4572/2024-2025 

Dated Serchhip, the 7^th March, 2025: Chapchar Kut 2025 chu Serchhip Sports Complex-ah vawiin ni leng khan hman a ni a. Pu Paul L Khuma, Serchhip DC chu Kut Pa niin Serchhip Sub Headquarters YMA President Pu R Kawlthuama chu Kut Thlengtu a ni.

Kut Pa Pu Paul L Khuma chuan Chapchar Kut hmangtute chibai bukin, kumin Chapchar Kut thupui kan hnam rohlu “zonun zemawi - hawihhawmna” i nun chhuahpui ang u, tiin a sawm a. Hawihawmna hi thua sawi fiah chi a ni lo a, a tiha tih, a nuna nun chhuahpui chi a ni, a ti a. Pi pu chena kan rohlu mahni inphata mi dangte tana inpekna- tlawmngaihna te, khawngaihna te, mi dangte hriatthiamna te, thilphalna te, huaisenna te chawi nungtu leh kan hnua thangthar lo la awm turte hnena hlanchhawngtu nih i tum theuh ang u, tiin kalkhawmte a fuih a ni. 

Kut Pa Pu Paul L Khuma chuan Chapchar Kut chu kut hlimawm a nih angin lungawi lohna leh inhmuhthiam lohna te dah bo a, inrem lo te kan inremna niah i hmang ang u, a ti a. “Hah takin hna kan thawk ang a, a hlim hunah kan hlim ang” tiin Chapchar Kut hmangtute zawng zawng te hlim taka hmang turin a sawm a ni.

Kut Thlengtu Serchhip Sub Headquarters YMA President Pu R Kawlthuama pawhin thu sawiin, Chapchar Kut hian Mizo mipute thinlungah zonun zemawi - hawihhawmna tinung thar leh se la; kan chhungkuaah te, kan hnathawhna hmunah te, kan ni tin nunah hawihhawmna i lantir ang u, a ti.

Serchhip Sports Complex-a Chapchar Kut lawmnaah hian zai mawi tak tak te leh Mizo hnam lam hmuhnawm tak tak chi hrang hrangte entir a ni a. Kut hawnna atan YMA member thlan bik mi 11 ten hlado chhamin tlang an tlir a. Cheraw kanpui neih niin Serchhip khawpui chhunga YMA branch sawmpakua (19) ten he lam hi an entir a ni. YMA Branch te leh YMA Chhang member ten hnam lam - Sarlamkai, Buhza aih, Chheih lam, Tlang lam bakah costume parade te an entir a. Serchhip Sub Headquarters MHIP te chuan Khawkhawm lam an entir a. Chapchar Kut chhimtu zing atangin Chapchar Kut Miss thlan chhuah a ni bawk.

Vawiin programme hi Chapchar Kut Organising Committee Chairman chuan a kaihruai a. Chapchar Kut Organising Committee member te, sawrkar official te, YMA, MHIP, MUP leh mipui mimir thahnem takin Kut hi an chhim a ni.