4570/2024-2025

Dated Aizawl, the 7th March 2025:  Vawiin khan Chapchar Kut lawmna ni ropui ber AR ground ah hman a ni a. Chief Minister Pu Lalduhoma chu Kut Pa niin, Pu C. Lalsawivunga, Art & Culture Minister chu kut thlengtu a ni.

Kut pa, Pu Lalduhoma chuan, tun hma chuan Chapchar kut hmanna tur sum hi sawrkar budget-ah dah lawk a lo ni ngai lo va. A lo thlen dawnah kan lo pawt khawm deuh mai mai thin. Kan sawrkar atangin fel fai takin Budget-ah sum kan dah ta a ni. 

Kumina kan thupui hi Zo nun ze mawi – HAWIHHAWMNA a ni a. Kan pi leh pute nun ze mawi tak hawihhawmna hi kan thinlungah lo thar leh se kan duh hle.

Pi leh pute khan tawngkam hawihhawm hian thil a tithei tih an hre chiang a, “Tawngkam thain Sial a man” an ti thin. Sial kha a hun laia an thil neih hlu ber zinga mi a ni. 

“Lampui chang khatah mi an be chhe ngai lo” an ti bawk a. An hmelhriat emaw hmelhriat loh emaw, tu lakah mah tawngkam chhia an hmang ngai lo. Tawngkam tha leh hawihhawm hi a hmangtu tan engmah sen belh a ngai lo va, a dawngtu tana lawmawm bawk si a ni. 

Hawihhawmna kan chhawm nun atana tha dang leh chu – aia upate zahna hi a ni. “Upa Sa kah” tih tawngkam te hi kan nei a ni. Hnam dang zingah hetiang tawngkam mawi hi nei ve awm tak ang maw? Vawiinah chuan kan hnathawhna lama naupang zawk te an lal zawkna a tam ta hle a, hman lai ang diak diakin thil a kalpui theih tawh kher lo vang. Amaherawh chu, a theih chin chinah aia upate zahna hi kan lantir zel thin tur a ni.

Hawihhawmna, kan chhawm nun zel atana tha dang leh chu – tanpui ngaite tanpui kawngah hian a ni. YMA pawh hian a nihna (Identity) a sawifiah dan chu – YMA chu tanpui ngaite tanpuitu a ni – tih hi a ni. YMA member te i chhawm nung tlat ang u. 

Tun hnaiah Aizawl khawpui hi traffic rules zawm tha, khawpui bengchheng ve lo Silence City (No Honking City) tia hriat lar mek a ni. India ram khawpui dangah te chuan motor honk ri hi a nasa em em lah tak a. Hei hi Aizawla lirthei khalhtute hawihhawmna vanga kan neih a ni a, hawihhawmna hmangin kan ram kan chawimawi mek tihna a ni, a ti.

Chief Minister hian pi leh pute hawihhawmna leh nungchang mawi entawntlak dang tam tak a tarlang a. Thalaite chu taima tur leh thawkchhuaktu nih tum ve tlat turin a chah bawk.

Kut thlengtu Pu C. Lalsawivunga'n thuhma a sawi a, Pu Lalhmachhuana, President, Central YMA chuan inlawmna thu a sawi a, Col. Lalhmingliana, Territorial Commander, Salvation Army chuan hunserh hmangin, Pi Carol VLMS Dawngkimi, Director, Art & Culture chuan lawmthu sawina a nei a ni.

Mizo Cultural Organisation, MZP Zaipawl, Central YMA, Art & Culture Department, PC Girls School, Assam Cultural Troupe (NEZCC), Nagaland Cultural Troupe (NEZCC), Fiji Cultural Troupe (ICCR), Bawm Cultural Troupe, Hmar Cultural Troupe leh zaithiamten hun an hmang a. Tlai lamah Music Band ten hun an hmang bawk.