Consultative Workshop INDO-SAN 2016 Pu Narendra Modi, India ram Prime Minister hoa Vigyan Bhawan, New Delhi-a 30th September, 2016-a neihah Mizoramin AMRUT Reforms Award cheng vaibelchhe 1 nuai 63 a dawng. AMRUT Reforms Incentive Award hi UD&PA Parliamentary Secretary Pu Hmingdailova Khiangte-in Mizoram Sorkar aiawhin Union Minister for Urban Developoment Pu Venkaiah Naidu hnen atangin a dawng.

UD&PA Minister Pu Zodintluanga chuan, “Mizoramin India ram state lian tam tak zingah Central Government atanga award a dawng ve leh thin hi thawktute thawhrimna leh thawhhona tha neih vang a nih piah lamah Chief Minister Pu Lal Thanhawlan min tuipui vang a ni a. India ram dang ang bawkin Aizawl khawpuia Municipal Body kan neih chhun Aizawl Municipal Corporation chu hnathawk thei turin hna hrang hrangte Mizoram sorkar atangin a suan bek bek a, Municipality tana Constitution-in a sawi 18 functions pawh tun hnaiah Sorkarin Municipal thawh turin a hlan kim bawk a, nasa takin Mizoramin Central Sorkarin tihtur min tuk tihhlawhtlin kawngah hma kan sawn phah a ni,” a ti. A sawi zelnaah Pu Zodintluanga chuan, “Reforms Incentive Award dawng tur hian reforms tihhlawhtlin ngai zawng zawng atanga tehin 70% mark score chin te chauhin award hi an hmu a, Mizoram hian 75% kan score a, Tripura State hian 71% an score a, North East State zingah kan pahnih chiah hian kan tel nghe nghe a ni,” a ti.

Sorkar aiawha AMRUT Reforms Award dawngtu UD&PA Parliamentary Secretary Pu Hmingdailova Khiangte pawhin, “UD&PA hnuaia thawktu hrang hrangte thawhrimna leh thawhhona hi a fakawm a, Chief Minister leh Minister chak tak hnuaiah Department-in nasa takin hna a thawk thei a, hei hi Mizoramin lawmman kan hmuhna bul pakhat chu a ni,” tiin a sawi.

Government of India Flagship Programme zinga pawimawh tak JNNURM thlakna atana tih Atal Mission for Rejuvenation and Urban Transformation (AMRUT) Mission kalpui mekah AMRUT Mission Guidelines-in States tin ten reforms hrang hrang milestones tia a vuah hunbi neia tihhlawhtlin tur a duang a, chung tihlawhtling State-te hnenah chuan AMRUT Mission atana kum tina sum dah pumpui atanga 10% chu kum tinin reforms tihlawhtlingte hnenah hian Govt. of India chuan a semsawm thin dawn a ni. Financial year 2015-2016 liam ta chhunga reforms tihhlawhtlin tur zingah hian Municipality-ah Double Accounting System hman te, sum dinhmun tarlanna siam te, AMRUT tihhlawhtlin nana Service Level improvement Plan leh State Annual Action Plan siamte bakah Municipal hnena 14th Finance Commission pawisa pek te, State Finance Commission ruat te, Municipal 18 functions sorkar atanga hlan te, building bye-laws siamthat leh a dangte a tel a ni.

AMRUT Reforms hi financial year tinin tihhlawhtlin tur a awm a, 2016-2017 chhunga tihhlawhtlin tur Central Sorkarin State tinte a tuk a, India ram State zinga tihlawhtlingte chu nakumah pawh mark score tur zat an score tlin chuan reforms award hi an dawng leh dawn a ni. Mizoram Sorkar aiawha AMRUT Reforms Incentive Award dawngtu Parliamentary Secretary Pu Hmingdailova Khiangte hi UD&PA Director Pu Zorammuana leh official dangten an tawiawm a ni.