Home Minister Pu R. Lalzirliana chuan mahni mimal leh service hmakhua ngawt ngaihtuah lova ram leh hnam tan eng tin nge nasa zawkin hma ka lak anga, eng nge ka ram hian a mamawh tih te kan ngaihtuah nasat a tul zawk, a ti. He thu hi vawiina Arya Mess (Police Hqtrs.), Khatla a Mizoram Police Service Association General Conference vawi 7-na a hmanpuina a a sawi a ni.

Home Minister chuan Mizoram Police te chu taima tak leh rim taka ram leh hnam tana an beihna avangin ram a muanawm tial tial tiin hmasawnna tur leh hmabak hlen tur erawh tam tak an la nei, a ti a. Ram hmasawnna atana pawimawh ber te zing ami, remna leh muanna vawnghim tura a tak taka hma latu an nih avang pawhin ram hmasawnna hi an kutah thui tak a awm a ni, a ti. Pu R. Lalzirliana chuan Discipline leh Administration kenkawh chungchangah te, mahni hna hlenchhuah kawngah te nasa zawka hmasawn tura fuihin Mizoram mipui te tana thlamuanpuiawm ni zel tura tan la sauh sauh turin a fuih a, MPS Officer zahawmna hi mimal nun pawlawh avanga tihchhiata a awm tumahin in phal tur a ni lo, a ti.

He hun hmanpuitu Mizoram Director General of Police Pu Lalrokhuma Pachuau, IPS pawhin thu sawiin Police Officer te chu an thawhrimnaah a fak a. Neitu thinlung dik tak pu a, mimal leh Department hamthatna piahlamah Mizorama cheng te him nan leh thlamuan nan an thawk tih inhria a, inhlan thar fo turin a chah a ni.

Conference hawnna inkhawm, an President Pu C. Laldina kaihhruaiah hian kum kal ta chhunga an member boral ta mi paruk, Pu Siamliana Addl. SP; Pu K. Amona, SP; Pu Ramfangzauva, Dy SP; Pu Lalseia Sailo, Dy. SP; Pu B. Lalhmachhuana Dy. SP leh Pu D.N Paudyal, Dy SP te sunna hun an hmang a. An member zinga mi, IPS hmu thar Pu John Neihlaia lawmpuina thuziak an hlan bawk.

MPSA Conference-ah hian thu ngaihtuah tur engemawzat chhawpchhuah a ni a. Chung zingah chuan an service kaisan leh inzarpharhna tur rawtna hrang hrang te, Service Rules ennawn te, Unit hrang hranga attachment chungchang bakah Disaster Management Dept. a MPS dah rawtna te a tel. MJA Gen Hqtrs kaihhruaiin Association hruaitu thar an thlang bawk.