DIRECTORATE OF INFORMATION & PUBLIC RELATIONS, Government of Mizoram, India

4575/2024-2025

Lunglei, 2025 Vau thla ni 7: Vawiin March ni 7, 2025 khan Chapchar Kut chu Lungleia C. Ṭhuamluaia Mualah hlung taka hman a ni a. Mizoram sawrkara Health & Family Welfare Minister Pi Lalrinpuii chu Kut Nu niin, Lunglei District Bawrhsap Pi Navneet Mann chu Kut Thlengtu a ni.

Kut Nu Pi Lalrinpuii chuan Lunglei District mipuite Chapchar Kut chibai bukin, Chapchar Kut chu 'Remna Kut" a nih angin Mizo pi pute'n puithu taka kut laia nupa inhauh te, intih thinur te, intihtlan te thiang lova an lo ngaihna thinlung ang pu a, inremna ni atan hmang turin kut hmangtu zawng zawngte chu a chah a. Chapchar Kut chu hnam ni pawimawh, hnam hmel lanna hun, hnam zia min ngaihsantirtu a nih angin ngaih pawimawh leh hlut deuh deuh a ṭul thu sawiin, mi tin kut boruakah cheng tur leh hlim taka kut turin a sawm a ni.

Kut Nu Pi Lalrinpuii chuan Mizo pi leh pute nunphungah hawihhawmna a bet tlat a, ṭawng chaltlai chhuah lovin hawihhawm takin mi dangte an chhawn zawk ṭhin tih sawiin, hawihhawmna chu Mizo nunphung leh ze laimu a nih bakah, mi zahawma mite siamtu leh mite hneh tura ralthuam ṭha ber, incheina hman tlak ber leh pawimawh ber a nih avangin hawihhawmna chu khawi hmunah pawh nunpui a, vawng him tlat turin mipuite a chah a. Mizoram run mektu ruihhlo leh HIV/AIDS chu Mizo nihna nen a inhmeh lo tiin, ṭhalaite chu ruihhlo laka inthiar fihlim a, HIV/AIDS darh theihna lakah leh mipat hmeichhiatna lakah invawng thianghlim tlat turin a chah a. Ṭhalaite tan huau huau lam ringawt ni lo, thil dang buaipui tur ṭha, tih tur hmachhawp (goal) zawn tlan a, hmachhawp hlen chhuak thei tura chhungkua aṭanga ṭan a pawimawh thu sawiin, chu chuan chhungkuaah hmasawnna a thlen rualin khawtlang leh ram hmasawnna a thlen ngei dawn a ni, a ti.

Pi Lalrinpuii chuan kum 2019-a Prime Minister Pu Narendra Modi-a'n Lunglei Pukpuia Mizoram Engineeering College a lo hawn tawh tun thlenga la function lo chu a function theih nan Mizoram sawrkarin hma a la mek tih sawiin, a panna kawng siamna, staff quarters sakna leh tui leh eng pekna atan cheng vaibelchhe 25 leh nuai 41 lai ruahman fel a nih thu a sawi a. Staff lak a nih theih nan post 63 siam niin, hnawh khah theih thuai beisei a nih thu a sawi a. Hei hi Mizoram tan leh Lunglei mipuite tan hmasawnna lawmawm tak a nih tur thu a sawi.

Kut Thlengtu Pi Navneet Mann chuan Mizo ṭawngin inlawmna thu sawiin, Chapchar Kut hmang tura kal khawm zawng zawngte kut chibai a buk rualin duhsakna a hlan a. Mizote kut ropui ber pakhat, Chapchar Kut a ṭum khat nana a hmang ve thei chu lawmawm a tih thu leh a tana hun ropui leh chhinchhiah tlak tak a nih thu a sawi a. Mizo hnam thuam mawi tak tak te, zai leh lam mawi tak tak te, Mizo ṭawng te chu humhalh a, chhawm nung zel tur te, tlawmngaihna, rinawmna, huaisenna leh dikna te, mi dang zah thiamna leh hawihhawmna te nunpui zel tur te'n kut hmangtute a chah a ni.

Lungleia Chapchar Kut lawmna hun hi Organising Committee Co-Chairman, Lunglei Sub-Headquarters Young Mizo Association (YMA) President Pu K. Lalfakzuala'n a kaihruai a. United Pentecostal Church (North East India) Lunglei District Superintendent Rev. C. Lalrintluanga'n hunserh hmangin, Lunglei Sub-Headquarters YMA Zaipawl te'n hawnna hla an sa a. Mizo Upa Pawl General Headquarters Lunglei te'n hlado leh bawhhla chhamin tlang an tlir a. Sub-Headquarters YMA Cultural Troupe te kaihhruaiin YMA branch 18 (bu 23 ) te'n a huhovin cheraw (kantluang) an kan a. Nl. Vanlalhriatpuii Hmar (Bazarveng) chuan "Inthuamna hlu - Hawihhawmna" tih changvawn a sawi a. Organising Committee Secretary, Sub-Headquarters YMA Secretary Pu Zothanzuala Hnamte chuan lawm thu sawiin, 2nd Battalion MAP English Medium School Pipe Band te'n rimawi tuma kal rem entirin hun khatna an khar a ni.

Pu C. Lalrindika leh Pi Caroline Lalduhawmi te kaihhruaiin Chapchar Kut lawmna hun hnihna hman chhunzawm a ni a. Mizo Cultural Artists' Association (MCAA), Sub-Headquarters Lunglei kaihhruaiin YMA branch 20-in sarlamkai entirin, Sub-Headquarters YMA Cultural Troupe kaihhruaiin YMA branch 9-in khuallam an entir bawk a. Nursing School Lunglei leh Sub-Headquarters YMA Cultural Troupe te'n special item (lam chi hrang hrang) entirin, MCAA Sub-Headquarters Lunglei te'n chheih lam, Mizo Hmeichhe Insuihkhawm Pawl (MHIP) Sub-Headquarters Lunglei te'n tlanglam leh Mizo Cultural Organisation (MCO) General Headquarters Lunglei leh MCO branch 10 te'n chai an entir bawk a. Chapchar Kut concert buatsaih chhunzawm niin, zaithiam hrang hrang - Vanrammawii Pautu, Feli Hauhnar, Deborah VL Hmangaihi, H. Rosangliana, Becky Fanai, Zothankima (Kimkima), Keimah Senes, Tlangval Tlumtea leh Lil Me te'n zaiin kal khawmte an awi a. Chapchar Kut 2025 House Band te'n zai hi an rem a ni.

Lungleia Chapchar Kut lawmnaah hian Kut hmannaa kalte mamawh leh duh zawng lei theihna tur dawr (stall) hrang hrang 41 hawn a ni bawk a, mipuiin an hlut hle a ni.

Organising Committee-in Chapchar Kut Miss 2025 thlan chu Mizoram Journalists' Association (MJA) Lunglei District kuta a dah angin, District MJA chuan Chapchar Kut hmannaa hnam thuam inbela kal nula nalh zual pasarih thlang chhuakin, an zing aṭang hian Chapchar Kut Miss 2025-ah Lalramchuani (Ramthar) chu thlan a ni a. Lunglei Photographers' Association (LPA) te'n hnam thuam inbel naupangte aṭangin Kut Hraite thlang bawkin, Kut Hraite mipaah Amos Vanlaltlanhlua (Khawmawi leh hmeichhiaah Elena Lawmsangkimi (Salem Veng) te thlan an ni.

Lungleia Chapchar Kut hlawhtling taka hman a nih theih nana tha leh zung sengtu zawng zawng chungah Kut Organising Committee chuan lawm thu a sawi a ni.

Attachment