No.1915/2021-2022

Kolasib dated 18th August 2021: Vawiin chawhnu khan DC Cenference Hall, Kolasibah Dr.R.Lalthangliana, Minister, Health & Family Welfare Department chuan Kolasiba Covid-19 dona kawnga hmalak dan leh hmachhawp chungchangah thutkhawmna neiin Dr.H.Lalthlangliana, Deputy Commissioner chuan hun a kaihruai a. Zonal Executive Magistrates, Kolasib district chhunga Health Department lam a thawktute leh Joint VLTF, Kolasib town aiawhte he hun ah hian an tel a ni.

Health Minister Dr.R.Lalthangliana chuan Kolasib district-a Sawrkara mawhphurtute, tlawmngai pawl hrang hrangte leh district mipuite chu hri dona kawnga an hmalakna fakawm a tih thu sawiin Mizoram district dangte hmachhawn ve loh, ramri chungchanga buaina leh state luhkapui nihna anga mikhual chhawntu ni chung pawh a hri dona kawnga hmalakna tha tak a kalpui a ni thin chu lawmawm a tih thu a sawi.

Union Health Minister Mansukh Mandaviya hovin India hmarchhak State 8 Health Minister-te COVID-19 hripui leng chungchangah ‘Review Meeting on Covid-19 pandemic and immunization in North Eastern States’ tia vuah Assam Administrative Staff College, Guwahati -a nimin a neih a Health Minister Dr. R. Lalthangliana chuan Mizoramin COVID-19 hripui leng hmachhawn dan leh hmachhawp sawifiahna a neih thu sawiin he hunah hian rawtna hrang hrang a thlen zingah hmarchhak state-ten harsatna hrang hrang kan neihte sawihoa chinfel dan ngaihtuah turin Union Health Minister chu Delhi-ah meeting huaihawt thin tur a rawtna te, hmarchhak State bikte health sector buaipui tur bik officer dah ni se tih leh hemi atan hian Central Ministry-a Joint Secretary aia hniam lo ruat ni se tih rawtna a thlen thu a sawi a. DoNER Ministry atanga NLCPR hnuaia 10% hmarchhak State-te tana dahhran chu Covid dona atana mumal taka hman zung zung a nih theih nana hmalakpui turin Union Minister hnenah rawtna a thlen bawk a ni.

India hramchhak state zingah Covid-19 hrileng avanga nunna chan khaikhin chuan Mizoram chu dinhmun ziaawm ber kan nih thu sawiin hei hi sawrkar leh tlawmngai pawl hrang hrangte thawhhona that vang a nih thu sawiin 2nd Wave hmachhawn meknaah leh 3rd Wave awm thei lakah pawh tha thlah lova inpuahchah chhunzawm zel turin Health Minister chuan kalkhawmte a chah bawk a ni.

Kolasib district chhunga hri kai, natna lang chhuakte chu DCHC hmunhma in a daih lo palh a nih pawhin ZMC-a enkawl zung zung an nih theih nan dam lo inhlan chhawn dan tur ruahmanna fel tak kalpui tum a nih thu sawiin naupang enkawlna tur bik, a hran a hmun buatsaih a nih theih nan hma la turin District Medical Superintendent a chah bawk a ni. Dr.R.Lalthangliana chuan khum 100 awm theihna District Hospital sak a nih thuai theihna turin hma lak mek a nih thu a tarlanga Covid-19 vaccine leh test kit pawh thahnem tak kawl mek a nih thu a sawi bawk a ni.

Hun kaihruaitu Dr.H.Lalthlangliana chuan Kolasib district-a hri kai zat sanna chhan thenkhat tarlangin state pawn atanga Kolasib district chhunga railways a hnathawk thahnem tak awm te, lo theih lohna avanga ramria duty IR police-te, NGO anga a huhoa inenkawlna hmun atanga inkai darhna avangte leh state luhkapui Vairengte, Bairabi leh hmun thenkhata endikna kalpui reng vang a nih thu sawiin Kolasib district-a thawktu hrang hrangte chu thawhhona leh inpekna thuk tak nen hri do hna an kalpui thin a sawi a. Kolasib DC chuan a la tur ten Vaccine an lak ngei theih nan vengtin VC-te nen tanghoa, Vaccine la la lo dap chhuah dan tur ruahmanna kalpui tum a nih thu a sawi bawk a ni.

He hunah hian Vaccine chuangchanga Mizoram dinhmun leh hri kai dan dinhmun sawina hun Dr. Eric Zomawia, Mission Director, NHM leh Dr. Pachuau Lalmalsawma, State Nodal Officer, IDSP te chuan sawina hun hmangin Vaccine chu a tam thei ang berin an lak vat theih nan vaccine lak hlawkna inzirtir tam a pawimawh thu an sawi.

Dr.Lalhlimpuia, CMO chuan Kolasib district chhungah nimin thlenga chhinchhiah danin 1st dose hi 78.64% leh 2nd dose hi 34.67% in an lak tawh thu a tarlanga, vaccine la la miah lo anga chhinchhiah mi 12,044-te dap chhuah hna hi vengtin leh khawtin a kalpui tum a nih thu a sawi. Dr.Doris Lalnunmawii Sailo, DMS pawhin hri kaite enkawl dan leh dinhmun tarlangin hri vei chunga hlawhtling tak a nau chhar 11 an awm tawh thu a sawi bawk a ni.

Health Minister hian vawiin chawhma khan Silchar Branch YMA-te nen inkawmna hun neiin a tul apianga an hman atana Rs.10,000 a hlan a, Vairengte ramri hrul a police duty- te rawn tlawh bawkin Pu Lalbiakthanga Khiangte, DIG (NR) leh Police hotu dangte kawmin a tul apianga hman tur Rs.10,000 a pe bawk a ni.