Vawiin chhun dar 12.00 khan Social Welfare Department chuan an conference hall, Chaltlang-ah Mizoram-a Aganwadi Worker-te zinga hnathawktha bik thlanchhuah mi 5-te hnenah State Award an hlan a; Social Welfare Minister Pu PC Lalthanliana chuan Certificate leh pawisa fai Rs 5000 theuh award dawngtute hnenah hian a hlan a ni. Aganwadi Worker chawimawina dawngte hi – Pi Vanlalngurpuii, Khawzawl Centre V te; Pi F. Lalengsangi, Hnahthial Centre IV te; Pi Zaithantluangi, Seventh Day Tlang te; Pi K. Siamkimi, Tuipang Centre I te leh Pi Lalsawmliani, Phullen Centre V te an ni.

Pu P.C. Lalthanliana chuan. “Social Welfare Department hma hi a zau em em a; mirethei zawkten zirna tha a thlawna an dawn ve theihna turin EKLAVAYA School din a ni a; tunah hian Serchhip-a hetiang zirna dinna turin Central sawrkar chuan cheng vaibelchhe 12 min pawmsak atangin vaibelchhe 5.66 min sanction tawh nghe nghe a. Tin, Multi Sectoral development Project hnuaiah Lawngtlai leh Mamit district-ah IAY School te, Health Sub-Centre te leh Anganwadi Centre engmawzat sak zawhfel a ni a. Heng district 2-a tui thianghlim in tur ruahmanna atan cheng vaiblechhe 6 sanction fel mek a ni bawk” a ti. Social Welfare Minister chuan, “Anganwadi centre-a thawkte tana Social Welfare Department-in State leh National Award te a buatsaih chu thil chhuanawm tak a nih thu a sawi a, “Chawimawina hi sum leh pai tam lamah a innghat lova, a hlutna leh ropuinaah a innghat zawk a ni; chuvangin vawiina award dawngtute ka lawmpui rualin, a dawng ve lote tan nasa lehzuala tan la tura min fuihtu ni se. ICDS hmel timawi emaw. Tihmingchhe theitu chu aganwadi-a thawktute kan nih avangin taima tak leh rinawm takin I thawk sauh sauh ang u” tiin kalkhawmte a fuih a ni.

Vawiina Aganwadi Worker mi 5-te hnena State Award hlanna inkhawmah hi Pi B. Sairengpuii, Secretary, Social Welfare Department chuan a kaihruai a. Pi B. sairengpuii chuan, “Aganwadi worker-te kuthah-man hi a beitham hle a; nimahsela hnathawktute taimakna avangin fakna thu kan dawng tam em em a. Tunah chuan Central sawrkar pawhin kan lawmmante a rawn tipung a, naupangte dawn ang nutrition pawh awaganwadi worker leh helper-ten tunah chuan an dawng ve thei tawh dawn a ni” tiin aganwadi-a thawkte chu thahnemngai lehzual turin a fuih a ni. He inkhawmah hian Pi Vanlaldini, Director, Social Welfare Department chuan thu sawiin, an department hnathawh mek leh hmachhawpte a tarlang a; Pu P.L. Liandinga, Programme Officer chuan lawmthu sawina hun a hmang bawk.