Vawiin chawhma dar 11:00 a.m hian N. Vanlaiphai Lersia Hall ah Right to Information Act chungchang inzirtirna, Mizoram Information Commission leh N. Vanlaiphai Joint YMA te bul tuma neih ani a. Chief Information Commissioner, Pu Lalduhthlana Ralte, IFS (Rtd) chu khuallian a ni.

He hun, Pu Rokhawmthanga, Joint YMA Vice President kaihhruaiah hian khuallian Pu Lalduhthlana Ralte chuan, hriatna hi mihringte chakna bulpui pakhat kan nunkawnga pawimawh tak a ni a. Right to Information Act phei hi chu ram inrelbawlna kawnga mitinten kan chanvo dik tak kan chan ngei theihna tura min humtu dan pawimawh kan hriat chian makmawh ani a, a neitu pawh midang nilovin he rama vote thlak thei zawng zawngte hi an ni, a ti. India ramin zalenna a hmuh atangin ram rorelna hi mipuite ngeiin vawiin thlengin an siam a, sawrkar pawh mipuite tan a ni. Hei vang hian sawrkar sum hman dan a dika, miin a chanvo tur dik tak a chan ngei theih nan a neituin engkim a hre ve thei tur ani a. A tul anih phawt chuan mipui sum diklo taka lo chheprelh chingte phei chu kan timualpho ngam ve mai tur ani, tiin kalkawmte a chah a. Miin a chanvo tur a chan thin lohna ramah hlimna leh lungawina a hniamin ram roreltu leh mipuite inkara inrintawnna a chhe thin a. Chu chuan hmasawnna hnathawh kawng hrang hrang te a tichhe thei thin ani, a ti bawk. Tin, khuallian hian RTI zawhna online hmanga zawh mai theih tura ruahmanna kalpui mek a nih thu leh a taka hman theih tep a nih tawh thu a sawi a. Hengte bakah hian RTI Act hnuaia Information Commission hnathawh dan te,  Mizoram Information Commission in hna a lo thawh tawh dan tlangpui leh thil pawimawh dang mipuite hriat tur chi engemawzat a tarlang bawk.

He hunah hian Mizoram Information Commission Secretary, Pu Vanlalngena, MCS chu Resource Person nii ani hian RTI Act chungchang zirtirna a nei thung a. Mipui/khua leh tuiten RTI dan chi hrang hrang an hriat tur pawimawh te a sawifiah bakah, zualko dan te, Commission in hna a thawh dante chipchiar taka a tarlan bakah RTI lehkhabute pawh sem nghal ani.

Hemi hnu hian RTI chungchang sawihona hun hman zui niin kalkhawmten zawhna an neihte pawh khuallian Pu Lalduhthlana Ralte leh Resource Person te hian an chhan sak nghal zel a ni.

RTI Awareness Campaign hi naktuk Dt. 8.3.2018 hian Biateah neih leh tura ruahmanna siam ani bawk.