Vawiin khan Aijal Club-ah Pu Lal Thanzara, Health Minister in Ngopa Tea Pvt. Ltd. product thar Mizo Tea atlangzarh. Pu KS Thanga, Parliamentary Secretary leh Tea Board of India officials ten he hun hi an hmanpui.

Mizoram leilung chhuak Mizo siam thianghlim leh hrisel siamchhuaktu Ngopa rama awm FK Tea Estate neitu Pu F.Kapsanga te chhung inpekna leh thawhrimnaah faka lawmthu sawiin khuallian Pu Lal Thanzara chuan Pu F.Kapsanga chu lehkha zirsang nilo mahse mahni hnaa tui mi, mi inpe zo, mi taima leh tumruh, Kohhran leh Khawtlangah pawh tangkai tak anih thu sawiin an chhungkua atang hian zirtur tamtak a awm a ni a ti.

Mizo te zingah mi thenkhat reilote chhunga awlsam taka hausak tum tlat, contractor ni tura inziaklut si lova pawisa neihsa awm chuang lova contract hna lian thawh tum tlat leh a hming leh nihna pawh hre chuang lova bungrua supply tuma inrawlh tlat thin an awm thu leh insiamthat a ngaih thu sawiin Khuallian chuan Pu F.Kapsanga te chhung chu mahni kutkea din tlat tum mi an nih avanga hlawhtling chho ta an ni a ti.

Mizoram sawrkar-in NLUP trade hrang hrang a sem zingah thingpui chingtute leh sawngbawltute chu an hlawhtling hle tih sawiin Health Minister chuan Biate, Darzo leh Baktawng leh Ngopa tlangdung lama thingpui hmuna thawktute chu an thawhrimna leh an hlawhtlinna a hmuh thu leh hnathawktute hmel hmuh a nuamin an hlim hmel reng a, thingpui fe phei hi chu a hralhna lamah pawh an harsat lo tih a hmun ngeiah a hmuhpui thin thu a sawi bawk.

Health Minister hian thingpui intan dan sawiin China ram atangin kum 5000 kalta atanga lo intan nia hriat a nih thu leh tui ti takin thingpui hi an lo in thin tiin thingpui in tam lutuk hian that lohna tam tak a awm theih laiin thatna tam tak pawh a nei a, thau lutuk turte vengin stroke leh anti depression, cancer leh zunthlum venna kawnga puitu tha tak nia mithiam ten an sawi thu a tarlang a, mi ten tui ti taka an lo in a, an lo hrisel pui ngei theih nan Mizo Tea chu a tlangzarh a ni.

Pu F.Kapsanga pawhin thu sawiin, Tea Board Director te Mizorama an lo kalin a thingpui huan thatzia an hmu a, an phurpui thu leh chuta tanga hma lak chhoh anih dan thu a sawi a, tunah hian khawl lian pui pui pathum Mizorama la awm ngai lo te bun mekin Green tea leh adangte pawh siam zel an la tum thu sawiin Mizote hian “Pian dawn zan atanga thih thlenga kan in chu thingpui hi a ni” a ti.

Vawiin programmeah hian video presentation hmangin Mizo tea Video thlir ho a ni a, Major Vanlalhuma, C.O, Aizawl Temple Corp in tawngtainain a hlan a, Pu Mark Lalduhsaka’n Market leh Technical report a pe bawk.

Pu F.Lalmalsawma, Managing Director in lawmthu sawiin hun a khar a ni.