Ni 2.7.2016 (Inrinni) khan MHA (NE) Jt Secretary Pu Satyandra Garg chuan Mamit District-a Reang (BRU) raltlante lo letna hmun Damdiai khua a tlawh a, an dinhmunte zir chiangin harsatna an neih te a hmunah a en fiah.

Pu Satyandra Garg hi Reang (Bru) hruaitute nen Damdiai BNRGSK Hall-ah in kawmna an nei a, Reang (Bru) hruaitu Pu Elvis Chorky chuan an harsatna thlen zingah Mizorama Reang (Bru) rawn let te tana an pawisa dawn chu awm lailawkna (temporary shelter) siamna tura atan a beitham thu leh ram chungchangah tunhma an huan lo ram te an enkawl zui leh theih dan tur te Jt. Secretary hnenah hian a lo thlen a ni. Hei bakah hian Special Development Project siam dan ngaihtuah sak tur te, an mahni hnam bil tana Central School siam sak tur leh Sipai lak runpui an puala siam sak turin Jt Secretary hi a ngen a ni.

Pu Elvis Chorky chuan Reang (Bru) hnamte chu Minority hnam zinga a hnufual ber an nih avangin sorkar hna leh thil dangah te theihtawpa tan lak pui turin a ngen bawk.

Pu Satyandra Garg hi Aizawl tangin Suarhliap Field a Helicopter hmangin a rawn tum a, Mamit District Bawrhsap Pi Lalbiaksangi leh District Official dang te’n an lo dawng sawng a ni.

MHA Jt Secretary chuan Reang (Bru) kalkhawm ten harsatna an thlente theihtawp chhuah a hmalakpui a tum thu sawiin chutih rualin an thil phut zawng zawng erawh chu an duh ang vekin Sorkar in a tih vek theih loh a awm a nih pawha hrethiam ve turin a chah a ni. Reang (Bru) hruai kirte an constituency huam chhungah cluster settlement a dah an nih tur thu leh an awm lailawkna atana Central Sorkar atanga tanpuina awm chu tihpun a nih theih nan Sorkar lam ngen sak an nih tur thu a hrilh a ni.

Heng bakah hian Tripura atanga rawn let awmna khuaah te kawngpui, tui leh electric chungchangah an harsatna te sutkian dan ngaihtuah a nih tur thu leh Electric bikah an mahni viltu P&E lamin an lo enfiah dawn thu a sawi a, heng tui, electric, kawngpui chungchanga harsatna te sukiang tur hian District Bawrsap chuan hmalak mek a nih thu a sawi ve bawk a ni.

Bru hruaitute thusawi bakah hian mipui lam atangin mahni duh thu renga kir leh Repatriation Plan anga Mizoramah rawn kirte an harsatna sawina hun pek an ni a, heng an harsatna tarlan ah hian tui, electric, Damdawi In, kawngpui leh ram chungchang tih loh chu harsatna an neih loh thu an thlen bawk.

Mamit District Bawrhsap Pi Lalbiaksangi’n Pu Satyandra Garg hi mizo thil siam a hlan a ni.

Jt Secretary hi Mizoram Home Department tangin Addl Secy Pu Lalbiakzama leh Pu David H. Lalthangliana, OSD te bakah Mamit atangin District Bawrhsap, SP, DRDA Project Director leh DIPRO bakah Works Department a EE ten an tawiawm a ni.