Mizoram State Legal Services Authority huaihawtin vawiin khan Health Worker Training School, Kulikawnah Health Minister Pu Lal Thanzara'n ’n Legal Aid Clinic a hawng.
Pu Lal Thanzara chuan Dan leh hrai chuan mi hnuaihnung ber atanga mi lian ber thlengin, ang khata huamin a hrut rual vek a, tumah Dan chunga leng kan awm lova, Dan hi vantlang nun humhalhna atana ding a ni, a ti. Dan hriatna lamah Mizote kan la hniam hle a, Dan hriat loh hi chhuanlam tlingah pawm theih a nih loh avangin mahni inhumhim nan leh khawtlang thila hmalaknaah te dan hre chunga tih zel hi a him ber fo a, khua leh tui tha kan nihna kawngah pawh kan mawhphurhna a ni, a ti a. Ram changkang apiangah khua leh tui tha chuan dan an ngai pawimawh a, Mizote pawh hi Dan hriatna lamah hma kan sawn a tul tih sawiin Health Minister chuan mipui ban phak, dan lama inkaihhruaina leh in kawhhmuhna tur atana Legal Aid Clinic buatsaih a ni, a ti.
India Sawrkarin hnam hnuaihnung leh rethei zawk te dikna leh chanvo humhalh sak an nih theih nan leh mi hausa zawk ten an rahbeh loh nan mi zawng zawng hnenah inang tlanga rorelna pek a nih theih nan kawng hrang hrangin hma a la mek a. Mahni dikna chanvo humhalh turin tihtur tul pawimawh chi hrang hrang a awm thin a. Mahni dikna leh chanvo humhalh turin Court pan a harsatzia te, hun leh tha leh sum tam tak sen a ngaih thinzia te hriain, mi zawng zawngin awlsam zawk, chak zawk, rang zawk leh felfai taka Court dawr a nih theih nan emaw, kan harsat manganna awlsam zawka chinfel a nih theih nan, National Legal Services Authority kum 2011 khan Legal Aid Clinic din turin ruahmanna alo siam ta a ni. Mizoramah pawh State Legal Services Authority kaihhruainain District hrang hrangah Legal Aid Clinic din a ni tawh a, Court-ah te, Police Station-ah te, University/College leh Zirna In-ah te leh thingtlang khuaah te Legal Aid Clinic hi hmun 100 chuangah hawn ni tawhin, hawn belh zel tura hma lak mek a ni.
Legal Aid Clinic hawnna inkhawm, Health Worker Training School Principal Dr. V. Lalhmingliani kaihhruaiah hian Pi Lalduhawmi, Senior Civil Judge leh Aizawl District Legal Services Authority Secretary ni bawk chuan Legal Aid Clinic pawimawhna a sawifiah a. He hmuna Advocate thu tura ruat Rosalynn L. Hmar pawhin thu a sawi a ni.
