Vawiin chawhnu dar 1:00 khan SBI, Lunglei branch-te chuan July ni 1, State Bank Day pualin Lunglei Civil Hospital-ah Civil Hospital staff-te hnenah wheelchair leh stretcher 5 ve ve an pe a. He hun hi Lunglei DC Pu Abhijit Vijay Chaudhari, IAS-an a hmanpui.

Pu Abhijit Vijay Chaudhari chuan SBI chu Lunglei District hmasawnna atana tangkai tak an ni a ti a. Corporate Social Responsibility (CSR) kaltlanga kum tina tanpuina an pe thin chu lawmawm a tih thu a sawi. State Bank of India-in kum 210 a tling chu lawmpuiin  an kal leh zelna turah duhsakna a hlan nghal a ni.

Lunglei Branch Chief Manager Pu Thangzasiam Guite chuan CSR kaltlang hian kumtinin an hlep atanga 2%-in tanpuina an pek thin thu a sawi a. Mi te tana malsawmna leh an hamthatna awm ang pe tu nih zel an tum thu a sawi.  

State Bank Day pual vek hian vawiin tlai dar 3:30 khan SBI, Lunglei branch Bazar Vengah Lunglei DC chuan SBI e-Corner a hawng a. He e-Corner chhungah hian ATM, CDM (pawisa dah luhna), Coin Vending Machine (pawisa nawi thlengna), Cheque Drop Box, Barcode hmanga Passbook Printer leh Stand Alone Green Channel Counter te mipui hman turin dah a ni.