Mipui thlantlin Member of Parliament, State Legislature leh Village Council ten thawhhona tha zawk nena district a sorkar laipui scheme tha taka kalpui anih nan leh enthlithlai tur a din District Development Coordination and Monitoring Committee (DISHA), Kolasib chu vawiin khan an chairman Pu CL Ruala, MP(LS) hovin DC Conference Hall, Kolasib-ah an thukhawm.

Pu CL Ruala chuan Committee member te thahnemngai taka sawihona hun hmang tur leh, thiamna leh finna te thawhkhawm turin a chah a. Meeting-ah member te thahnemngai taka tel zel tura chahin, hmasawnna atana sum lokal te a nihna taka hman anih theih tan tanho a tul ani a ti bawk.

Kolasib District a kumin 2016 -17 kallai meka sorkar laipui scheme kalpui mek dan tlangpui chu hetiang hi a ni:“Swachh Bharat Mission (Gramin) hnuaia thingtlang khaw in tinin ekin an neihna tur Individual Household Latrine(IHHL) hnuaiah ek in sak ngai 641 atangin 394 sak zawh tawh a ni a. Khaw 32 a Ekin thianghlim tawklo 1225 sakthatna tur buaipui mek a ni. Vantlang inthiarna FCI Godown,Gosen veng,Kolasib-ah Rs.2lacs sengin sak zawh tawh a ni.

Swachh Bharat Mission(Urban) hnuaiah Pilot project atan bawlhhlawh sawngbawlna tur Solid Waste Management Centre Dihmun Tlang, Kolasib-ah siam mek a ni. Bairabi luibulah Dumping Ground siam a ni bawk.

Khaw tin-ah electric pek anih theih nan a duan Deendayal Upadhyaya Gram Jyoti Yojana (DDUGJY) hnuaiah Dilzau H, Sakeihmun leh Zaihrikawn-ah te electrification tur a ruahman mek a ni a, heng khua pek zawh hi chuan Kolasib District chu electrified vek a ni tawh ang. Integrated Power Development Scheme (IPDS) hnuaiah Kawnpui (Rs.438.93lacs) leh Vairengte (Rs.647.68lacs) khawchhung power tihchangtlung tuma hmalak a ni.

SSA hnuaiah kum 2016-17 atan school uniform naupang 9767 hnenah leh zirlaibu naupang 12751 hnenah sem a ni a. Mid day Meal hnuaiah school pathum; Kolasib a Shalom UPS leh Tuithaveng UPS, Kawnpui a Kanaan UPS; ah te choka sak mek a ni.

National Health Mission hnuaiah hmalak chhunzawm zel a ni a, Sub-centre 34 awmin ASHA 87 an awm mek a ni. Naupiang 597 awmin, heng zinga 595 chu dama piang an ni. Ina nau nei 38 awmin, nau nei zawng zawng atanga chhutin 6% a ni a, nikum 2015 -16 aiin 12% in a hniam a ni. Kumin kum kallai mekah Kolasib District-ah malaria vanga boral an la awmlo a ni. Infant Mortality Rate naupiang 1000 atangin 20.1 a niin, nausen 12 an boral a ni. Mobile Medical Unit (MMU) te vawi 16 an veichhuak a ni.

MGNREGS hnuaiah tun dinhmunah job card 17938 awmin, kumin pawisa hmuh atangin ni 6 inhlawhna siam tawh a ni a. IWDP hnuaiah hmalakna 5 leh IWMP hnuaiah hmalakna 6 a awm mek a ni.

Heng bakah hian sorkar laipui scheme hrang hrang district a kalpui dinhmun sawiho a ni.

Vawiin meeting-ah hian Kolasib District a MLA 2 : Pu K.Lalrinthanga, Parliamentary Secretary leh Serlui bialtu, Pu PC Zoram Sangliana, Kolasib bialtu MLA te an tel bawk a ni.