No.3878/2021-2022

Aizawl, 2nd February, 2022 : Health Minister Dr R. Lalthangliana kaihhruaiin vawiin khan SAD Conference Hall, MINECO-ah Mizoram State Health Care Scheme (MSHCS) chungchanga inrawnkhawmna neih a ni a, Health & Family Welfare Board Vice-Chairman Dr ZR Thiamsanga chuan telpuiin, Health Secretary chanvo la mektu Dr Lalzirmawia Chhangte, Health Department Principal Director Dr F. Lallianhlira bakah CYMA, MUP, MHIP, FMGE&W, ACLCA, NGHAM, All Mizoram VC Association, CADC, LADC, MADC aiawhte an tel a, Finance Department leh MSHCS hotute an tel bawk a ni.

Vawiin thutkhawmah hian MSHCS hnuaia inziaklut tun aia an tam zawk theih dan tur ngaihtuah a ni a, mipuiten tun aia an ngaihpawimawh a, an inziahluh tam chu a pawimawh tih sawi niin, rawtna hrang hrang ngaihthlak a ni. Tlawmngai Pawl hrang hrangte chuan MSHCS pawimawhna mipuite zirtirna kawnga sawrkarin ruahmanna a siam ang angte theihtawp chhuaha thlawpa lo bawhzui an inhnuam thu an sawi a, District Council aiawhte pawhin an huam chhungah ngawrh taka awareness campaign neih an mamawh thu an sawi a ni.

Mizorama sawrkar hnuaia hnathawk nghette Medical Reimbursement nen chhunfin chungchangte pawh sawi rik a ni a, uluk leh zau zawka la sawiho tha tih a ni bawk a, MSHCS hnuaia inziahluh dawna rei tak tak intlar ngai lova ruahmanna siam a tul thu pawh tarlan niin, online registration tih theih dan kawng zawn a tul thu tarlan a ni bawk.

MSHCS hotute chuan sawrkar hnathawk nghette chhiar tel lovin Mizorama chhungkaw awm zat atanga 40% vel MSHCS hnuaiah an inziaklut nia an hriat thu an sawi a, Health Care Bill tang pawh nikum February thla chin chu an pe zo thawkhat tawh tih sawiin, COVID-19 vanga sum harsatna awmin nasa taka a nghawng thu an sawi a ni.

Health Minister Dr R. Lalthangliana chuan MSHCS a inziaklut turin mipuite a sawm nawn leh a, kan mamawh hun atan a pawimawh em em a, kan mamawh lo hlauh a nih pawhin midangte tan a luanchhuahna a ni tho tho a ni, a ti a. Inziahluh hun hawn laia inziahluh a pawimawh thu sawiin damloh hnu leh hun khar hnu chuan a buaithlak tawh thin a, kan hriselna tichhe thei tur thil zuk leh hmuam bakah ei leh in thla tin a sang telin kan sen ngam lai hian kan damloha min chhawk zangkhaitu tur kan ngaihthah thin hi a pawi a ni, a ti a. Pawl hrang hrang aiawhte leh District Council aiawhte chu an member te leh an chipuite zingah uar lehzuala tlangau turin a chah bawk a ni.