4571/2024-2025

Aizawl, the 7th March, 2025: Vawiin khan Mizoram Governor General (Dr) Vijay Kumar Singh, PVSM, AVSM, YSM (Retd) chuan lehlangin Siaha a tlawh a. Smart Classroom project hnuaia ITI Ltd. leh implementing partner Living Thoughts organisation te'n Numaligarh Refinery Limited (NRL) te Corporate Social Responsibility (CSR) fund kaltlanga an ruahman, Smart Board chu Siaha District chhunga Sikul thlan chhuah 6 te hman tura a hlan bakah, Sawrkar Department hotute leh zirtirtute a kawm a ni.

Larsap hi Siaha District Helipad-ah District Bawrhsap Pu V.L Hruaizela Khiangte, DIG Southern Range Pu Altaf Khan leh official dangte'n an lo hmuak a. Circuit House tualah guard of honour pek a ni a, hemi hnu hian Smart Board semna leh inkawmhona neih zui nghal a ni. 

He huna thu a sawinaah Larsap General (Dr) Vijay Kumar Singh chuan Smart Board neih theih nana CSR fund thawhtu Numaligarh Refinery Limited bakah smart classroom siam theih nana buaipuitu ITI Ltd. leh Living Thoughts organisation-te hmalakna fakawm a tih thu sawiin, hamthatna dawngtu Sikul zawng zawngte thinlung taka a lawmpui thu a sawi a. Prime Minister-in India ram hmun kilkhawr ber bera awmte pawhin ram chhung hmun dangte ruala hmasawnna an hmuh ve zel theih nana hmalak a ngaihpawimawh thu leh, hamthatna leh remchanna awmte pawh an neih zung zung theih nana tanlak a ngaihpawimawh thu sawiin, "Vawiina smart board sem pawh hi thingtlang kilkhawr zawk leh khawpuia cheng zirlaite hmasawnna kawnga intluktlanna tura ruahman a ni a, hei hian zirlaite hnenah zirna tha leh hlawhtlinna a pek ngei ka beisei a ni," a ti.

Larsap Gen (Dr) Vijay Kumar Singh chuan ziak leh chhiar thiam leh mi taima tamna Mizoramin theihna nasa tak a neih thu sawiin, hmalakna dik, hmanraw tha leh remchanna a awm phawt chuan tun ai hian nasa takin Mizoramin hma a sawn thei a ni, a ti a. Mizoram sawrkar pawhin thingtlang kilhhawr zawka chengte hmasawn nan theihtawp a chhuah tih sawiin, official-te chu thil thar leh tha zawk, hmasawn nana pawimawhte ngaihtuaha a hnena thlen hreh lo turin a sawm a. Zirna chu exam hmachhawn nan mai nilo, nundan tha leh dik zirna a nih thu pawh sawiin, mipuite chu technology chhuak thar ber berte hlau mai lova hman tangkai tum zawk turin a chah a. Siaha District chu kimchang zawka tlawh leh ngei a tum thu a sawi bawk. 

Hemi puala hun tawi Circuit House-a hman hi District Bawrhsap Pu V.L. Hruaizela Khiangte chuan kaihruaiin inlawmna thu a sawi a. Living Thoughts Organisation aiawhin Pu Prem Roy an report a pe a. Pu S. Lalremthanga, Deputy. CEM, MADC in thu a sawi hnuah Pu Vanlalchhuanliana, SDO (Sadar) in lawmthu sawiin hun hman a khar a. Hemi hnu hian Governor hian Sawrkar Department hotute leh hamthatna dawngtu Sikul zirtirtute a kawm a ni.

Vawiin hian Siaha District chhunga Sikul 6- Phura High School, Phura; Z.M High School, Chapi; Border High School, Laki; Siasi Middle School, Siasi; Theiva Middle School, Theiva leh Lopu Middle School, Lopu-te hnenah Smart Board hlan niin, hemi hma hian Lawngtlai District chhunga Sikul 14 ahte hlan a lo ni tawh bawk a ni.