Vawiin khan AH &Vety Minister Pu Nihar Kanti Chakma chuan mipui ten sa thianghlim leh hrisel kan ei theih nana ruahman khawl hmanga sa talhna in, Rural Slaughter House, Mualpui a tlawh. Minister hian vawk leh bawng talhna tur

Rural Slaughter House-a khawl bun mek chu a hmunah enfiahin hna kalpui dan a enpui a. Minister hi AH &Vety Director Dr LB Sailo leh official dang ten tawiawmin mipui te chhawr tangkai theih tura peihfel thuai anih theih na tur ruahmanna an sawi ho a ni. Khawl bunna tur building chu sak zawh tawh ni mahse power supply leh tui an hmuh tlai avanga khawl bun hna chu tan tlai anih thu te leh tun dinhmunah pawh power supply khaihlak zauh zauh a awm leh thin avanga duh anga chaka hna an thawh theihloh thu te Minister hnenah hian an thlen a. Kum thar January thla chawhma lamah chuan hawn theih tura peihfel an inbeisei thu thawktute hian an sawi a ni.

Rural Slaughter House, Mualpui hi NABARD tanpuina sum cheng nuai 412.36 senga sak a ni a. Tarlan tawh angin kawlphetha leh tui tunhnai lawka pek an nih chauh avangin a khawl bun hna hi kar kalta khan thawh tan theih chauh a ni a, Supertech System, Ghaziabad ten he hna hi an thawk a ni. He rantalhna in hi Mizo te khawsak phung mila siam a ni a, khawl leh mihring tha inbuk tawk velin ran talh leh a sawngbawl hna hi thawh a ni ang. Darkar hnih chhungin bawng 30 leh vawk 30 a rualin a sawngbawl theih dawn a, ran te hi talh an nih hmain Veterinary Doctor ten uluk takin darkar 24 chhung an enfiah anga, ran te hi a hrisel leh hrisel loh endikin mihring ei tlak tura hrisel an nih chuan soundness certificate pek an ni anga, soundness certificate pek loh te chu talh an ni lovang.

Bawng zawrhna hmun (local cattle market) bul hnaia awm anih avangin Rural Slaughter House sakna atan hian Mualpui ram hi thlan a ni.