480/2025-2026

Lunglei, 2025 Ṭomir thla ni 19: Lunglei District chhungah helmet khum lova two wheeler khalh leh dan phal loh helmet khum an tam hle tih hriat a nih avangin Lunglei District Superintendent of Police Pu J. Lalmuankima chuan vawiin khan mipui hriattirna chhuahin, hemi chungchangah hian Ministry of Road Transport & Highways, Govt. of India lehkha No.F.No.RT-11012/07/2012-MVL Dt.26.5.2016, Supreme Court Committee on Road Safety lehkha No.37/2014/Co RS Dt.11.11.2016, The Helmet for riders of Two Wheeler Motor Vehicles (Quality Control) Order, 2020, Govt. of Mizoram, Transport Department lehkha No.D.26022/1/10-TRP Dt.04.07.2016 leh Section 129 of the Motor Vehicles Act, 1988-in a sawi angin two wheeler khalhtute'n Helmet (Protective Headgear) him leh rin tlak, a siam dan leh nihphungah pawh ISI mark chuang emaw, Bureau of Indian Standards (BIS)-in a pawm chin leh a tlukpui Helmet ṭha leh him chin chauh khum tur a nih thu a tar lang.

Lunglei SP hriattirna chhuah hian ISI mark chuang emaw, Bureau of Indian Standards (BIS)-in a pawm chin leh tlukpui khum loh avanga vanduaina hrang hrang tawk leh mihring nunnain a tawrh phahna tam tak a lo awm tawh tih tar langin, Mizorama kan hman lar tak, Satel Helmet kan tih mai te pawh hi Bureau of Indian Standards phal loh a nih avangin khum loh tur a ni, tih a tar lang a. Helmet hi Traffic Police te hlauhna avanga khum tur a nih loh thu te, vanduaina tam tak laka mipuite an fihlim theihna turin Sawrkarin ngaihtuahna fim tak hmangin dan hi a siam a nih thu leh mipuite'n dan kan zawm hian khua leh tui ṭha kan ni a, mahni kan inṭanpui piah lamah dan keng kawhtute kan ṭanpui tihna a ni, tih a tar lang bawk.

Hemi chungchangah hian dan bawhchhia a, dan zawm lo leh ti lui an awm chuan Motor Vehicles Act, 1989, section 194D angin cheng sang khat (₹ 1,000/-) chawitir leh Driving License pawh thla thum hrensaka hrem theih an nih thu leh dan an bawhchhe nawn a nih chuan a aia sang zawka hrem an nih tur thu a tar lang bawk.