4580/2024-2025

Khawzawl, dated 7th March 2025: Vawiin chawhma dar 11 khan SYMA Field, Zuchhip Veng, Khawzawlah Chapchar Kut 2025 chu ropui taka lawm a ni. Khawzawl DC Pu K. Vanlalthiana chu Kut Pa niin Pu PC Rosiama, President, SYMA chu Kut Thlengtu a ni.

Kut Pa Pu K. Vanlalthiana chu Kut Thlengtu Pu PC Rosiama'n a lo lawm a, District MUP chuan Kut hawn nan hla do chhamin silai vawi 5 an kap a ni. Kut Thlengtu Pu PC Rosiama chuan thu sawiin Mizo kan nihna leh kan ze tha te vawng nung reng turin mipui a sawm a, Chapchar Kut ni ropui leh pawimawh takah hian tlawmngaihna te, inlungrualna te leh Mizo nun ze mawi kan neih te hre thar leh turin a sawm bawk. Hemi zawh hian compere Pu PC Lalrindika leh Pi PC Lalhmangaihi te hnenah hun hlan a ni a, programme an kaihruai chhunzawm a ni.

Kut Pa Pu K. Vanlalthiana chu Rebecca Zothanpuii, Miss Chapchar Kut 2024 chuan thilpek a hlan a, Kut Pa chuan thu sawi chhunzawmin Zo nun ze mawi hawihhawmna thinlung vawng nungin hlim taka mipui te hmang turin a sawm a. Hmanlai pi leh pu te'n hlim takin an lo hmang thin tih a sawi a, khawtlang nun duhawm an lo neih thin, rinawmna te, thatna te, taimakna te kan vawn nun zel a tul tih a sawi. Chapchar Kutah hian chung kan tihdan tha te hrechhuak thar leh turin a sawm a, kan Zoram ropui zel theih nan inunauna leh inlungrualna nen tha taka thawk hoa nung ho turin mipui te a sawm a ni. Chapchar Kut 2025 Khawzawl District a hmang tura lo kal zawng zawng te hnenah lawmthu a sawi a, he hun thlen theih nana a tul apiang thawk zawng zawng te hnenah lawmthu a sawi bawk a ni.

He hunah hian zai leh lam leh thil hmuhnawm chi hrang hrang thlirin ngaihthlak a ni a, mal zai te, parlam te, khuallam te, chawnglaizawn te, tlanglam te, tumphit tum te, Mizopa inbuan te, sarlamkai te leh thil dang te YMA branch hrang hrang leh mimal te'n an rawn pho chhuak a ni. Hun tawp dawnah Pu K. Lalzika, President, MUP Headquarters, Khawzawl chuan lawmthu sawina hun a hmang bawk a ni.

Miss Chapchar Kut 2025 atan Lalruatpuii Sailo, Kawnzar Veng thlan a ni a, Lalmalsawmi, Lungvar chu 1st runner up niin Vanlalchhuanawmi 2nd runner up a ni. Naupang Mizo inthuama inchei mawi bera thlan, Grace Lalngaihawmi leh Lalruatkima te hnenah lawmman hlan a ni bawk.