4576/2024-2025

Saitual, the 7th March, 2025: Zofate kut ropui leh ngaihhlut hlawh ber te zinga mi Chapchar Kut 2025 chu Mizoram hmun dang te rualin Saitual Public Playground, Saitualah ropui taka lawm a ni a. Prof. Lalnilawma, Hon’ble Minister, RD, PHE & Horti, Tawi Bialtu MLA ni bawk chu Kut Pa niin, District Bawrhsap Dr. Lalngura Tlau chu Kut thlengtu a ni.

He hunah hian Kut Pa Prof. Lalnilawma chuan Zofate tana Kut pawimawh tak Chapchar Kut hmang tura kalkhawm zawng zawngte kut chibai a buk a, Chapchar Kut hlawhtling taka lawm a nih theih nana Saitual District mipui tha leh zung sengtu zawng zawngte chungah lawmthu a sawi nghal a ni. Minister chuan Chapchar Kut chu hmun hrang hranga zofaten an hmang thin tih a sawi a, hei hian zofate inpumkhatna a entir a ni, a ti.

Prof. Lalnilawma chuan Chapchar Kut thupui atana thlan “Zonun ze mawi Hawihhawmna” tih chu mipuite’n hre thar leh turin a chah a, hawihhawmna chu sawifiah aia nuna lantir zawk a pawimawh a ni, a ti. Minister chuan Saitual District hmasawn nan mipuite chu mikhualte chungah hawihawmna lantir zel turin a chah a, Saitual ina Sangha Kutpui 2025 leh KTP General Conference 2026-a thlen tur chu hawihhawmna entirna remchang tak a ni, a ti.

Kut Pa Prof. Lalnilawma chuan Saitual District-in hmasawnna hmel thar a hmu zel chu lawmawm a tih thu a sawi a, District Bawrhsap te nen thawh hona tha tak neiin theih tawp an chhuah zel a ni, a ti. Minister chuan Saitual District-in hma a lo sawn zel theih nan, ruahmanna siam a bawhzui zel a inhuam thu a sawi bawk. Kalkhawm mipuite chu zu leh ruihhlo tel loa hlim taka Kut hmang turin Prof. Lalnilawma chuan duhsakna a hlan a ni.

Kut Thlengtu, District Bawrhsap Dr. Lalngura Tlau pawhin inlawmna thu sawiin, Saitual District-a Chapchar Kut hmang tura lo kal zawng zawng te leh Kut inbuatsaihnaa tha thawh zawng zawng te chungah lawmthu a sawi a. Bawrhsap chuan Kut thupui “ Zonun ze mawi- Hawihhawmna” tih chu hre reng turin leh hlim taka Kut hmang turin kalkhawmte chu a chah a ni.

Vawiin Kut hmannaah hian Mizo hnam lam chi hrang hrang- Cheraw Kanpui, Pangpar lam, Chheih lam, Sarlamkai leh Dawhzawm lam te entir a ni a, YMA chhang te an pawnto bawk a ni.

MUP Saitual District te chuan hlado an chham a, Govt. Saitual College atangin Mizo hnam thuam hrang hrang entirna kawngzawh “Costume Parade” neih a ni a, zai leh rimawi tum ngaihnawm leh hmuhnawm tak tak te ngaihthlak a nih bakah mipui kalkhawmte chuan chaipui leh chhawnghnawhna hun hlimawm tak an hmang bawk a ni.

Chapchar Kut 2025 hmanna hmuna kalte atangin Chapchar Kut Lanu atan Lalremmawii, Saitual Venglai chu thlan niin, Kut val atan Vanlalhruaimawia, Keifang Venglai chu thlan a ni bawk. Naupang kum 12 hnuai lam atangin Kut hraite thlan an ni a, hmeichhe naupang zingah Lalrinfeli chu thlan niin, mipa naupang zingah Daniel Lalruathlua chu thlan a ni a, Saitual District kum upa lam atang Khuangchawi Nu leh Pa thlan a ni bawk.