4574/2024-2025

Lawngtlai, 7th March 2025 : Vawiin khan Mizote kut ngaihhlut ber zing a mi 'Chapchar Kut 2025' chu ropui leh urhsun takin Bawrhsap Pisa kawt tualah hman a ni a. Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA nibawk chu Kut Pa niin, Pu Cheemala Siva Gopal Reddy, IAS, Lawngtlai bawrhsap chu Kut thlengtu a ni.

Dr. Lorrain Lalpekliana Chinzah chuan Chapchar Kut chhimtu zawng zawngte chunga lawmthu sawina nei hmasain,  Kut hlawhtling taka hman a nih theihna tur atana theihtawp chhuahtute zahna chibai a buk tih a tarlang. Pi leh pite hun atang tawha  Zofaten   Kut  an ngaihpawimawh thin thu sawiin, vawiin ni thleng hian Kut chuan ngaihhlut a hlawh ta em em  ni, a ti. Kumin Chapchar Kut thupui 'Hawihhawmna' chu tunlai thil thleng mek ngaihtuahin  a pawimawh zual hle nia a hriat thu a tarlang a. MLA chuan Naupang, Thalai leh puitling zawng zawng ten an mamawh, zir thar leh nitina nunpui  tura pawimawh tak a ni, a ti.

Kut pa chuan  Pi leh pute hun atangin hawihhawmna hian hmun a chang lian em em a, khawtlang rorelna leh an nitin nunah khan an nunpui tlat a ni, a ti. He Hawihhawmna hi Zofaten   vawng nun zel a tul  tak zet a ti. Zofate hi tlem rih hle  mah ila kan ropuina a nep  phah chuang lo tiin Kut Pa chuan   Zo nun zemawi vawng nun tlat a nih chuan  hnam chak leh  ropui tak, khawvel mite entawn an nih theih thu a tarlang a.  Zo nun zemawi tak tak zingah tlawmngaihna, rinawmna, dikna, huaisenna, aia upa zah, chhiat ni leh  that ni a khawtlang inrelbawl dan, thenawm khawveng  in hmangaihnate chu hniam pan lo a,  uar sauh sauh tur leh a taka ninpui turin mitin tihmakmawha neih a tul hle nia a hriat thu a sawi.

Dr. Lorrain Lalpekliana Chinzah chuan hnama  chian a pawimawh hle tih a sawi a. Zo nun zemawi tha tak vawn nun a  nih chuan khawvel changkanna hian zofate a  tibuai ngai lo ang a ti a, zofate anga khawtlang inngaihsak leh inhmangaih hi  khawvel hmun dangah a  awm lo nia a hriat thu a tarlang bawk. Kut Pa chuan  Zofate chu  inlungrualna, in hmangaihna leh induhsakna lam  hawi zel tura chahin, hnam zirang leh nunphung vawng nung zel tura sawmin Chapchar Kut hlim leh nuam taka hmang turin kalkhawmte duhsakna sang ber a hlan nghal bawk.

Kut thlengtu Pu Cheemala Siva Gopal Reddy chuan Chapchar Kut hmang tura lo kal zawng zawngte chapchar kut chibai a buk a. Lawngtlaia hnam hrang hrang awmten lungrual taka Kut an hmang ho thei chuan Kut a ti ropui leh zual niaa a hriat thu a sawi a.  Chapchar Kut chu Mizote Kut neih zinga ngaihhlut ber a nih angin, thangtharten vawng nung zel se a duh thu a sawi. Kut thlengtu chuan Zo nun zemawi hrang hrang zingah tlawngngaihna chu hnamdangte neih ve loh khawvelin a ngaihsan tak a nih thu sawiin, Zo nun zemawi dang tam tak zingah rinawmna, dikna leh huaisenna chu a taka ninpui zel turin kalkhawmte a chah a. Chapchar Kut chu kum tin hmang zel tur a nih  angin, uar leh urhsun zawka hman a nih zel a beisei tih a tarlang a. Pu Cheemala Siva Gooal Reddy chuan Pi leh puten nun dan tha leh mawi an hnutchhiah chu a taka nunpui zel tura sawmin, hnam zia rang leh incheina, hnam tihdan phung vawng nung zel tur leh hlim taka hun hmang turin kalkhawmte a sawm nghal bawk.

Vawiin Chapchar Kut hmannaah hian Lai Upa Pawl ten Hlado leh Tlangtlir an en tir a, Lai Women Association (LWA) General Headquarters ten Sarlamkai leh Pawhloh tlawh  entirin Mizoram Hmeichhe Insuihkhawm Pawl ( MHIP) Sub- Headquarters ten Par lam, Chheih Lam leh Skit an entir bawk. Don Bosco School leh ANM School ten hnam lam entirin,  CYLA ten Chai lam  an entir a, mal zai leh lam hrang hrang entir  ni bawkin, Chapchar Kut Miss,Mister, Little Miss leh Little Mister- thlan nghal a ni a. Lawmman dawngtute chu Miss chapchar kut - Vanlalnunsangi (Mampui), Mister Chapchar kut - Christopher Lalruatpuia Chawnhlun ( L-III), Little Miss - Martha R. Malsawmi ( Bazar veng) , Little Mister- Manase H. Lalramluahpuia ( Council veng ) te an ni.

Vawiin Chapchar Kut hmannaah hian Mizoram leh LADC - atangin  sawrkar hnathawk an kal tha hle a, mipui chhimtu tam tak an awm bawk a. Pu Zoramsiama Hmar, Addl. DC chuan lawmthu sawina neiin hun a khar a, Chapchar Kut pual hian Concert neih ngal a ni bawk.