Rampum huapa lirthei chi hrang hrang him zawkna tura tih High Security Registration Plate (HSRP) chu Mizoramah pawh vawiin atang khan hman tan a ni ve ta a. Mizoram Chief Minister Pu Lal Thanhawla Official Car-ah leh Transport Secretary Pu H. Darzika official car ah vuah hmasak a ni. He HSRP thar hi Motor thar atanga vuah tan zel a ni phawt anga, June thla laihawl atangin a tahtawlin Motor hluiah chuan vuah chhunzawm zel a ni ang.

HSRP thar vuah tanna hun buatsaihah hian Transport Secretary Pu H. Darzika chuan kum 2001 lam daih tawha sorkar laipuiin he ruahmanna a lo kalpui tan dan te, kumin kum tira Supreme Court in thuchhuah khauh tak a siam leh dan te tarlangin he ruahmanna hi ramchhung mipui mimir leh lirthei him zawkna tur atana tih a nih thu a sawi.

HSRP ah hian hologram, Laser Code leh IND (India lamtawi) a in chhu a. Hei bakah hian a number leh hawrawpah te hian India tih inziak a in phum ru theuh a ni. Motor number plate hma leh a hnungah Laser Code number inanglo bel a ni a, Motor darthlalangah hian a hma leh hnung a laser code number te, engine number, chasis number leh a motor registration number te bel vek a ni bawk. Heng information te hi Registration Certificate a information nen a inmil thlap tur a ni a, a engemaw ber inanglo a awm chuan thil diklo awlsam takin a hmuhchhuah theih dawn a ni. Number plate hi a kilhna bik Snap Lock a kilh tlat a ni anga, kilhna pakhat mai pawh a chhiat palhin mahni thua siamthat ve mai tur a ni lova, Transport thuneitu te hnen atanga phalna lain a ti tura ruat Company te chauhin an siam tha ang. HSRP Mizoram chhunga vuah tur hian Shimnit Utsch India Pvt. chu thlan a ni a, kum 15 chhung atan hna pek an ni.