4568/2024-2025

Lunglei, 2025 Vau thla ni 7: Lunglei High Powered Committee (HPC) bul tuma Mizoram Volleyball Association (MVA) leh Lunglei District Volleyball Association (LDVA) te ṭang kawp huaihawt, Mizorama professional volleyball club-te inelna, HPC Lunglei MVA Cup 2025 chu nizan khan Lunglei Chanmari YMA Hall-ah Mizoram sawrkara Health & Family Welfare Minister Pi Lalrinpuii chuan a hawng.

Khuallian Pi Lalrinpuii chuan infiamna chu mihring nuna bet tlat a nih thu leh Mizote chu a hnam ang zawng pawha infiamna ngaina tak kan nih thu sawiin, hruaitu ṭha tak takte leh inkaihhruaina ṭha tak zarah Mizoramah volleyball-a hmasawnna nasa tak hmuh tur a awm chho chu lawmawm a tih thu a sawi a. Pro Volleyball League ṭha taka kalpui te, state dang player ṭha chawk luh te chuan Mizoramah volleyball a chhem alh phah hlea a hriat thu sawiin, Lunglei HPC hotute ṭhahnem ngaihna zara Lungleiah ngei MVA Cup 2025 buatsaih theih a ni chu lawmawm a tih thu leh Mizorama player ṭha ber berte inkhel a hmun ngeia en tur awm chu Lunglei District-a volleyball player-te'n an hlawkpui ngei a beisei thu a sawi a. Ruihhlo leh HIV/AIDS-in Mizoram min run mek chu a runthlak tak zet tih sawiin, infiam mite leh Mizo ṭhalaite chu ruihhlo laka fihlim tum tlat tur leh mipat hmeichhiatna kawngah invawng thianghlim a, HIV/AIDS lakah fimkhur zel tur te'n a chah a. MVA Cup 2025 khel turte chu infiam mi thinlung dik tak pu a, thianghlim leh felfai taka inel tura chahin, duhsakna a hlan bawk.

HPC Lunglei MVA Cup 2025 hawnna inkhawm hi MVA Vice President Pu Donald Khawlhring chuan kaihruaiin, LDVA President Pu R. Lalnunthara'n inlawmna thu a sawi a. MVA Sr Vice President Pu Lalmawizuala'n thu tawi sawiin, player-te inhmelhriattirna hun hman a ni a. TNT Volleyball Club leh Tuichangral Volleyball Club te'n MVA Cup 2025 hawnna match an khel zui nghal a ni.

HPC Lunglei MVA Cup 2025 hi March ni 6 aṭanga ni 13, 2025 inkar chhungin Chanmari YMA Hall, Lungleiah khelh tura ruahman a ni a. Mipaah Mizorama pro volleyball club panga - Chhinga Veng Spikers, Khawbel VC, Sihphir VC, TNT VC leh Tuichangral VC te'n MVA Cup 2025 hi inchuhin, hmeichhiaah Mizorama pro volleyball club pathum - Bungkawn VC, Kolasib VC leh Luangmual VC te'n MVA Cup 2025 hi an inchuh thung dawn a ni.

Attachment

  • Loading attachment...