4577/2024-2025

Dated Kolasib, the 7th March, 2025: Kolasibah Chapchar Kut 2025 chu " Zonun Zemawi - Hawihhawmna " tih thupui hmangin Diakkawn Field ah ropui taka lawm a ni.

Kumin Kolasiba Chapchar Kut hmanna ahhian Kut Pa, Pu Robert C. Lalhmangaiha, Kolasib DC chuan Chapchar Kut hmang tura kalkhawm Kolasib mipuite chu chibai a buk a. Chapchar kut hlim leh nuam taka hmang tura an lo kalkhawm theih nachhan chu Pathian khawngaihna vang liau liau a ni tiin Pathian hnenah lawmthu a sawi.

Kut Pa chuan Kumin chapchar kut thupui, Zonun zemawi hawihhawmna chu Mizo tawh phawt nunah a bet tlat tur a ni, a ti a. Mizo hnam tana pawimawh a tih te tarlangin, Mizoramah chhungkaw kehchhia an tam lutuk chu a ngaihmawh thu a sawi a. Chhungkaw kehchhia chuan naupang thang chho zelah nasa takin nghawng tha lo a nei a ni tiin, chhungkaw insiam dawna ngaihtuahna fim tak hman a pawimawh a ni, a ti.

DC chuan Mizote chu pung zel tur a a duhthusam thu sawiin, kan ram than chhoh zel nan leh kan hnam boral loh nan inthlahchhawn chu tun aia an ngaih pawimawh a tul a ni, a ti. Mizo thalai tamtak suattu ruihhlo do kawngah pawh tan lak a, thailai rual kalkhawm te chu ruihhlo laka inhnamhnawih lo turin a chah bawk.

Hnam rohlu humhalh chungchang pawh sawiin, mizoten kan hnam rohlu te kan humhalh thiam a ngai a ni, a ti . Mizo hnam rohlu chuan a huam zau hle thu sawiin, heng kan hnam rohlu te hi kan hriat a a hlutna te kan inzirtir chhawn zel a ngai a ni, a ti bawk.

Heng bakah hian Kolasiba NHIDCL in National Highway an thawmthat mek chungchang pawh tarlangin, Mizoram Chief Minister, Pu Lalduhoma leh PWD Minister, Pu Vanlalhlana te hmalakna zarah leh Deputy Speaker, Pu Lalfamkima  leh sawrkar leh Kolasiba khawtlang leh tlawmngaipawl hrang hrangte thahnemngaihna  avangin tun dinhmunah kawngpui Blacktop hna pawh thawh mek a ni, a ti a; Four lane kawngpui siam hna pawh hnathawh tan mai theih tura hmalak mek a ni, a ti bawk.

Kolasiba Chapchar kut lawmna hi zing dar 10-ah tan in, thusawi leh zaipawl te, Upa zai te, Ralte tawnga inbiakna hun te , mizo hnam lam chi hrang hrang entirna te, zaithiam sawm te atanga lunglen hun te leh Chapchar kut Miss lawmman semna te neih a ni a. Kolasiba chapchar kut miss atan hian Christy Malsawmkimi, Kolasib hmar veng chu thlan a ni.

Vawiin chapchar kut lawmna denchhen hian CMO Office Kolasib buatsaihin Walk for Health, inkaichhawn theih loh natna atana ke a kal pawimawhna tarlanna, Walkathon 2025 pawh huaihawt a ni a. He walk for health hi Kolasib Venglai atanga bul tanin, New Diakkawn thleng a kal a ni a. Kolasib YMA Branch hrang hrang atangin YMA members te leh mipui an kalkhawm a ni.

Tlai dar 4:30-ah Mizo te tana Kut ropui ber Chapchar kut, Kolasiba lawmna hun hi khar a ni.