H&FW Minister Dr R Lalthangliana chuan vawiin khan Buarpui tlang dung, Lunglei District-a khaw panga - Buarpui, Kawlhawk, Sertlangpui, Lungdai S leh Serte te a tlawh.

 

Heng khua ah te hian Primary Health Centre (PHC) leh Sub Centre te tlawhin H&FW Department thawktute, khawtlang hruaitute leh tlawmngai pawl aiawhte nen inkawmhona hun an hmang a. H&FW ruhrel mamawhte, mipuite hriselna ti hmasawn tur leh Covid-19 hrileng do zel tura mamawh te leh hmalak tul te an ngaihtuah ho a. H&FW Minister chuan sawrkarin rural health infrastructure a ngaih pawimawh takzet thu leh ti changtlung tura hmalakna lian tham tak kalpui mek anih thu a sawi.

Minister hian a khaw tlawh ah te hian Covid-19 do na hmanrua hrang hrang sanitizer, PPE, test kit,mask leh damdawi te a hlan a ni.

H&FW Minister chuan tun thla chhungin Mizorama Covid-19 vei hmuhchhuah zat pung chho mek zelin thingtlang lamah COVID-19 hripui a darh nasa mek tih a sawi a. Covid-19 hrileng do kawngah sawrkar Department hrang hrang te, kohhran te, tlawmngai pawl te, khawtlang hruaitute leh mipuite kan tanrual chhunzawm zela theihtawp kanla chhuah tlan zel a tul a ni tiin Covid Appropriate Behavior tha taka zawm turin mipuite a chah a. Mizoram chu India ram state te zingah Covid test ti tha leh ti tam ber te zinga mi kan nih thu leh tun dinhmunah test nuai 16 chuang tih tawh niin hei hi Mizoram population atanga chhut chuan 140% chuang a ni a. Mizorama Covid-19 case neih tawh zawng zawng chu 1,58,368 (22/01/22 - 7am report) niin kan positivity rate hi 10% vel a ni a. Testing kan tih tam avangin positivity rate pawh hi a sang lo theilo a ni, a ti a. Hri kai tam lam ai mahin nunna chan an tam leh tam loh ah hmalakna a that leh that loh hi min teh a, hetih kawngah hi chuan a ti tha kan ni a. Mizoramah Covid-19 avanga nunna chan mi 580 awm tawhin death rate 0.36% hi India rama hniam berte zinga mi a ni, a ti bawk. 

H&FW hmalakna ti chak turin infrastructure development leh thawktu lak belh kawngah nasa taka hmalak chhoh zel tum anih thu sawiin World Bank kaltlangin Strengthening of Health System in Mizoram Project hnuaiah cheng vaibelchhe 280 sengin Mizoram health infrastructure tih changtlun hmalakna nikum atanga bultan niin kalpui mek anih thu a sawi a. H&FW Department hnuaiah thawktu indaihlohna a nasa hle a, thawktute an hah takzet ani tih a hriatpui thu leh recruitment pawh neih chhoh zel tum niin tun dinhmunah Health Worker 400 leh Nurse 200 lak belh tura hmalakna a kal mek thu a sawi a. Thawktu lak belh tur te hi a nghet a lak nghal vek theih anih rih loh thu pawh a sawi tel a ni. 

H&FW Minister chuan thingtlang khuaa health infrastructure leh primary health care tih hmasawn chu a ngaih pawimawh hmasak thu sawiin Mizorama Sub Centre zawng zawng chu Health & Wellness Centre ah upgrade vek tum niin Health & Wellness  officer (BSc Nursing) ten an enkawl tawh dawn a ni, a ti a. Buarpui PHC chu tih changtlun zel tum niin khum pali awmna Covid-19 Isolation Ward sakna turin Nuai 43 project DPR peih fel tawh niin NABARD Rural Infrastructure Development Fund (RIDF-XXVII) kaltlanga hmalak tur anih thu leh X-Ray room, fencing leh staff quarter te pawh ruahman chhoh zel anih tur thu a sawi. Bungtlang W leh Lungdai S khua ah te Health Clinic hawng turin order tih fel anih tawh thu a sawi bawk. 

Minister hi Dr Vanlalsawma Jt Director (FW), DHS, Dr SR Ngurchamliana Medical Superintendent CHS Lunglei, Dr Lalrinthangi, SMO Lunglei leh official dangte leh party hriatuten an tawiawm a ni.