Sawrkar High School Headmaster-te tana ni li chhung awh training ‘ In-Service Training of Govt. Secondary School Headmaster’ State Project Office, Rashtriya Madhyamik Shiksha Abhiyaan (RMSA), Mizoram in kalpui mek chu vawiin khan a hawnna programme IASE/CTE Seminar Hall-ah neih a ni a, Education Minister Pu Lalsawta’n a hmanpui.
Pu Lalsawta chuan Headmaster te hi an hnathawh chhung hian an pawimawhna hre miah lovin thahnem ngai takin an thawk thin a, mahse an thawhpui te leh an zirtir chhuah tak te chuan Headmaster ten an nunna a tha zawnga nghawng an neih thui zia leh an ngaihsang zia te an sawichhuak fo thin a ni, a ti a. Education Minister chuan zirah tlai luat a awm lova, kum lamah a then te chu upa ni mahse mi in zirna a chhunzawm zel chuan a upa lova a naupan zawk theih thu a sawi.
Tunlai khawvel a danglam nasat tawh thu leh thil thar in khawvel a bawh chak thu te sawiin Pu Lalsawta chuan zirna lamah certificate mai a tawk tawh lova, skill tak tak khawvel danglam zelin a rawn irchhuah leh a ruaitu tur ten an mamawh chu zirtir a tul in hemi milha zirna pawh her rem a ngaih thu a sawi. Education Minister chuan Sawrkar in zirna hi a ngai pawimawh em em a, zirtirtu lak chungchangah duh ang zan chu ni lo mahse tun hmalam aia uluk zawkin leh mithiam leh mitha te merit system kaltlanga lak anih tawh thu te sawiin he hi change ropui tak a tling a ni, a ti a.
Education Minister chuan IASE-in RMSA ruahmanna hnuaia zirtirtu tam takte tan training an buatsaih thin chu lawmawm tiin Mizorama zirna than zelnaah an pawimawh a, an thawhhlawk hle a ni, a ti a. Headmaster te chu zirna an neih tawh te chu duhtawk mai lova, zir belh zel tur leh an thiamna neih ang ang te midang hnena zirtir chawng leh turin a chah bawk a ni.
Training hawnna inkhawm hi Pu Lalhmachhuana, State Project Director MEMS in kaihruaiin Dr. Vanlalhruaii, Principal IASE/CTE chuan kalkhawm te lawmna thuchah a sawi. Training hi December ni 10 khan tan niin Sawrkar High School 199 atangin Headmaster 107 te an tel a, December ni 14 khian Training hi a tiak ang.
Institute for Advanced Studies in Education hian kumin chung ringawt pawh hian RMSA hnuaia zirtirtu lak thar te tan training leh zirtirtu thawk mek te tan intuaitharna training tum engemaw zat an lo buatsaih tawh nghe nghe a ni.
