‘Healthy Mizoram Campaign 2017’ puala Mizoram Governor Lt. Gen. Nirbhay Sharma, PVSM, UYSM, AVSM, VSM (Rtd.) thuchah :
Ka hmangaih Mizoram mipui te, Chibai ule.
June 21, kum khata ni rei ber ni kan lo hnaih leh takah hian UNGA(United Nations General Assembly) in hemi ni hi International Yoga Day atan a puan kha kan la hre reng ang a. Kum 2014 September 27 a UN General Assembly ah Pu Narendra Modi chuan resolution pu lutin “Yoga hi hmasang hun atanga India ram ro hlu kan chhawm a nih thu sawiin yoga chu mihring taksa leh rilru, ngaihtuahna leh chet dan inpumkhatna siamtu; mahni inthununna leh nun lungawina min neih tirtu; mihring leh leilunga thilsiam dangte inkara inpumkhatna hriattirtu; mihring nihna pumhlum tana thatna leh hriselna fun kimtu a ni a. Taksa sawizawina satliah ngawt ni lovin yoga hian mihring chu a nihna dik tak hmu fiah a, lungawi taka pawm tir a, khawvel leh a chhunga thil siam dangte nen inpumkhata awm tura puitu a ni a. Kan nunphung thlak danglam a, yoga hlutna kan inzirtir chuan mihring in kan thatpui dawn a ni” a ti a.
Hemi tum hian ram 177 ten International Yoga Day hi thlawpin UNGA a hetiang lam chi resolution put luh tawha thlawptu la ngah ber a ni a. Kut beng thawm ri hluah hluah karah vote ngai hauh lovin he resolution hi pawm a ni ta a ni.
Kum 2015 a International Yoga Day hman a nih atangin khawvel hmun tinah mi maktaduai tel tak meuhvin Yoga hi an chhawr tangkai a. Ram 192 ah yoga hi kalpui a ni a. Chumi zingah chuan Mosolman ram 44 lai an tel nghe nghe a. A zavai chuan khawvel mihring tluklehdingawn 2 velin yoga hi an kalpui angah a chhut theih a ni. Vawiinah chuan America ramah yoga hi dollar maktaduai tela sumdawnna lian tak a lo ni ta.
Yoga hi kum 5000 hma lam daih tawh khan India ramah, sakhaw rin leh biak mumal bik awm hma atanga chin tan a lo ni tawh hi a chhuanawm a.
Yoga chungchanga thlir dan dik tawk lo awm hi kan tih bo a ngai a. Mizoamah ngei pawh hian Yoga hi sakhaw thil ah ngai a, sakhaw dang tana hlauhawm ni a ngaihdan a awm a. Yoga hi sakhaw mal pakhat rin dan leh tih dan emaw, hnam bil pakhat chin dan nena inthlun zawm a ni lo va. Mihring chhungril nun siam thatna hmanraw pawimawh a ngaih a ni reng zawk a. Mihring rilru, taksa leh chakna dinhmun angin a thawk mai a ni.
Yoga insawizawina chi hrang hrang - taksa dah dan position leh chet dan te, thawk lak dan te, taksa leh rilru inthlahdul dan te, rilru sawrbing dan te, mahni chhungril nun inbihchianna leh siamtu nena inpawlna kan neih dan azirin, yoga chuan kan taksa, rilru leh midang te nena kan inlaichinna kawngah hriselna leh thatna min tuh sak thei a ni.
Mizoram mipuite hian midang zawng aiinyoga kan mamawh tih hi min pawmpui ngei ka ring. Khawtlang nun duhawm tak kan nei a. Ziak leh chhiar thiam kawngah kan sang nalh a, sik leh sa, boruak nuam takah kan cheng a. Heti chung hian heng thil duhawm lo tak tak, cancer natna vei tam lamah te, ruihhlo ngai leh zu ngawlvei te, HIV pai tam tih ah te hriat kan la hlawh tlat mai. Hei hian a bik takin kan thalai te a nghawng zual a. Kan rilru put hmang leh kan nunphung thlak danglam a hun a ni.
Hetih rual hian Yoga insawizawina tangkaina hretu kan pung zel hi thil lawmawm tak a ni a. Natna tlanglawn kan vei thinte do nan pawh a tangkai tih kan hre thar zel a. Chuvangin yoga ching tu pawh an pung zel a, kan khawtlangin yoga kan ngaihdan pawh a inthlak danglamin kan pawm thiam ve tan mek a ni. Kan khawtlang mi pawimawh tak tak, kohhran hruaitute, NGO te, sorkar department hrang hrang leh zirlai naupangte ka kawmna ah hmasang India thiamna hian ngaihsan a hlawh hle a ni.
Prime Minister Pu Narendra Modi kaihruaina hnuaiah India sorkar chuan yoga chawisan hi a ngai pawimawh em em a. Ministry of AYUSH chuan yoga tihlarna tur scheme hrang hrang siamin heng ruahmanna scheme te hi kan hmang tangkai tur a ni. Mizoramah Yoga Day 2017 hmanga Healthy Mizoram Campaign bul kan tan hian kan state kil tin a hawl chhuak tur a ni. Healthy Mizoram Campaign 2017 ah hian tel vek turin Zoram mipuite ka sawm a ni.
Mizoram a pawl hrang hrang te, khawtlang mipui leh thalai ten Mizoram hmalam hun thlirin he programme hlawhtlinna tur hian thahnem ngai taka pen chhuak turin ka sawm a. Kan nitin nunah yoga hi seng lut turin thalai ten hma hruai se. Kum upa zawkte pawhin hemi kawngah hian thalaite tan entawn turin hma la se. Kumin campaign ah hian Assam Rifles ten pawl hrang hrang te nen tangrualin zirlai leh khawtlang mipui te nen “train the trainers” programme an hmang hi lawmawm ka ti a. He training atana inpe hi mi za dawn lai an awm a. Heng mite hi kan state pumah yoga tilar a, midangte hnena thiamna hlan chhawng turin an pen chhuak thei dawn a ni. Chuvangiin zirna in zawng zawng ah leh veng tin, khaw tin ah he campaign hi tih tak takin kalpui ni se. District enkawl hna thawktute, Autonomous District Council te leh sorkar department te pawhin hei hi an ngai pawimawh ngei ang tih ka ring.
He campaign hi vawi khat thawha tlak mai tur ni lovin, Mizoram hrilselna tura campaign thar thawhna bul tanna a ni a. He mawhphurhna hi kan kovah la in hnehtu kan ni ngei ang tih ka ring a. Kei leh ka nupuiin he campaign hlawhtlinna atan duhsakna kan hlan a. Mizoram hi state dangte entawn tlak model state a ni ngei ang tih ka beisei a ni.
JAI HIND
