4573/2024-2025

Champhai, 7th March 2025: Zofate kut ngaihhlut hlawh leh ropui ber te zinga mi Chapchar Kut chu Mizoram hmun hrang hrang te rualin Champhaiah pawh ropui taka lawm a ni a. Adviser to CM, Champhai North bialtu Er. H. Ginzalala chuan Kut Pa niin he hun hi a hmanpui a, Champhai Sub Hqrs YMA President Pu F. Lalrinmuana chu Kut thlengtu a ni.

Zotlang Sports Stadium-a Chapchar Kut lawmnaah hian Kut Pa Er. H. Ginzalala chuan  Chapchar Kut chu pi leh pu te hunlai ata tawh inhmangaihna leh induhsakna lantir hun a hman ṭhin anih thu sawiin inti thiamlo te pawhin inngaihdamna niah an puang ṭhin a ni, a ti a. Chapchar Kut chu Mizo hnam nun mawi te chawi tharna atana hmang turin kalkhawmte chu a ngen a, “Aia upa zahna chang kan hriat ṭhin te hi i tungnung zel ang u,” a ti a ni.

Er. H. Ginzalala chuan kumin Chapchar Kut thupui - ‘Zo nun ze mawi - Hawihhawmna’ chu a lo chawrchhuahna Paite ṭawngah chuan mihring chhungril aṭanga ṭhatna zawng zawng tawp chin awm lo leh thliar bik nei lova semchhuahna a ni, a ti a. Mizo hnam hrang hrang te inpumkhat a ṭul thu pawh sawiin, “Kan danglamna tlem te dah ṭha i la, kan inpumkhat chuan kan ding chhuak ang a, kan inṭhen chuan kan tlusawp ang,” a ti.

Adviser to Chief Minister chuan Mizoram sawrkarin Champhai hmasawnna a ngaipawimawh a, theihtawp a chhuah zel a ni tih sawiin Champhai Ring Road (Khankawn-Hmunhmelṭha-Zote) siamna turin SASCI hnuaiah cheng vaibelchhe 20 an hmuh thu leh Khankawn- Kanan kawng zauh nan SASCI aṭangin crore 6 an hmuh sa bakah crore 6 dang an hmuh belh leh tawh tih a tarlang a. Champhai District Hospital a thawktu indaihlohna phuhru turin Nurse, Lab Technician leh 4th Grade engemawzat lak a tum a, ICU pawh mumal taka kalpui theih beisei a ni, a ti. Er. H. Ginzalala chuan sawrkarin sawhthing lei chhunzawm zel a tum a, sawhthing chingtute chu sawrkar ruahmanna ngaichang a, a tahtawla sawhthing lo cho turin a chah a ni. 

Adviser to CM hian Champhai Chapchar Kut hmanna senso atan ₹50,000 a pe a ni.

Kut thlengtu Pu F. Lalrinmuana pawhin he hunah hian kalkhawmte lawmna thu a sawi a. Hla do chham, Hnam lam, hnam thuam entir leh zai ngaihnawm tak tak te thlirho a ni a. Chawhnu lamah Mizo Zaimi Insuihkhawm, Champhai Headquarters te kaihhruaiin Kut Concert neih a ni bawk.  Chapchar Kut pual hian hnam thuama naupang inchei nalh thlanna bakah Kut Lanu leh Val thlanna neih a ni a. Chungte chu: 

Hnam thuama naupang inchei nalh 

Kum 5 hnuai lam - 

Pakhatna: Mipa - Vanlalvenhima, Zotlang

Pahnihna: Lallawmawma, Ruantlang

Hmeichhia 

Pakhatna: Lalnunkimi, Vengsang

Pahnihna: Lalvenhimi Tochhawng,  Mualkawi

Kum 6-10 inkar

Mipa 

Pakhatna: John Malsawmtluanga, Zotlang

Pahnihna: Romalsawma , Vengthlang

Hmeichhia 

Pakhatna: Ruthi Lalruatsangi, Vengsang

Pahnihna: Penticost Vanlalfakzeli, Dinthar

Kut Lanu  - Zorinsangi, Zotlang

Kut Val - Isak Laltlanzova, Venglai; te an ni.