Rural Infrastructure ah hna 3097 thawh a ni a. April atanga December 2020 chhung khan RD Block 26-ah thingtlang khuaa chhungkaw 8585 te chu Self Help Group hlawm 1094 ah siam an ni a, an bultanna turin cheng nuai 800.85 pek an ni.
Thingtlang khaw kilkhawr zawkah financial service siam dan tur ruahman a ni a. SHG 1751 te credit link chu December, 2020 khan cheng vaibelchhe 30.45 a tling tawh a. Banking Correspondent Agent atan SHG member 65 rawih an ni a. December, 2020 khan transaction vawi 21365 tih a ni a, sum chevel hi cheng vaibelchhe 12.14 a tling a ni. Mahila Kisan Shashaktikaran Pariyojna scheme hmangin December 2020 thleng khan lo neiha eizawng hmeichhe 5000 te tuam hman an ni a. Community Managed Tool Bank 100 chu RD Block 10 ah siam niin loneitute tan man tlawmtea lo (farm)-a hman tur khawl leh hmanraw dang hawh theihna tur remchang siamsak an ni bawk.
Mizoram State Rural Livelihood Mission hnuaiah thingtlang thalai mi 748 te chu training pek an ni a, an zinga 371 te chu Deen Dayal Upadhyaya Grameen Yojana kaltlangin hna pek an ni. Ministry of Home Affairs inkaihhruaina thar angin khaw 49 te chu BADP hmalakna turin lakluh an ni bawk.
Pradhan Mantri Krishi Sinchayee Yojana hnuaiah ruahtui dahkhawlna 2818 siam a ni a, ram bua 1198.416 Ha zeta zau chu thlai chin theihna tura siamthat niin hei hi loneitu mi 6037 ten an chhawr thei dawn a ni. State Institute for Rural Development & Panchayati Raj chuan mi 3233 hnenah training chi hrang hrang 78 an buatsaih a, heng zingah hian Village Council thlan tharte pawh an tel. Shyama Prasad Mukherji Rurban Mission hnuaiah hna engemawzat thawh a ni a, chung zinga langsar zual te chu Maubuanga Orchid Centre te, Mini-Agro Processing Centre te, ramhmul damdawi aromatic plants chinna tur te, solar street light te, agriculture link road te, ke a kalna footpath te bakah cluster farming te a ni.
15. Department of Science & Technology hmalakna hnuaiah tualchher thiamna nei leh technical lam zirlai ten an hman tangkai tur Innovation facility Centre chu MINECO, Aizawl ah din niin, December ni 9, 2020 khan tlangzarh a ni a. He centre-ah hian thilsiam chhuahna khawl lian tak tak hman mai theih tur te chhawpchhuah niin, thilsiamchhuak tute Intellectual Property Rights an hum theihna tura hmalakna te he project hian a huam tel a ni. Nikum July thla khan Lunglei Zohnuaiah Science Centre leh Digital Planetarium sakna tur lungphum phum a ni bawk.
16. November ni 25, 2020 khan Animal Husbandary & Veterinary Department kaltlangin SEDP hnuaiah district pariata vawk leh ar vulhtu 1,020 ten an chhawr tangkai tur SEDP pilot project tlangzarh a ni a. Hemi hnuaiah hian beneficiary 20 tan Piglet Multiplication Unit-te, bfarmer 200 tan Piggery fattener Unit te, beneficiary 400 tan backyard poultry farming leh Zokhawthar, Champhai district-a Animal Quarantine Camp siam te a tel a ni.
Veterinary Health Care service tha zawk neih nan Siaha, Lawngtlai, Lunglei, Champhai, Serchhip, Kolasib leh Mamit ah District Veterinary Hosipital sak a ni a. District thar 3 telin district paruka Veterinary Dispensary chu District Veterinary Hospital-ah tihlen a ni a. Rural Animal Health Centre 33 pawh Veterinary Dispensary ah tihlen a ni bawk. National Animal Disease Control Programme hnuaia FMD leh Brucellosis natna hri danna pek leh ran chhinchhhiahna (ear tagging) hmalakna chu chak taka kalpui mek a ni.
17. Sericulture Department chu tlangram lo neih thlak a, kuthnathawktute tana eizawnna hnar tha tak a ni chho zel a. Tun dinhmunah 4331.88 kilometer bial a zau plantation area awmin, Mulberry, Muga, Eri leh Oak Tasar te chin a ni a. Kum 2020-2021 chhung (November 2020 thlenga) Raw Silk chi hrang hrang tharchhhuah belhkhawm chu metric ton 25.394 a ni.
18. COVID-19 hrileng avang sawrkar hmalakna dang tam tak ang bawkin kumin Fisheries Department hmalakna pawh a thuanawp phah a. Sangha chi indaihlohna a thlen a. State sawrkar chuan sangha chingtute harsatna tiziaawm turin 'common carp' sangha chi nuai 50.12 chu a man chanve a tumsak bakah 'major carp' sangha chi nuai 20 chu tun sawrkar kum tawp hma hian sem tum a ni bawk a. Sangha chaw mamawhna phuhruk turin quintal 6265 chu a man zatve in a hralhchhuak bawk. Pradhan Mantri MatsyaSampada Yojana hnuaiah sangha tui siamna hmunpui pali bakah sangha dil leh dah thatna tur old storage leh adangte siam belh a ni dawn a. RKVY scheme hnuaiah mi 300 hnenah training pek a ni dawn bawk.
19. Legal Metrology Department chuan sumdawng, company, sawrkar department leh adang ten bukna dik an hman leh hmanloh hna thawkin, kumin chhung khan Packaged Commodities & Contraventions endikna vawi 226 an nei tawh a. LPG phurtu truck 1062 leh Cement leh Iron Rod zuartu 135 te an check bawk. Legal Metrology Act & Rules hnuaiah dan bawhchhia mi 27 man an ni. Stamping Fees atangin state sum bawmah Rs. 5,64,965 an chhunglut. Saitual leh Khawzawl ah Laboratory siam turin hma lak mek a ni a, sawrkar laipui atangin hemi atan hian sum hmuh a ni tawh a ni.
20. School Education Department chuan zirna tha leh changtlung, khawvel pawl pha kan neih theih nan kawng hrang hranga hma la in theihtawp an chhuah reng a. Kum kalta khan CSS hnuaiah Hindi zirtirtu 541 lak a ni a, tunhnai maiah khan Mamit district a Silsury khuaah Secondary School din a ni a, Arts subject zir theihna tur Higher Secondary School pali – Sialsuk, East Phaileng, Sangau leh Phuaibuangahte kan din a. Kawlbemah leh Vairengte-ah Science subject zirna tur Higher Secondary School din a ni bawk. Tunah hian zirna in 53 kan sa tha mek a, hetih rual hian laboratory 12 kan sak mek bakah school 107 thawm that hna kan thawk mek bawk a. Lungleia Teacher’s Training Complex Rs. Nuai 1040 senga sak pawh zawhfel tep a ni tawh bawk a ni.
Tun dinhmunah hian Mizoramah Primary School 1414 leh Upper Primary School 1086 kan nei a, Primary School-ah hian zirlai naupang 91,859 awmin Upper Primary School-ah zirlai 41,949 an awm a ni. School 46-ah Vocational Education kalpui a ni a, Adult Education programme “Padna Likhna Abhiyan” kaltlangin mi 30,000 tal ziak leh chhiar thiam tir tura hmalak mek a ni.
COVID-19 hripui leng avanga zirna inhawn a theih tak lovah khan School Education department hnuaia Media Cell chuan SCERT nena tangrualin online class a kalpui a. Kum kalta April thla atang khan DDK, Aizawl, LPS leh Zonet kaltlangin zirlai naupangte hnenah zirtirna kalpui a ni bawk a ni.
21. June ni 4, 2020 khan Mizoramah Sports chu industry ah puan a ni a, India ramah hetianga tih nachang hre hmasa ber kan ni. Kan State chhunga infiamna ruhrel tihchangtlun nan sawrkar laipui chuan “Pradhan Mantra Jan VikasKaryakam” hnuaiah project engemawzat Rs. Nuai 22,873 man hu min pawm saka, hemi atang hian Residential Sports School panga- Mamit, Kawrthah, Lawngtlai, Lunglei leh West Phailenga sakna tur leh Zawlnuam, Chawngte, West Phaileng leh Bungtlanga Community Services Centre sakna tur first installment Rs. 10192.13 hmuh tawh a ni bawk. Football khelhna tur phullem pawh Chawngte leh Hachhek-ah siam tum mek a ni a, Mamit-ah District Sports Complex din tura hmalak mek a ni bawk. “Khelo India Scheme” hnuaiah Armed Veng, Mualluingthu leh Lengpuiah football khelhna tur phullem kan phah dawn a, Muallungthu-ah Hockey khelhna tur hmun kan siam bawk ang. Ministry of Minority Affairs kaltlangin Mamit leh Lawngtlaiah SadbhavMandap kan sa tan mek bawk a ni.
Sawrkar Flagship programme SEDP hnuaiah 1st Bn MAP Ground, Armed Veng leh Mamit Indoor Stadium sakna tur Rs. Nuai 887.50 budget-ah dah a ni a. Mamit Indoor Stadium sak mek chhunzawmna turin Special Central Assistance hnuaiah Rs. Nuai 788 hmuh a ni bawk. Mizoram chu sawrkar laipuiin “Khelo India State Centre of Excellence” dinna tur State 8 a thlan hmasak zingah kan tel a, a bul tan nan Boxing, Judo lehWeighlifting-ah hma kan la ang.
22. Nikum September ni 2, 2020 khan Mizoram Legislative Assembly Sixth Session chuan The “ Mizoram State Sports Council (Amendment) Bill, 2020” chu a pawm a, hei hian Mizoram State Sports Council chu Mizoram chhunga sports kaihhnawiha hmasawnna hnathawh (construction) reng rengah chuan technical lamah thuneihna a pe a ni. An hmalakna hnuaiah Saitualah football khelhna tur phullem kan phah zo tawh a, Lungleiah Zauva Sailo Memorial Tennis Centre leh Sihphirah Multipurpose Indoor Hall sak zawh tawh a ni bawk. Tun thlatir January ni 7 khan Rs. Vaibelchhe 4.50 senga sak tur Aizawl Indoor Stadium lungphum chu phum a ni bawk.
23. Higher & Technical Education department chuan kum kalta September ni 29 khan State Medical and Technical Entrance Examination hlawhtling takin a buatsaih a. Tunah hian College building 19 sak mek a ni a, Govt. Aizawl North College Women’s Hostel leh Govt. Mamit College tui dahkhawlna tur sak mek a ni bawk.
24. Labour, Employment, Skill Development & Entrepreneurship Department (LESDE) hnuaia din ‘Mizoram Building & Other Construction Workers Welfare Board’ kaltlangin April-November 2020 chhung khan hna rum thawka eizawng mi 13,102 ziahluh thar a ni a. Kum kalta chhung khan he Board kaltlang hian workers’ welfare schemes hrang hrang hnuaiah tanpuina Rs.3,48,33,000 pekchhuah a ni. COVID-19 hripui leng vanga hnathawk theia kan awm loh avangin heng registered worker te hnenah hian tanpuina Rs.3000/- theuh pek an ni a, mi 51,451 hnenah thlakhat chhung free ration pek an ni bawk. Mizoram Building & Other Construction Workers Welfare Board chuan hemi atan hian Rs.21,84,20,820/- a seng a ni.
Tun dinhmunah LESDE hian Industrial Training Institute 3 – Aizawl, Lunglei leh Siaha ah tluang takin a kalpui mek a. Pradhan Mantri Kaushal Vikas Yojana (PMKVY) hnuaiah training tur mi 13,650 inziaklutin an zinga 5,388 hian hna tha tak an hmu tawh nghe nghe a ni.
Mizoram Youth Commission (MYC) chuan Aizawl leh Lungleiah Coaching Centre hlawhtling takin a kalpui mek a, heng Coaching Centre atanga zirchhuak thalai 150 chuan sawrkar leh private company hnuaiah hna tha tak tak an hmu tawh a ni. Thalai lehkhathiam tumruhte fuih nan leh chawh phur nan MYC chuan Central leh State Competitive Examination hrang hranga hlawhtlingte tan lawmman tha tak ‘SEDP Incentive Cash Award Scheme’ a ruahman bawk a ni.
25. Cooperation department chuan Pradhan Mantri Kisan Samman Ndhi scheme hnuaia beneficiary 255 account-ah cheng nuai 15.72 thunsakin, Pradhan Mantri Jan Dhan Yojana hnuaiah beneficiary 5,559 hnenah Rs. 27,79,500 an sem bawk a ni.
26. Health & Family Welfare Department chuan COVID-19 hrileng karah state mipui hriselna leh himna atan theihtawp can chhuah a. Home department leh Disaster Management & Rehabilitation Department nen tangkawpin hripui leng do hna hi thawkin, hemi avang hian Mizoram chuan he hri avanga nunna chan nei tlem ber state kan nih phah a. COVID-19 hmatawngah AYUSH doctor 70 te chu inpe in ramri ah te, quarantine facility hrang hrangah leh hri vei enkawlna hmunah te bakah sample lakna hmunah te an duty a ni.
Mizoram State Health Care Scheme hnuaiah chhungkua 50,892 inziaklut tawhin, damlo 11,245 ten chhhawr tangkaiin health care sum Rs. 33,00,85,734 pekchhuah a ni tawh. Ayush Bharat-Pradhan Mantri Jan Arogya Yojana hnuaiah chhungkua 1,95,268 inziaklutin, damlo 1,482 in chhawr tangkai tawhin inenkawlna sum Rs. 15,52,92,468 pekchhuah a ni tawh. Mizoramah chhungkua nuai khat zelah hospital a enkawl 24,398 an awm a, heihi ram pum hospital admission zat let a ni. Food & Drugs Administration Wing chuan damdawi zawrhna dawr 766 endikin, Rs.4,83,845 revenue ah an lalut a ni.
National Health Mission hnuaia Rs. 16.26 hmuh hmangin khum 50 dahna tur Tertiary Care Cancer Centre chu sak mek a ni a. NHM hnuaiah vek hian Sub-centre 108 leh Urban & Rural Primary Health Centre 64 chu Health & Wellness Centre ah hlankai a ni. State mipui hri danna pe tura hmalakna kal mekah Immunization Coverage chu 88% a ni tawh. National Programme for Control of Blindness & Visual Impairment hnuaiah November 2020 thleng khan cataract surgery 771 tih niin, zirlai naupangte hnenah a thlawnin tarmit 681 sem a ni bawk. Tlawmngaite atana thisen an pek chu 91.44% a ni.
27. Election department-in June ni 19, 2020 khan ramchhung hmun dang ang bawkin hlawhtling takin Council of States inthlan a buatsaih a, tunah hian district thar pathum – Khawzawl, hnahthial leh Saitual Deputy Commissioner-te chu District Election Officer atan ruat fel an ni tawh bawk a ni. Printing & Stationery department chuan kumm kalta November thla thleng khan revenue Rs. 90,68,369 an hmu tawh bawk a ni.
28. Sawrkar kum kal lai mekah November, 2020 thleng khan land Revenue & Settlement Department chuan House Pass 302, LSC (chenna in atan) 1006, Land Lease Certificate 102 leh LSC (agricultural land) 10 pe chhuakin, thubuai 3019 chinfel a ni bawk. November 2020 thleng khan revenue Rs. nuai 1095.31 leh Registration Fee & Stamp Duty Rs. nuai 1884.81 hmuh a ni bawk.
29. Directorate of Economics & Statistics hnuaiah Mizoram chhunga piang leh thi chhinchhiah kim vek a ni a, tunah hian Local Registration Unit 746 leh Medical Institution Unit 111 kan nei a. District thar pathum – Khawzawl, Hnahthial leh Saitual-ah te District Research Officer dah turin phalna hmuh tawh a ni.
30. Horticulture Department-in sawrkar flagship programme SEDP hnuaiah ’Model Bamboo Plantation’ chu Lengpui leh Hmunpui khuaah kalpuiin beneficiary 213 an awm mek a. Kumin hian a hunbi pangngai lo (off season)-ah tomato quintal 3,010 vel zet tharchhuah a ni a, heta tang hian hlawkna cheng nuai 240.80 zet hmuhchhuah a nih piahlamah inhlawhfakna (hna) engemawzat a siam belh bawk. Khawzawl leh Champhai district-a khaw pathum – Tuipui, Tualte leh Zotlang hian tomato an chin atangin Rs. nuai 104 chuang an hmuchhuak a a, Serchhip district-a Hualtu khua hian thla 6 chhung lekin Green House hmangin tomato Rs. nuai 15 chuang man an tharchhuak bawk a ni.
Dragon Fruit tharchhuah lamah Mizoramin hlawhtlinna kan hmu chho mek zel a, kum kalta chhung rungawt pawhn khan Dragon Fruit chingtuten Rs. nuai 300 man an tharchhuak a, a thar hun a la tawp loh avangin hei hi a la pun belh zel a rinawm a ni. Post Harvest Development programme hnuaiah Integrated Pack House/Cold Room pakhat 100 MT capacity chu Sairang Main Hub ah sak a ni a, Satellite Units of Integrated Pack House, 30 MT capacity pakhat theuh Khawzawl, Serchhip, Kolasib leh Lunglei District-ah sak a ni bawk. Balhla tharchhuah tamna hmun Baktawng leh Sesawng-ah Ripening Chambers dah a ni a. Serthlum (Mandarin Orange) huan ti nung tura theihtawp kan chhuahna chuan rah tha chhuahin 53984 MT vel Rs. vaibelchhe 16 hu kan thar chhuak bawk a ni.
31. Ruihhlo dona kawnga thapui chhuahtu Excise & Narcotics department chuan kum kalta chhung khan Narcotic Drugs & Psychotopic Substances Act, 1985, Mizoram Liquor (Prohibition) Act, 2019 leh Mizoram Excise Act, 1973 hnuaiah mi 1008 manin case 1176 register a ni a, revenue Rs. 42,64,300 an hmuchhuak bawk a ni.
32. Geology & Mineral Resources Directorate chuan ‘The Mizoram Minor Minerals Concession Rules, 2000’ kengkawhin kum kalta chhung khan mining permit 85 an pechhuak thar a, ramchhung hmun hrang hrangah checkgate 23 siamin royalty Rs. 3,63,37,307 an hmuchhuak a ni.
33. Urban Development & Poverty Alleviation Department hnuaia notified town 23 te chu pawna inthiar awm lohna (open defecation free) a puan an ni tawh a. India rama Stae hrang hranga khawpui thianghlim zirchianna ‘Swachh Survekshan’ an neih ah Mizoram chuan 13-na dinhmun a hauh bawk a ni. ‘Support to Urban Poor’ programme hnuaiah April, 2020 khan khawpui chhunga chhungkaw harsa 2600 hnenah tanpuina Rs. 26,00,000 pek an ni a. AMRUT hnuaia hma kan lak that avangin sawrkar laipuiin Special Incentive Fund min pe bawk a, he Fund hmang hian UD&PQ department chuan special project ‘Street Renovation of Tennis Court Junction’ cheng vaibelchhe 1.90 man a kalpui mek a ni.
Sawrkar laipuiin COVID-19 hripui leng vanga harsatna tawk kawtthlera thil zuar thin (street vendor) te sum leh paia tanpuina tur a ruahman ‘PMSVA Nidhi Scheme’ hnuaiah vendor 681 tanpui an ni a. PAHOSS (Parking House Support Scheme) hnuaia a hmalakna chhunzawm zelin, aizawl khawpui chhungah mi 1023 hnenah tanpuina dawng tur thlanchhuah an ni. Multi Level Car Parking, Ramhlun South, Aizawl sakna tur lungphum chu 4th December, 2020 khan phum a ni a, Multipurpose Recreational Centre and Community Centre/Hall, Zonuam, Aizawl ami tur 9th December, 2020 khan phum niin, Bungkawn Community Hall, Aizawl sakna tur lungphum pawh 11th December, 2020 khan phum a ni bawk.
COVID-19 hripui leng dona kawngah Aizawl Municipal Corporation hmalakna in AMC huam chhunga Local Councill zawng zawng ten Local Level Task Forces on COVID-19 an din a, an thawhrimna a chhuanawmin an thawhlawk hle a ni tih chu mi zawng zawngin kan hriat vek ka ring. AMC hian Indian Medical Association (Mizoram) hnenah COVID-19 dona kawnga tangkai taka an hman turin Rs.2,00,000 an hlan a, Mizoram Police hnenah Solar Home lighting system 100 an hlan bawk a ni. August thla khan Aizawl khawpui chhunga hmun 24 ah Free Wifi internet an pechhuak bawk a ni.
SIPMIU-in Air Field Venga Aizawl Solid Waste Management Centre an siam chu kum khat chuang zet tluang takin kan chhawr tangkai ta a, khawpui tihfai kawngah pawh hei hian awmzia thuk takin a nei a, a bik takin COVID-19 hripui leng laka kan himna tura bawlhhlawh senghawi fimkhur kawngah hma nasa takin min sawn tir a ni.
34. Taxation Department chuan sawrkar kum kal lai mekah November, 2020 thleng khan chhiah cheng nuai 37,071.31 an hmuchhuak tawh a, Mizoram pawn atanga bungraw lo lut atanga chhiah lak awmze nei leh mumal zawka kalpui anih theih nan Vairengte Checkgate hlui bulah Data Collection Centre an bun bawk a ni.
35. Food, Civil Supplies & Consumer Affairs Department chuan Public Distribution System hnuaiah chhungkaw 2,74,727 (mihring 12,14,084) hneh takin an enkawl mek a, an hmathawh that zarah tun thlengin riltam leh chhuanchham an awm hriat a la ni lo a ni. COVID-19 hripui leng avanga lockdown puan a nih lai khan ‘PM Garib Kalyan Anna Yojana’ kaltlangin April-November, 2020 inkar khan card holder 1,55,405 hnenah thla tin athlawnin buhfai kg 5 theuh pek an ni a. National Food Security Act beneficiary te hnenah dal leh chana a thlawna pek an ni bawk. Kolasib, Darlawn, Khuangleng, Darlung, Reiek, Khawlailung, North Hlimen, Chawngte leh Maubawk –ah kudam sak zawh a ni a, Lawngtlaia kudam sak mek pawh zawhfel tep a ni. District thar 3 - Hnahthial, Khawzawl leh Saituala DCSO office din turin chak taka hmalak mek a ni bawk.
36. Mizoram sawrkar flagship programme SEDP leh Centrally Sponsored Scheme hrang hrang kaltlangin Agriculture Department chuan nasa takin hma a la a. Kum 2019-20 chhung khan Oil Palm chinna hmun hectare 26531 a zau a siam belh a, a punna hi 2.34 % a ni. India hmarchhaka Oil Palm Mill awmchhun Bukvannei, Kolasib ami hian darkar khata oil palm rah 5MT a her thei bawk a ni.
Organic Farming chawisan nan Agriculture department hian Mission Organic Value Chain Development kalpuiin hei hian ram hectare 13,000 a huam a, kuthnathawktu 14,104, Farmer Producer Organisation 9 leh Farmer Producer Company 5 in an chhawr tangkai mek a ni. Mission Organic Mizoram (MOM) hnuaiah Serchhip Chilli FPO chuan hmarcha pui thak ‘Kawlri’ (a hot mizo chilli sauce) an siam chhuak a, West Phaileng FPO ten ‘Dampa Mizo Chilli Pickle’ hlawhtling takin an siam chhuak bawk a ni.
Damdawi hmanga siam leitha hman nasat lutuk tihbo nan SEDP hnuaiah Mizoram University leh Council for Scientific and Industrial Research - North East Institute of Science and Technology (CSIR-NEIST), Jorhat te nen tangkawpin project thar ‘OP-12 Bio fertilizer Production Unit’ Neihbawi, Sihphir ah din tura hmalak tan tawh a ni a. He project hi cheng nuai 125.311 man a ni.
37. Commerce & Industries Department hnuaiah Industrial Unit 20 laiin Transport Subsidy, Central Capital Investment Subsidy, Comprehensive Subsidy leh Interest Subsidy kaltlangin Rs. 218,297,689/- lai hlawkna an hmu a. PMEGP kaltlangin entrepreneurs 269 hnenah tanpuina cheng nuai 356.02 pek an ni bawk. Zuangtui, Luangmual, Lengte, Sairang, Pukpui, Champhai Zote, Champhai Hmunhmeltha, Bairabi, Pangbalkawn, Meidum, Kolasib, Serchhip, Bilkhawthlir leh Lawngtlaiah Industrial Estates14 din niin industrial unit 259 an awm a ni.
Handllom & Handicrafts Wing chuan Ministry of Textiles, Government of India ruahmanna kaltlangin Cluster Development Project 17 an zo tawh a. National Handloom Development Programme hnuaiah Block Level Cluster 10 din mek a ni. Phuaibuanga Handloom Production-cum-Training Centre dinna tur project cheng vaibelchhe 3.50 man chu NEC in min pawmsak tawh bawk a ni.
Aizawl Smart City project hnuaiah New Market, Aizawl-a Aizawl City Centre sakna tur cheng vaibelchhe 34 crores ruahman niin hma lak mek a ni a. Indo-Bangladesh Border-a hmun pawimawh Kawrpuichhuah leh Tlabung-ah te Integrated Check Posts din turin hma lak mek a ni a, he project hi Land Port Authority of India, Ministry of Home Affairs kuta awm niin a hmunhmate pawh endik tawh a ni a. September, 2021 a bul tan hman tura ruahmanna kalpui a ni.
38. Planning & Programme Implementation Department chuan sawrkar flagship programme Socio-Economic Development Policy (SEDP) hnuaiah kum 2020-21 chhunga hmasawnna hna chi hrang hrang thawhna turin cheng vaibelchhe 148 a ruahman a, vanduaithlak takin COVID-19 hripui lengin min chimbuai avangin harsatna namenlo kan tawk a, hei vang hian hmasawnna hnathawhna tur atana sum ruahman sa chu 15% in tihhniam a tul ta a ni.
India hmarchhak state dangte nen khaikhinin Mizoram chuan NEC fund kaltlanga project hrang hrang hmalaknaah hna a thawk tha em em mai a. Tunah State Component hnuaiah development project 16 thawh mek a ni a. Kum 2020-21 chhungin hnathawhna tur cheng vaibelchhe 83.37 min rawn pe tawh nghe nghe a ni. Kum 2020-21 chhung atan NEC hian development project thar 6 min pawm sak tawh bawk a, NEC hian COVID-19 hripui dona kawnga hmalakna chi hrang hrang atan cheng vaibelchhe 3 min pek bakah, PPE Suits leh Test Kit hrang hrang lei nan cheng nuai 80 min pe bawk a. Ram pawna hnathawk hripui leng vanga lo haw an hna chan ta ten eizawnna thar an neih theihna tura ruahmanna kan siam tihhlawhtlin nan cheng vaibelchhe 3 min pawm sak tawh bawk a ni.
39. Environment, Forests & Climate Change Department boruak thianghlim, hrisel leh ramngaw tha kan neih theihnan mipuite nen tangrualin tha thlah lovin hma an la a. Village Forest Development Committee leh Eco-Development Committee 600 chuang dinin ramngaw tangkaina leh hlutna inzirtir kawngah beihpui an thlak a ni. Central Zoo Authority chuan tunhnai lawkah khan Assam State Zoo, Guwahati nen ramsa inthleng (animal exchange programme) kalpui min phalsak a, hemi zarah hian Aizawl Zoological Park-a enkawl turin Assam State Zoo atang sakei kan lak thuai theih kan beisei a ni. Ramngaw atanga tharchhuah hlutna tihpun nan leh kan economy tihhmasawnna tura hmalakna thawhkhatna atan Aizawl, Kolasib leh Mamit district-ah Primary and Secondary Wood Based Industries 8 dinna tur licence pek a ni. COVID-19 hripui leng karah kum kalta khan Green Mizoram Programme hlawhtling taka kalpui niin thing tiak 49,168 phun a ni bawk.
40. Covid-19 hripui leng vangin Administrative Training chuan kum 2020-2021 chhunga training programme an siam chu duh angin an kalpui thei ta lova. Disaster Management & Rehabilitation Department-in guideline a siam zawmin training couse 4 erawh tluang takin an kalpui thei a ni. December, 2020 thleng khan Directorate of Institutional Finance & State Lottery chuan lottery kaltlangin chhiah cheng nuai 331.49 an hmuchhuak bawk a ni.
41. Law & Judicial Department pawngsual case leh naupang chunga hleilenna case hrang hrang rang taka chinfel a nih theih nan co-terminus in thawktu 24 an lak belh a. Mamit leh Serchhip-a Judicial Officer’s Residential Complex sak zawh niin hawn a ni bawk a. Mizoram State Legal Services Authority chuan Lok Adalat kaltlangin thubuai 374 an rem bakah Banks hrang hranga loan ba cheng 3,05,06,687 an chingfel bawk a ni.
42. State Council for Educational Research & Training (SCERT) chuan COVID-19 hripui leng vanga school chawlh a nih chhung khan elementary zirlaite tan Alternative Academic Calendar siamin hlawhtling takin an kalpui a. NISHTA hmalakna in Mizorama zirtirtu 3233 hnenah DIKSHA App kaltlangin online training pek an ni bawk.
43. Power & Electricity Department chuan December ni 4, 2020 khan 2MWp Tlungvel Solar Power Plant, State Plan Fund atanga cheng nuai 1,400 a siam chu an hmang tan a. DoNER stanga sum hmuh hmanga Mizoram chhim a kawlphetha lakluh belhna tur 110Km, 132kV S/C, Aizawl (Melriat) S/S - Lunglei line chu August ni 14, 2020 khan hman tan a ni bawk.
44. COVID-19 hrileng karah Information & Public Relations Department chuan 'online' in lemziak, film leh thlalak lama tui mite tan programme paruk 'online' in a buatsaih a. Mizoram Journalists Association member leh an chhungte tan Medical Assistance (Rs. 13,10,300) leh Ex-gratia (Rs. 3,50,000) pek an ni.
Thian duhtak te u,
Vawiin Republic Day ah hian he ni pawimawhna hi kan hriat thar leh ka duh a. India ram chu tu thuhnuaiah mah kun lova mahnia inrelbawl thei mipui sawrkar, harsatna tam tak paltlang hnua Ram Danpui kan neih tak avanga he ni hi ropui taka lawm kan ni a. August ni 15, 1947 ah India ram chuan zalenna sual chhuak tawh mah se, ram Danpui - Constitution nei thei tur hian kum hnih leh a chanve lai a la duh a ni.
India ram zalenna sual chhuaktu pasalthate inpekna nasa tak avangin mahnia ro in rel thei sawrkar a lo ding a. He ram a lo pian theihna tura hnam pasaltha te inhlanna kha kan theihnghilh ngai lova. An inpekna leh channa nasatzia hre rengin keini pawhin harsatna tinreng paltlanga an sual chhuah, mipui sawrkar inrelbawlna dik, zalenna, dikna, intluktlanna leh inunauna te hi kan vawng nung reng tur a ni a. He ram ropui taka cheng ten hlim taka kan hman mek Republic Day-a lawmna leh hlawhtlinna thinlung kan put hi ral mai lovin ram hmasawnna tura inpekna thar nen kawng dik zawh tur leh hmasawnna rahbi thar chuangkai zel turin i inbuatsaih ang u.
COVID-19 hrileng hi a reh mai dawnin a lang lova. Chuvangin, Mizoram mipuite fimkhur chhunzawm zel turin ka chah che u a. Kan himna tura sawrkarin inkaihhruaina a siam te tha taka kan zawm avangin Mizoram chu COVID-19 avanga tuar nep ber State kan ni thei a ni. He hunah hian COVID-19 dona kawnga State Sawrkar, kohhran, tlawmngai pawl leh vantlang mipuite thawhhona leh inpekna ka chawimawi nawn leh a ni.
Ka lawm e.
Jai Hind.
