High Court Judge Pu Michael Zothankhuma chuan Ni.2.7.2016 (Inrinni) chawhma khan Champhai District Court a enfiah hnuin, Champhai Circuit House Loby-ah sorkar Department hotute leh Champhai Sub-Hqrs. YMA hruaitute a kawm a, chawhnuah Champhai Zote a Champhai District Session Court hmun tur a enfiah bakah District Session Court in a luah lailawk tur hmun remchang a enfiah bawk.
High Court Judge Pu Michael Zothankhuma chuan Champhai District Court hmun hma leh JO Complex te enfiahin, tuna District Court hmunhma neih mek chu a len tawk loh vangin Session Court dah mai theih anih loh thu a sawi a. Champhai Circuit House Loby-a Sorkar Department hotute a kawm bakah Champhai Sub-Hqrs. YMA hruaitute a kawmna-ah District mipuiten Champhai a Session Court an mamawhna kawng hrang hrang thlen a niin, Champhai Zote khawtlangin Session Court hmun tur bigha 7 chuang a zau ram an pek chu ram ruak ala nih vang leh helai hmun a in bengbel turin kum 5 vel zet hun a mamawh dawn vangin Champhai a District Session Court dah anih dawn pawh a Office luah lailawk tur ngaihtuah atul thu Pu Michael Zothankhuma chuan sawiin, Court hmunhma ngaihtuah chu State sorkar mawh anih thu leh Court dinna sum mamawh chu sorkar laipui tum tur anih thu a tarlang bawk.
Champhai Zote a Session Court hmun tur Bigha 7 chuang a zau, Land Lease pawh tih fel vek tawh chu High Court Judge hian tlawh nghalin, chak zawka hmalak anih theih nan Concept paper buatsaih ran atul thu leh Champhai a Session Court dah anih pawh a Pisa luah lailawk tur neih tul atih angin Zote a Integrated Industrial Development Centre (IIDC) hmun chu enfiahpui nghal a ni bawk.
Sorkar Department hotute leh Sub-Hqrs. YMA hruaitute chuan Champhai District chu ramri dep a awm anih vangin Session Court a ngaihtuah ngai thubuai a tam bik thu leh Thubuai neitute leh thu hretute Aizawl kalna senso hautak zia an tarlan bakah hemi avanga sorkar in leiba Rs 50 lakhs (Cheng Nuai 50 vel leiba) aneih mek thu High Court Judge hnenah hian an thlen a. Pu Michael Zothankhuma chuan Champhai District mipuite harsatna tawh dan chu a hriatthiampui thu leh District Session Court dah thuai anih theihna tura theih tawp chhuah atum thu a sawi.
