4569/2024-2025

Dated Hnahthial, the 7th March, 2025: Chapchar Kut 2025 chu " Zonun Zemawi - Hawihhawmna " tih thupui hmangin HDSC Ground No-1 ah ropui taka lawm a ni a. Ku Pa, Pu Jeje Lalpekhlua, South Tuipui bialtu MLA chuan mipuite hmaah thusawina hun hmangin Kut thlengtu Pu Zothanmawia Khiangte, Addl DC chuan thilpek a hlan a. Kut Pa chuan kan hnathawh leh thiltihna hrang hrangah rinawmna chhawm nung zel turin mipuite chu a chah a ni.

Kut Pa, Pu Jeje Lalpekhlua chuan kan pi leh pute hunlai atang tawh a kut pawimawh tak mai, Chapchar Kut ropui taka kan hmang thei chu lawmawm a tih thu a sawi a. Budget session neih mek a nih thu sawiin Hnahthial District mipuite tan Assembly-ah ka a chhan ngai zawhna, Starred Question 70 ngawt mai an put luh thu a sawi a. Hnahthial District hmasawn nan officer leh NGO hrang hrang ten tha taka a thlawp thin avangin lawmthu a sawi bawk a ni. 

Sawrkar hmalakna zarah February ni 27 atang khan kut hnathawktute tan chuan Sawhthing lei tan a ni chu lawmawm a tih thu sawiin hriat theih chinah pawh Mizoarm pumah sawrkar chuan quintal 14,000 vel a lei tawh thu a sawi a. Hnahthial District-ah pawh sawhthing thahnem tak lei a nih tawh thu a sawi bawk a. Lei leh hralh chungchangah Sawhthing thartute chu chiai lo tura ngenin sawrkar chuan sawhthing chu lei chhunzawm zel a tum thu a sawi bawk.

Kan buh tharte a lo pun zel theih nan leh man man zawka hralh a nih theihna tur atana sawrkar hmalakna, Om Om Rice Mill, Pangbalkawnah din a nih tawh thute tarlangin he hmunah hian Kolasib leh Mamit district-a buh( buhhum) tharte tan a bul tan nan kg ah 30 zela lei a nih thu a sawi a. District tinah hei hi kalpui vek an beisei thu a tarlang bawk. He mill-ah hian darkar khatah buhhum Ton -5 her thei tura ruahman niin tun tumah lo neitute buhhum Quintal 1399.61 chu sawrkarin a lei tawh thu a sawi a ni.

Public Accounts hnuaiah sum pekchhuah hmabak, K.Depost, Deposit -III, GP Fund leh Pension Fund te chu a tahtawl zela pek chhuah a nih thu sawiin Kum 2024-25 chhung hian K.Deposit leh Deposit-III hnuaia sum tling khawm chu cheng vbc 837.87 zet a nih thu te, GPF pek chhuah mai theih loh cheng vbc 785.90 leh Pension Benefit tangkhang cheng vbc 1042.42 zet pekchhuah a ni te chu ropui a tih takzet thu a sawi bawk a ni.

Tun Sawrkr hnuaiah power leina bill pek nghal zel a nih avangin kum hmasa lam aiin surcharge kan pek thin chu cheng nuai 300 zeta a tlakhniam thu tarlangin a hun taka power man pek thin a nih avangin a man tihhniamsakna (rebate) pawh cheng nuai 165.69 zet a nih thu a tarlang bawk. Hei vang hian 2024-25 February thla thleng khan Power hralhna atanga revenue chu kum 2023-24 nen tehkhin chuan cheng nuai 783.53 laiin a tam zawk thu a tarlang bawk.

CM leh Health Minister-te hmalakna zarah Mizoram Health Care Scheme hnuaia healthcare bill ba tling khawm zinga 80% chu pek tlak a nih thawh thu a tarlang a. Sawrkar healthcare bill ba zawng zawng chu kum tawpah pek tlak vek theih an beisei thu a tarlang bawk.

Mizoram Universal Healthcare Scheme chu Hnahthial District mipuite hmang tangkai tura sawmin a inziah luh theih hun chhung hian mipuite chu inziak lut vek turin a sawm a. He scheme hnuaia in register-te chu hospital-ah a thlawnin lut ang a, bill pek hranpa ngai tawh lovin in enkawl zawh hunah an chhuak tawp thei dawn a ni a ti a. Hei vang hian bill ngah buai ngai lo, Cashless system a kalpui tur a nih thu bialtu MLA chuan a tarlang a ni.

Mipuite chu sawrkar hmalaknate leh an tana duan hamthatnate an lo hmelhriat ve theih nan social media chu hmang tangkai turin a chah a. Sports lamah pawh Hmeichhe Hockey team te fakawm a tih thu a sawi bawk. Eye care clinic hawn taka OPD mi 250 zet in enkawl tura an lut chu lawmawm a tih thu tarlangin mi 37 lai mai mit zai an ni chu a lawm takzat chu a sawi bawk.

Kut chhimtu mipui zawng zawngte chu rinawmna chawinung zel tura chahin sawkar hmalakna te tawiawm zel turin a sawm a ni.

Bialtu MLA, Pu Jeje Lalpekhlua chuan Ruihhlo do nan Sub Hqrs YMA te chu cheng nuai 1 a hlan nghal a ni.

Kut Pa thusawi kimchang :-Chapchar Kut Speech.pdf

Kut hi Pu Hmingthanzuala, Sub- Hqrs YMA President chuan lawmna thuchah sawiin a hawng a. Zaipawl bakah Hlado chham te, Solakia te, Par lam te, Chheih lam te, Bualpui Cheraw te, Khuallam te, Pawnto te, Sarlamkai te, Cheraw te leh Costume parade te entir a ni a. Zaithiam - Lilzoa, Marina Varte, Mista Blow, Rosalind Khawlhring, Baby Vanlalhriatpuii leh Rohlupuia te chuan zaiin kalkhawmte chu an awi a ni.