4581/2024-2025

Lunglei, 2025 Vau thla ni 7: Sawrkar laipui ruahmanna, ODOP (One District One Product), "District khat, thar chhuah chi khat" tih hnuaiah balhla chu Lunglei District ODOP a nih angin hma lak chhoh mek niin, vawiin March ni 7, 2025-a C. Ṭhuamluaia Mual, Lungleia Chapchar Kut hmannaah pawh balhla leh balhla aṭanga thil siam chhuah chi hrang hrang chuan a lailum a luah a ni.

Lungleia Chapchar Kut 2025 hmannaah hian Lunglei ODOP hmanga tualchhung siam chhuah ei tur chi hrang hrang chu Kut Nu, Health & Family Welfare Minister Pi Lalrinpuii lo lawm nan thilpekah hlan a ni a. Kut Thlengtu, District Bawrhsap Pi Navneet Mann chuan Kut Nu lawmna thilpek hi a hlan a ni.

Vawiina Chapchar Kut lawmnaah hian kut hmangtu mipuite tan sawrkar department, pawl leh mimal te'n dawr (stall) chi hrang hrang hawngin, he'ng zingah hian District Horticulture Office chuan One District One Product (ODOP) stall an hawng ve bawk a. He ODOP stall-ah hian Lungleia balhla aṭanga thil siam chhuaktu (entrepreneur)-te'n balhla aṭanga thil siam chi hrang hrang - in chi (banana juice), kamram (banana chips), chhangphut (banana flour) leh a dangte chu tlawm taka lei theih turin an chhawp chhuak a. He'ng ei tur tui, thianghlim leh hrisel tak tak chhawp chhuahte hi kut chhimtute pawhin an hlut hle a ni.

Hun hrang hrangah sawrkar thuneitute, mi pawimawhte leh khual ṭhate an lo kal changin anmahni lo lawm nan thilpek lo hlan ṭhin a ni a. Heti ang nikhua hian Lunglei District-a khual ṭhate lawmna thilpek atan District ODOP balhla leh balhla aṭanga thil siamte lo hlan ṭhin ni se tia ODOP hma lakna hnuaia ruahman a nih angin, hun eng emaw lai aṭang khan balhla leh balhla aṭanga thil siam chi hrang hrangte chu thilpek atana inhlan hi chin chhoh a ni a. District ODOP chawi lar nan leh balhla hmanga ei zawnna tihhmasawn nan he thil hi chhunzawm zel tum a ni.

ODOP hnuaiah hian Lunglei District chhunga balhla thar chhuah leh balhla aṭanga thil siam chhuah tipung tur te, balhla chingtu leh balhla hmanga thil siam chhuaktu tam zawk an awm theihna tur leh hmanraw mamawh leh a hralhna ṭha zawk a awm zel theih nan te hma lak chhoh zel tum a ni bawk.