2629/2024-2025
Aizawl the 21st October, 2024 : Tun hnaiah sorkarin tuialhtheia chhiah tihsan avanga Mizoram Commercial Vehicle Union (MCVU) in lungawi lohna lantira nawrh huaihawt an tum hi Mizoram sorkar chuan nuar lo turin a duh a, mipui tana harsatna thlentir lo turin a ngen.
Commercial vehicle pawl ț henkhatin mipui tana harsatna thleng palh thei hriaa nawrh ve loh an rel hi sorkar chuan lawmawm a ti, hei vang hian tluang taka an service ngei theihna turin sorkar chuan hma a la dawn a; commercial vehicle zinga service duhte an duh anga an service ngei theihna turin sorkarin hma lâk a tum.
Chhiah tihsan chungchanga mipui nawlpuiin nghet taka ding tura sorkar an ngennaah sorkarin lawmthu a sawi a, heng chhiah (cess) tling khawmte hi mipui hnenah a kir leh vek dawn a, ram hmasawnna tura kawng hrang hranga hman tura duan lawk a ni.
Heti chunga MCVU-in nawrh an kalpui tlang dawn a nih pawhin mipuiin an tawrh lohna turin sorkarin theihtawp a chhuah dawn a, ruahmanna pawh a siam lawk tawh a; mipui tana harsatna thleng zawnga hma la lo turin Mizoram sorkar chuan pawl hrang hrangte a ngen a ni.
Issued by Home Department, Government of Mizoram
