Vawiin khan Pu Joseph Lalhimpuia, Parliamentary Secretary chuan Mizoram Secondary School Teachers Association (MISSTA) Annual General Conference vawi 17-na Synod Conference Centre Aizawl ah a hmanpui a. School Education Special Secretary Pu R.Zarzosanga leh Dy Director Pu Lalrambuatsaiha ten an tawiawm a ni.

High School Headmaster Recruitment Rules thar chu peihfel thuai tum anih thu leh High School atan Science leh Mathematics Zirtirtu lakna tur Recruitment Rules hran siam anih hnuah, Science leh Mathematics zirtirtu indaih lohna phuhru turin Zirtirtu 111 lakna tur buaipui mek a ni a, hun rei loteah peihfel beisei a nih thu Khuallian Pu Joseph Lalhimpui chuan sawiin Zirna hi ram hmasawnna zawng zawng tobul a ni a, hriselna leh kan ram leh khawltang nun min siam danglamtu a ni a. Education hi School kal ringawt a ni lova, hlawhtlinna atana pawimawh ber chu zirtirtuin an hriatna leh thiamna naupangte hnena an hlan chhawn hi a ni a, chuvangin zirtirtute hian hmana thiam sa ring lovin hriatna thar nen inzir taimak hi a ngai a ni a ti a.

Zirtirtuin result tha a neih theih nan zirlaite nen inhnim hnai taka hun tam zawk an hman a tul a, tunlai technology lo chhuak thar zel hmang tangkai a naupangte kaihhruai a tul a ni tiin Pu Joseph Lalhimpuia chuan Zirtirtu kalkhawmte chu zirna tha kan neih zel theih nan theih tawp chhuah zel turin a fuih a ni.

MISSTA General Conference chawhma hun hi Pu Zorammawia Vice President-in a kaihruai a. MISSTA President Pu K.Zatlunga chuan Presidential Address a sawiah Office a thawk tam takin zirtirtute chu office kalphung hre lo, hlawh siam dan leh mahni basic pay pawh hre lo an tih fona chhan chu school-ah zirlaite hmakhawngaia classroom-ah zirtirna hna an thawh nasat vang a ni a tiin MISSTA in kum khat chhunga kawng hrang hranga hma an lakna te a sawi a,MISSTA Member kalkhawmte chu taima taka zirtir hnaa thawk zel turin a fuih bawk.

MISSTA General Conference-ah hian Member 400 dawn an kal a, District tin atangin Sub-Headquarters hruaitute an kalkhawm.