No.3877/2021-2022
Aizawl, 2nd February, 2022: Vawiin khan Home Department buatsaihin Taxation Auditorium-ah Cyber Crime laka mipuite kan him theihna tura inzirtirna Cyber Jagrookta Diwas hawnna inkhawm neih a ni a. Home Minister Pu Lalchamliana chu khuallian a ni.

Home Minister Pu Lalchamliana chuan khawvel thiamna sang zelah Information Technology thang nasa kan chhawr tangkai em em a, thil tih a awlsam phah viau lai hian bumna lakah kan fimkhur erawh a ngai, a ti a. Website hrang hrang te bakah Netbanking te, Online Shopping te, Online Games te leh Social media application hrang hrang Mizo mipuiten kan hmang tangkai em em a. Amaherawhchu, keini aia thiam zawk leh hre ril zawk, kawng dik lo zawnga hmang duhtuten inbumna chi hrang hrang rawn duang chhuakin mi tam tak an bum a, heng inbumna laka kan inven thiam theih nan Cyber Jagrookta hi India ram pumah buatsaih a ni, a ti. Thla tin Nilaini hmasa bera hman thin tur, Cyber Jagrookta Diwas hi Cyber Crime lama mipui fimkhurna chawk thotu atan leh an hriatna ti fimtu atan te, an nun leh rohlu te a lo him zel theih nana tangkai a nih ngei a beisei thu Home Minister Pu Lalchamliana chuan a sawi a ni.

Cyber Crime chi hrang hrang te hi hlawm lian tak takin chi li-ah then a ni a, chungte chu - Financial fraud (pawisaa inbumna), Computer / Data Hacking (mi website va tih chhiat te, va tih danglam te), Privacy (Mimal thuruk inruk sak te, thlalak leh video engemaw lo lak saka tih chhuaha vauna) leh Cyber terrorism (Internet kal tlanga invauna hrang hrang te, terrorist ho ten mi fuihpawrh thei leh rilru chawk tho thei thil an dah te) a ni. SP (Crime) hnuaiah Cyber Crime Police Station awmin staff indaihlohna karah thahnemngai takin hna an thawk a. Kum 2021 chhung khan Cyber Crime kaihhnawihah FIR 482 a lut a ni.