4579/2024-2025

Siaha the 7th March 2025: Zofate Kut Kan neih zinga ngaihhlut hlawh ber te zinga pakhat Chapchar Kut lawmna chu vawiin khan Siaha Vaihpi Tlyliah-ah hman a ni a, District Bawrhsap Pu VL Hruaizela Khiangte chu Kut Pa niin Pi P Chaki, MCHP Gen Hqrts President chu Kut thlengtu a ni. Kumin Chapchar Kut Thupui chu ‘Zo Nun ze mawi-Hawihhawmna' tih a ni.

Kut Pa Pu VL Hruaizela Khiangte chuan kalkhawm mipuite chu Kut chibai a buk a, Zofate Kut kan neih zinga pawimawh tak Chapchar Kut chu hlim leh lawm taka hmang theuh turin duhsakna a hlan.

Kut Pa chuan Pi leh Pute hnam ziarang leh chin dan hrang hrang chhawmnun zel chu thangtharte mawhphurhna a ni a, ngaihhlut nachang hriat a tul takzet a,  Hnam Ro hlute ngai pawimawha, humhalh tlat chu Pi leh Pute chawimawina leh thangthar lehzelte tan rohlu kan hnutchhiah theih ropui tak a ni, a ti. Siaha District chu Mizoram chhim tawpah awm mahse hmasawnna tam tak a thleng mek zel a, a lawmawm hle rualin District upa pawl a nih angin kawng tinrengah hmahruaitu nih tum a, District dangte entawn tlaka siam turin sawrkar bakah Khawtlang, kohhran leh NGO te thawhhona tha neih a tul takzet a ni, a ti. Mizoram thalaite ruihhlo in a run nasa hle a, a hun lo taka thalai te nun tichhiaa boralna lamtluang zawhtirtu ruihhlo chu tih takzeta do a tul a ni, a ti bawk.

Siaha District chuan theihna (potential) ngah hle a ti a, khualzin hip thei tur hmun (tourist attraction) tam tak a nei a, a hmuna cheng mipuite khawvel mithmuha inphochhuah thiam a tul hle a, Castle of Beino te, Mawma tlah te, Pala Tipo te chu mi tam takin an tlawh mek tih pawh tarlangin a lawmawm hle a ti bawk. Mikhual chhawn chungchangah Siaha district mipuite chu an tha chungchuang hle a, faina leh thianghlimna kawngah erawh hma sawn a la ngai hle tiin district nuam leh thianghlim siam theuh turin mipui zawng zawng a sawm a ni.

Kut thlengtu MCHP Gen Hqrts President Pi P Chaki pawhin thusawiin Chapchar Kut lo chhuah tan dan a tarlang a, Hmanlai Pi leh Puten hlim leh lawm taka an hman thin angin vawiinah pawh inlungrualna leh induhsaktawnna thinlung nen kut theuh turin kalkhawm mipuite duhsakna hlanin a sawm a ni.

Chapchar Kut lawmna-ah hian MHIP Sub Hqrts President kum 27 chhung lo chelh tawh Pi H Lalawii chu Nopui hlan niin chawimawi a ni bawk. Mal zai, Group zai, Hnam inchei entir, Pawnto, Insuknawr, Hnam lam, chanchinbutha lawmmam sem te bakah Kut Miss leh Mister te thlan an ni a, Chai leh Chhawnghnawh nen hlim taka Kut hi hman a ni.