1946/2023-2024

Aizawl, 19.09.2023: State Referral Hospital - Zoram Medical College, Falkawn a Private Cabin Block sak thar chu vawiin khan Health & Family Welfare Minister Dr. R. Lalthangliana chuan khuallian niin a hawng. Aizawl South-III bialtu MLA Prof. F. Lalnunmawia chu khualzahawm a ni.

He building hi CSS leh Special Central Assistance sum hmuh hmanga sak a ni a. Project in a chhung cheina tur mamawh hrang hrang leina tur sum a ken tel loh avangin mimal inphalte hnen atanga sum thawhkhawm hmanga cabin-te cheibawl a ni a. Donor te zingah Dy. CM leh H&FW Minister te pawh hmahruaitu zingah an tel a ni.

Minister Dr. R. Lalthangliana chuan heng donation siamtute hnenah hian Donor Card a hlan a. Thu sawiin, Private Hospital Block a puiltin theihnan kawng hrang hranga hmalatute leh sum leh tha thawhtute hnenah lawmthu a sawi a. SRHF-ZMC thawktute chungah Minister chuan lawmthu sawi bawkin, Covid-19 hripui len laia damlote enkawlna tur dedicated hospital a hman a nih avanga an hah zia te leh, chutiang an tawh hnuah National Medical Commission endikna paltlang leh zelin, doctor pawh neih belh a nih tur thu sawiin lawmawm a ti a. Minister chuan Mizorama damlo inenkawlna leh mipui hriselna in hma a sawn theihna tura hmalakna hrang hrang tarlangin, district hrang hrangah tunhnaia hospital hawn a nih thu te, a awm sa tichangtlung tura hmalak a nih dan te a sawi a. Civil Hospital Aizawl pawh a theih ang anga thuamthat a nih dan leh, tun hnaiah Nephrology department siamin mi tam takin an tangkaipui thu te, Aizawl bakah district dang danga ICU siam belh a nih thu te a sawi. Minister chuan Mizoram chu Cancer tamna state a nih avanga JICA nen tangkawp a super specialty cancer hospital din turin hmalak mek a nih dan te, Champhai a Critical Care Hospital siam tum a nih thu te a sawi.

Health Minister chuan damlo enkawl hna chu hna pawimawh leh ropui tak, ngaihthah chi a nih loh thu a sawi a. Hmangaihna, lainatna leh duhsakna nen damlo te enkawl turin vawiin hospital thawktu kalkhawmte chu a chah a. Mizoram chu state dangte nen khaikhin a IMR dinhmun a that thu te, NITI Aayog health index ah India ram state te(small states) zingah kum 2017 atanga pakhatna a la nih ziah thu te a tarlang a. Dr. R. Lalthangliana chuan hriselna kawngah hmasawnna tur hmabak tam tak la nei mah ila theihtawp chhuah a kan tan tlan chuan rah tha tak kan la hmuh thuai tur thu a sawi.

Khualzahawm Prof. F. Lalnunmawia chuan SRHF-ZMC tichangtlung tura sawrkarin hmachawp a neih hrang hrangte sawiin, vawiina Private Cabin Block hawn chu lawmawm a tih thu a sawi a. A puitlin theihna tura mi inphalte’n sum an thawh chu ropui a tih thu a sawi bawk a. He hospital hi nasa zawka a mamawhtute'n an chhawr theih nan thuamchak zel sawrkarin a tum chu lawmawm tiin, thawktute pawh duhsakna a hlan a ni.

Private Cabin Block hawnna inkhawm hi Principal Secretary Pi Esther Lal Ruatkimi chuan kaihruaiin, Aizawl DC Pi Nazuk Kumar leh ZMC Director kalchhuak ta Prof. L. Fimate te hnen atangin thusawi ngaihthlak a ni bawk. Er. H. Lalnghinglova, Sr. EE, PWD Project Division-II chuan building sak dan report a pe a, ZMC Director Dr. John Zohmingliana chuan lawmthu sawiin hun a khar a ni.

Report: He building hi a project hming chu “Construction of Paying Cabin at Zoram Medical College, Falkawn, Mizoram” tih niin, sanction amount chu Rs. 1153.35 lakh a ni a. A sak phalna Administrative Approval chu 26.02.2020 khan hmuh a ni a, sanction amount chu Rs. 1153.35 lakh niin CSS (Rs. 225.80 lakh) leh Special Central Assistance (Rs. 927.73 lakh) atanga hmuh a ni.

July ni 15,2020 khan sak tan niin March ni 20, 2023 khan a building hi sak zawh a ni a. Chhawng nga (Basement-II, Basement –I, Ground Floor, First Floor & Second Floor) awmin floor area belhkhawm chu 3129 sqm a ni. A vaiin room 49 - VIP Room 8, Semi Cabin 2 leh Cabin 39 awm tura ruahman a ni. Heng room 49 zinga 20 chu mi inphal mi 8 sum thawhkhawm tlingkhawm Rs. 54 lakhs bakah PMJAY, ZMC leh RKS of SRH atanga sum (leh bungraw thenkhat) thawhkhawm hmangin peihfel a ni.

List of Donors: