Vawiin khan Health Minister Dr. R. Lalthangliana chuan khawthalo laka beihpui thlakna programme kar hnih chhung awh tur Intensified Diarrhoea Control Fortnight (IDCF) National Health Mission huaihawtna hnuaia neih chu Khatla Anganwadi Centre ah a hawnna programme a hmanpui.
Health Minister Dr. R. Lalthangliana chuan National Health Mission thil tum te zinga lian ber pakhat chu naupang thihna tih tlem a ni thu sawiin ram chhunga naupang, kum 5 hnuailam tihna thleng ah, za zela 10 vel chu khawthalo avanga a ni a. Natna hote nia langsi mahse a hun taka enkawl that loh chuan thihna hial thlen thei a ni, chuvangin khawthlalo laka inven dan leh a enkawlna hi kan inzirtir leh kan inhrilhriat a pawimawh a ni, a ti a. Ei leh in lamah fimkhur te, taksa leh mahni chhena leh a vel vawn thianghlim te chu khawthlalo mai nilo, natna dang lakah inven atan pawh thil pawimawh leh tha tak mitin tih theih nia a hriat thu te a sawi bawk a ni.
Health Minister chuan naupangte hriselna atan an ei leh in kan peka leh kan buatsaih kawnga an taksa thangmek ngaihtuahin, an taksa mamawh chaw tha nutrition ngaipawimawh a tul tih sawiin hmawmsawm leh junk food kan tih mai te uar lo a tha nia a hriat thu a sawi a. Sawrkar hmalaknain naupang kawthalo thlentu ber pakhat Rotavirus laka invenna, Rotavirus vaccine chu Mizoramah a thlawna pek tura hmalak mek niin hei hi tih tan thuai tum a nih thu te pawh a sawi bawk a ni.
Dr. R. Lalthangliana chuan hetianga hriselna beihpui thlak hlawhtlinna tur chuan Health Department bakah Department dangte, tlawmngai pawl leh khawtlang hruaitute nen thawhhona tha neih a pawimawh a. Tuna IDCF ah pawh Social Welfare Department te, School Education Department te, PHE Department te leh Rural Department ten in hawng takin Health Department min thawhpui a, kan thawhhonaah lawmthu ka sawi a, kan hmalakna te tichak leh zual turin tan la theuh turin ka ngen cheu ni, a ti bawk.
IDCF hawnna programme hi Dr. Eric Zomawia, Mission Director, NHM chuan kaihruaiin thuhma sawina a nei a, Dr. Hmingthanmawii, State Programme Officer, RCH in IDCF hman chhunga hmalakna an neih dan tur te a sawi a ni.
2014-2018 chhung khan furpui monsoon intan dawnah Intensified Diarrhea Control Fortnight (Karhnih chhung Kawthalo laka hmalakna beihpui) hi Sawrkar in a lo thlak tawh thin a ni. Kumin pawh hian 28 May - 8 June 2019 inkarah Mizoram pumah he hun hi hman tura duan a ni. Kumina thupui chu 'Zero Child death due to childhood diarrhoea' (Naupang kawthalo avanga thihna awmlo) tih a ni.
IDCF ah hian Health & Family Welfare Department chuan Social Welfare Department, School Education, PHE, Rural Development te thawhpui a. Kuminah pawh an department ten en hian Steering Committee te dinin, chanvo hrang hrangte insemin, district tinah, DC atanga department hrang hrangah, SubCentre leh Anganwadi Centre thlengin, ASHA te thlengin he fortnight hi hman tur a ni a. Heng hunah te hian a thlawna ORS leh Zinc te sem a nih mai bakah kawthalo laka invendante thlengin zirtirna pek a ni ang.
