4578/2024-2025

Dated: Mamit the 7th of March, 2025 : Vawiin khan GSA Playground Mamit-ah Chapchar kut 2025 chu “Zonun Zemawi -Hawihhawmna”tih thupuia hmangin ropui taka hman a ni a. Kut thlengtu Pu Vanlalchhuanga President Sub. Hqrs YMA niin Kut pa Pu K. Laltlawmlova, District Bawrhsap a ni.

Kut pa Pu K. Laltlawmlova chuan Mizo te kut ngaihhlut leh ropui tak hmang tura mipui kalkhawmte kut chibai bukin mizo te'n kan thil neih zinga hlu ber tlawmngaihna chu chhawmnun zel a tul thu a sawi a, tunlai khawvelah inbiakpawhnate a awlsam tawh a, mizo te'n tlawmngaihna hlu tak kan neihte a ti dal deuh em aw tih theih a ni a, tlawmngaihna chu Mizo kan nihna anga kan chhawmnun zel tul ber a nih thu a sawi. Mamit District chu hnam hrang hrang chenkawmna kan ni a, kan kut leh hunpuiah te kan chhehvela hnam awmte kan sawmin kan telh ve thin chu mawi a tih thu leh chin zui zel atana tha a nih thu a sawi bawk.

Kut thlengtu Pu Vanlalchhuanga pawhin Mizo hnam culture leh kan nihna hnam dang te'n min hriat hran theihna turin kan hnam nun leh nihna kan vawn nun reng a tul a, chutianga vawn nunna chang hrelo chu hnam boral an ni thin a ni tiin hawihhawmna, tlawmngaihna, huaisenna, chhelna, huaisenna, rinawmna te nei rengtu hnam ni turin kalkhawmte a sawm.

Vawiin Chapchar Kut hmanna hunah hian Mamit khawpui chhunga YMA branch hrang hrang, Sub.Hqrs YMA Cultural Troupe, MHIP Sub Hqrs atangin Mizo hnam lam chi hrang hrang entir a ni a, Youth Icon star J.Lalrosanga leh zaithiam hrang hrang te'n zaiin mipui an awi bawk. Chapchar kut hmang tura kalkhawmte atangin Kut nula leh Kut naupang thlanna neih a ni bawk a ni.

Chapchar Kût Miss atan hian Malsawmtluangi D/o Lalremtluanga Lungsir chu thlan a ni a, pahnihna HD Malsawmdawngzeli D/o Lalhlupuii, Bazar veng pathumna Lalpekhlui D/o Lalamena Hmarveng te an ni.

Kut naupang hmeichhia-ah pakhatna Lalhruaitluangi, Mamit Field veng, pahnihna Lalruatfeli Lungsir, pathumna Christy Lalruatpuii Bazar vengte an ni. Mipa naupangah pakhatna Mason Malsawmtluanga Hmunsam, pahnihna Delan Rochansanga, Dinthar, pathumna Johan Malsawmhlua Field vengte an ni.

Chapchar kut 2025 hmanna hi Chapchar Kut Organising Committee ruahmanna a hman a ni.