No.7339/2020-2021
Republic Day 2021 puala Hon’ble Governor P.S. Sreedharan Pillai thuchah.
CHIBAI.
Vawiin hun lawmawm tak, Republic Day vawi 72-naah hian Mizoram mipuite duhsakna chibai ka buk a che u. He ni chhinchhiah tlak tak hi Zalenna suala kan kawng zawhnaah a vawrtawp kan thlenna ni a ni a. A chhan chu vawiin ni angah hian Zalenna Sualtute inpekna ropui tak te avangin India ram chu mahnia ro in rel hrangin mipui thlante rorelna ram a lo ni ta a ni.
Kan ram Danpui Thuhmahruaiah chuan “Keini, Mipuite”, tih a chuang kalh a. He mi awmzia chu India ramah chuan Khua leh tui ten thuneihna sangber an nei tihna a ni. Kan ram Danpui-ah hian Zalenna sualtute – Pu Gandhi-a leh hruaitu ropui tak takte duhdan te lakkhawm niin Khua leh tuite dikna leh Chanvo te dah pawimawh a ni a. Khawvela ram rorelna Danpui te zingah pawh a tha ber pawl a ni.
India Ram Danpui chuan – Chi leh kuang, Thurin emaw Mipa leh Hmeichhia thliar hranna awm loin mi zawng zawngte intluktlanna a tiam tlat a. Kan ram thuneihna leh mipuite rorelna hi tih nghin rual a ni lo a ni. Vawiin thleng hian kan ram thuneihna leh a chhunga mipuite rorelna chu chhunglam leh pawn lam atangin tihchhiat tumin beih a ni a. Hetiang hunah tak hian mi chi hrang hrang chengho ni mah ila impumkhatna leh inunauna hi kan chakna thuruk a ni tih kan hriat nawn fo a ngai a ni.
Kum 2020 chhung khan COVID-19 hripui lengin khawvel a tibuai a nih kha. Ram zawng zawngte chuan he Hripui leng avang hian ei leh bara harsatna piah lamah kawng tinrengin harsatna an tawk vek a ni. Vanneih thlak takin kan Central Sawrkar leh State sawrkar a inpuahchah that avangin ram dang te ai chuan kan zia fe zawk a. Kan State phei chu an inpuah tha leh zual a; hemi kawngah hian sawrkar leh mipuite thawhhona tha tak kan hmu a, hei vang hian Hrileng dona kawngah midangte aiin kan ziaawm zawk a ni.
He hunkhirh takah hian India chuan a harsatna tawh te huaisen taka hmachhawnin ramdangte entawn tlak khawpin hma a hruai mek a ni. Kan mithiamte thawhrimna a zarah COVID-19 Hridanna pawh kan siam chhuak tawh a; tunah hian ram pumah Hridanna damdawiin hmangin invenna kan kalpui mek a. Khawvelah hmahruaitu kan nih ang pawhin he kan Hridanna Damdawi hi kan ram thenawmah te leh ramdangah te kan thawn chhuak mek bawk a ni.
Heng kan hmalakna leh kan theihna sang tak lo langchhuak mekah hian kan Prime Minister chuan a lo sawi fo tawh thin ‘India, Ram Intodelh’ tih chu a pawimawhzia hre thar leh theuh turin min chah a ni. Hemi kawngah hian Mizoram hi theihna sang tak nei kan ni a. Kan ram leilung hausakna te chhawr tangkai tumin a chhungte mihring cheng te hian kan theihna te peipunga - kan state leh kan ram hmasawnna tura theihtawp chhuah turin kan in chah a ni.
He huna ka han sawilan tel duh bawk chu – kan State Sawrkar hian Hripui leng mek avanga harsatna tam tak kan tawh lain hna a thawk tha em em a ni tih hi a ni a. COVID-19 avanga kan harsatnate sukiang tura hma kan lo lak tawhnaah leh ke kan pen mekah hian mipui thuawihna leh sawrkar thlawpna tha tak kan hmu a ni. Kan tangrual tih a hriat a; mahni intodelh tura kan beihna kawngah pawh Mipui ten State Sawrkar leh Central Sawrkar te tha takin kan thawhpui zel ka ring bawk a ni.
A tawp berah chuan khua leh tuite hnenah ‘India Thar leh India, Ram Intodelh’ kan neih theih nan kan tih theih ang tawk theuh te tha taka ti chhunzawm turin kan in ngen a. Republic Day ropui taka kan lawm mek rual hian kan Ram Zalenna Sualtute zahna lantir nan kan zain kan ram Danpuia inziak te tha taka zawm tura inhlan thar leh turin kan in chah nawn bawk a ni.
Republic Day hlim taka hmang vek turin duhsakna ka hlan a che u!
KA LAWM E.
Jai Hind!
