Vawiin chawhma ah kha Pu Lal Thanzara, Minister, H&FW, I&PR, etc., Mizoram Rural Bank branch thar a hawng . MRB branch 79-na hawnna ah hian Chalfilh Constituency bialtu, MLA Dr. Ngurdingliana, Chairman, MAMCO pawh a tel a ni.

MRB Phullen Branch hawngtu, Minister Pu Lal Thanzara chuan Aizawl khawpui leh Mizoram pumpui ah bank thar tam tak hawn a ni mek zel tih sawiin chu chuan Mizoram ah sum lengvak a tam tih a ti lang a, Mizoram in hma a sawn zel tih a tichiang a ti. Bank chu hmasawnna atana hmanraw pawimawh tak a nih thu sawiin Phullen khaw mipui tan an khua a Bank hawn ni chu ni chhinchhiah tlak a ni tih a sawi a. Mizoram mipui ten hmasawnna kawng kan zawh chho mek zel a, Bank mamawhna te pawh a tam tial tial a, a tel lovin a khawsak theih tawh lova. Hmun kilkhawr zawka awm te thleng pawh in Bank hman tangkai nachang hriat leh Bank a sum dah a pawimawhna uar zawka inzirtir zel a ngai a ti.

Minister chuan sawrkar hmalakna hrang hrang te sawi chhunzawm in NLUP hmalakna leh NEDP kalpui tur chungchang te a tarlang a. Mizoram sawrkar flagship programme, NLUP ah chhungkaw 1,30, 000/- dawmkanna kalpui a ni a, a hlawhtlinna hmuhtur tam tak a awm tawh a ni a ti a. Mizoram sawrkar hmathar lianber tur NEDP ah Rs 25,000/- Crore chu Chief Minister kaihhruaina hnuaiah Mizoram hmasawnna atana tangkai thei ang bera hman tura peihfel a ni tawh tih Minister chuan a tarlang a. Hnathawh theih hun remchang in hawng hmasa ber ah hman tum a nih thu a sawi. NEDP hnuaia Health Department hmachhawp zingah District Civil Hospital zawng zawnga CT Scan dah tura ruahmanna siam chu mipui tan a tangkai hle dawn a ni a ti.

Thusawitu dang, Chalfilh bialtu MLA, Dr. Ngurdingliana, Chairman, MAMCO chuan Chalfilh bial ah inkalpawhna kawng, zirna ah leh hriselna ah kum reilo te chhungin hmasawnna duhawm tak hmuhtur a awm thu a sawi a. Health Department statistics ah pawh Chalfilh Bial chu bial hrisel a nih thu tarlang in zirna kawngah pawh hma a sawn a. Chalfilh bial chhunga khawkar in kal pawhna kawngtha awm mek zel chuan hmuh theih in hmasawnna a thlen mek tih a sawi a. Phullen leh a chhehvel mipui te khawsak dan en in MRB hawn thar chu a hlawhtlin tur thu leh tangkai taka mipui in an hman chhoh zel a rin thu a tarlang.

Minister hian MRB office a hawn hnuaah Phullen Community Hall ah Vantlang inkhawm buatsaih a ni a. He hun ah hian MRB hnathawk ten MRB hawn a nih theih nana hmalak dan te an sawifiah a. Phullen Zonal Football Tournament buatsaih nan Health Minister Pu Lal Thanzara  chuan a thlakhat hlawh atangin Rs. 50, 000/- a thawh bakah khawtlang pawl hruaitute hnenah mamawh huna hman atan silpauline a pe a. Sikul pahnih hnenah Rs.5000 ve ve a hlan bawk.