No.7174/2020-2021
Zoram mipui duhtakte
COVID-19 hripui chuan khawvel runin, Mizoram thleng pawhin harsatna tam tak mipuite hnenah a thlen a. Kum 2020 chu kum duhawm loh takah a chantir a, kan hriat theuh angin kan beisei loh leh thleng lo se kan tih Covid-19 vanga nunna chan pakua lai mai kan nei ta reng mai. He hripui avanga nunna chan ta chhungkua-te rilru leh tihtakzetin ka tawrhpui che u a ni. He hripui avang hian chhungkaw tam tak eizawnna kawngah harsatna tawkte an awm a, hmun tam takah kohhran, pawl leh mimal te pawhin tanpui ngai tam takte an lo chhawmdawl tawh bawk. Sawrkar pawhin Chief Minister’s Relief Fund-a mi tlawmngaite, pawl leh kohhran hrang hrangte bakah sawrkar hnathawkte sum leh pai thawhkhawm chu he hrileng do nan hian tangkai takin a hmang a, CM Relief Fund-a sum leh pai thawhtute zawng zawng chungah lawmthu ka sawi a ni.
He hrileng dona ah hian Sawrkar chuan mithiamte leh kohhran hruaitute bakah NGO hruaitute nen inrawn tlangin mipuite kan him nan dan zawm tur leh tihtur chi hrang hrang te a siam a, chung dan siam te chu Mizoram mipuite hian tha takin kan zawm a. Pathian zahngaihna leh mipuite thuawihna avang hian tun dinhmunah chuan hrileng hian ziaawm lam a pan hret hret zel a, Covid-19 vei pawh kan state chhungah an tlem chho tial tial bawk. Heng te avang hian Mizoram chu India ram pumah Covid-19 vanga damlo leh nunna chan tlemna ber kan ni thei a, hei hi kan zavaia kan tanrualna leh intawiawm tawnna rah a ni tih ka sawi duh a ni.
Kan hriat theuh angin khawvel chuan he hrileng dona kawngah hian nasa takin hma a la mek zel a, he hrileng laka invenna (Vaccine) pawh India ram chuan chi 2 ngawt mai a siam chhuak ta a, uluk tak leh fimkhur taka enchhinna neih a nih hnu ah hemi atana ruat India rama mithiam bik te (Expert group) chuan he invenna chi 2 te hi mipui tan a him tawk leh tha tawk a ni tiin, mipui vantlang hman theih turin ni 3 january 2021 khan an chhawpchhuak ta a ni .
He hri danna pe chhuak tur hian India sawrkar chu hun rei tak atangin a lo inbuatsaih reng tawh a, Mizoram-ah pawh November 2020 atang khan he inbuatsaihna hi kalpui a lo ni tawh a ni. India Prime Minister zahawm tak Pu Narendra Modi chuan he hri danna pekchhuah tanna pual inkhawm buatsaih ah ramchhung hmun hrang hrang atanga en theih turin, naktuk January ni 16, 2021 (Inrinni) hian Delhi khawpui atangin hun a hmang dawn a ni.
He hridanna pek tan ni hmang tur hian Mizoram sawrkar pawh nasa takin a inbuatsaih a, a) Civil Hospital, Aizawl, b) Zoram Medical College, Falkawn, c) Urban Primary health Centre, ITI leh d) Civil Hospital, Lunglei-atangte in he hun hi lo zawm ve tur ni in, Covid-19 hridanna hi pek chhuah tan nghal tur a ni a. A nikhatna ah hian Mizoram chhunga health care workers mi 400 hnenah hri danna dose hmasa ber hi pek tur a ni.
He hridanna chungchanga kan hriat tur hrang hrangte han sawi ila.
1. A hmasa ber ah chuan Covid-19 hri danna hi India ram mipui zawng zawngin a thlawn a dawn vek tura ruahmanna siam a ni. Hri danna siam nan hian Sawrkar hian sum tam tak a sengin, a man hi a to em em a, a thlawna kan dawng thei tur hi a lawmawmin mipui pawhin kan hlut em em tur a ni ang.
2. Hri danna pek dan hi Election/inthlanna ang chiah a kalpui tur a ni a, midang chan ai lo dawn khalh a theih dawn lova, a dawng turte hnena pek dan turah Mizoram sawrkarin thu a nei lova, sawrkar laipui ruahmanna siam anga khauh taka zawm tur a ni ang.
3. India sawrkar-in ruahmanna felfai tak siamin hridanna la hmasa tur hi hlawm 3-ah a then a- Pakhatnaah Health Care Workers, Sawrkar leh Private-a thawkte pek hmasak tura tih a ni a, Health Care worker database hi nikum november thla atanga buatsaih tawh niin, Hri danna pek chungchanga hman tur India sawrkar in portal/software a siam CoWIN-ah hian dah luh vek tawh a ni. Tun dinhmunah hian Health care worker 14,421 (Sing khat, Sangli, Zali, Sawmhnih pakhat) ziah luh tawh an ni a, CoWIN portal-a ziahluh loh te chuan he hri danna hi an dawng ve thei dawn lo a ni.
4. A pahnihnaah chuan Frontline workers te pek tur an ni leh a, Frontline Workers tihah hian State leh Central police-te, prison staff-te, Municipal workers-te, Armed Force-te, Home guard-te leh Disaster Management department hnuaia Volunteer-te an tel dawn a ni. He frontline workers database siam hna hi tunah hian Home Department-in chak takin hma a la mek zel a ni.
5. A pathumnaah chuan Kum upa, kum 50 chunglam leh kum 50 hnuailam, natna benvawn nei te pek leh tur an ni a. Tun dinhmunah chuan heng mite pekna tur hi India sawrkar-in inbuatsaihna a la kalpui lo a ni.
6. Tun dinhmunah hian India sawrkar hian Vaccine hi kan duh ang zat min pe thei lo mahse la, mipui zawng zawng indaih tur hi a tahtawlin min rawn pe dawn a ni.
7. He hridanna pek beihpui thlak turah hian Health Department chuan WHO, UNICEF leh UNDP te thawhpuiin, thawktute inbuatsaihna kawngah hma nasa takin a la a. Department hnuai-ah Committee hrang hrangte dinin, hri danna hi a dawng tur mipui-in an lak kim ngei theih nan theihtawp an chhuah a ni.
8. Covid-19 hridanna hi mimal duhthlanna ni mahse mi zawng zawngin kan him leh kan damtlan nan kan lak vek hi a pawimawh em em a ni.
9. Covid-19 laka kan invenna hman mek, Kut silte, Mask vuah/hman leh midang nena inhlat a awm (Social distancing) hi, covid-19 vaccine kan lak hnu-ah pawh kan hman chhunzawm reng a pawimawh em em a ni.
Ramchhung mipui zawng zawngte, mahni hriselna ngai pawimawh a, Sawrkar hmalakna thlawp theuh turin ka sawm a che u.
