2630/2024-2025
2024 Khuangchawi thla ni 21: District Health Society, Lunglei hma lakna Healthy Lunglei District Campaign hnuaiah vawiin khan Convention Centre, Lungleiah office pali - Lunglei Municipal Council (LMC), District Transport Office, Urban Development & Poverty Alleviation Department leh Local Administration Department Lungleia thawktute tan natna inkai chhawn theih loh, non-communicable disease (NCD) chungchang inzirtirna leh an hriselna dinhmun enfiahna (NCD awareness campaign & screening) buatsaih a ni.

Vawiina NCD awareness campaign & screening buatsaih hi Lunglei District Additional Deputy Commissioner Pu James Miahlung chuan kaihruaiin, Healthy Lunglei District Campaign kaloui tawh dan a tar lang a. Mizoramah NCD natna chi hrang hrang - BP sang, zunthlum, cancer leh a dangte a hluar thu leh sawrkar hna thawkte pawh a tihbuai thu sawiin, he'ng natna hian ei leh in leh nun phungah harsatna a thlen bakah inenkawl nan sum tam tak sen a ngai ṭhin a, vei lo turin nun phung uluk leh mahni inenkawl ṭhat a pawimawh a ni, a ti.

He hunah hian Civil Hospital Lungleia Medical Officer Dr Rinmuana chuan NCD awmzia sawi fiahin, NCD natna lan chhuah dan leh natna lo awm chhan bakah, NCD natna laka inven dan tur kawng hrang hrangte a zirtir a. Zawhna leh chhanna hun hman ni bawkin, hun hman zawhah office palia thawktute hriselna dinhmun chu health department-a thawktute'n an enfiahsak nghal a ni.

Attachment

  • Loading attachment...